البـــدو لو شان الدهر وقتهم ريف ** عسى لهم من وابل الغيث مرهاش ( الاسمر الجويعان )

[عايش الجويعان]

بسم الله الرحمن الرحيم

هاذي قصيده للاسمر الجويعان يصف فيها ( البدو )

البدو لو شان الدهر وقتهم ريف = عسى لهم من وابل الغيث مرهاش
اهل الشرف واهل المروات والكيف = الا وفيهم ذارب ذبح الاكباش
اهل الدلال المكرمات المهاديف = يغدن ضرم من سامر الليل هتاش
بيت الشعر ما صك بابه عن الضيف = الضيف يلقابه تراحيب وفراش
يصلح لهتاش الخلا والهذاليف = بيت الوناسه يدهله كل طراش
يلقابه البن الحمر والتكاليف = راعيه يجدع فيه حوشه وما ناش
ارباعهم شغل البنات الغطاريف = نجل العيون مسلهمات بالارماش
عسالج يزهن جميل التواصيف = مثل الغصون اللي تهزع على الطاش
البدو للشيمه غزات مزاهيف = يفرح بهم من جا من القفر منداش
هذا كلام الصدق ماهي سواليف = رجالهم للضيف لطف وبشاش
دور مضا مابين غزو ومناكيف = مستخدمين الخيل من دون الادباش
ياما تلاقوا بالمزاريج والسيف = وياما تشرع بالحمر خضر الانماش
ماهم على الماضي كثير التحاسيف = ذاك الجهل قوم على قوم حماش
سوالف راحت سبا تشبه الطيف = قول على قول تسولف ولا هناش
واليوم صارو بالمعزه مواليف = كل على منهج نواياه معتاش
بضلال جزلين العطا والتصاريف = دولة هل العوجا مزيحين الاوباش

تحياتي / عايش الجويعان

[نافع عيد الجديد]

اولا الله يحييك بين ربعك
شرفتنا طال عمرك
وصح لسانك ولسان المرحوم باذن الله الاسمر الجويعان
قصيده جزله لشاعر جزل وكبير
نامل بتزويدنا بقصائده الباقيه ومراسلة الاداره لفتح ديوان لهذا الشاعر الكبير حتى نعطيه لو بعض من حقه علينا
بانتظار جديدك
رعاك الله

[سعود المسعودي]

صح لسانك ولسان المرحوم باذن الله الاسمر الجويعان


قصيده جزله لشاعر جزل وكبير

عايش الجويعان بيض الله وجهك على اتحافنا هالجواهر الغاليه


لك خالص الود

[غموض الشمال]

صح لسانك ولسان القائل رحمه الله
ولاهنت على الطرح الجميل
تقديري لك

[أبو غرام]

الله عليك اخي عايش
ولاتحرمنا ابدا من مثل هذه النصوص

صح لسانه رحمه الله ولسانك على النقل

[احمد الضوي]

مشكور على القصيده الرائعه

[سليمان الجعفري]

اهل الشرف واهل المـروات والكيـف = الا وفـيـهــم ذارب ذبـــــح الاكــبـــاش
اهــل الــدلال المكـرمـات المـهـاديـف = يغـدن ضـرم مـن سامـر الليـل هتـاش
بيت الشعر ما صـك بابـه عـن الضيـف = الـضـيـف يلـقـابـه تـراحـيـب وفـــراش
يـصـلـح لـهـتـاش الـخــلا والـهـذالـيـف = بـيـت الونـاسـه يدهـلـه كــل طــراش
يلـقـابـه الــبــن الـحـمــر والتـكـالـيـف = راعيـه يجـدع فيـه حوشـه ومـا نــاش
ارباعـهـم شـغـل الـبـنـات الغـطـاريـف = نجـل العـيـون مسلهـمـات بـالارمـاش
عسـالـج يـزهــن جـمـيـل التـواصـيـف = مثل الغصون اللي تهزع على الطاش

شكراً اخي عايش الجويعان على هالراااائعه

لشاعرالكبير/ الاسمر بن خلف الجويعان رحمة الله عليه

كل بيت اجمل من الثاني .. لاهنت على النقل المميز والرااااقي

لك مني اجمل التحايا والاحترام