ياعين لاتبكين من هـم الأهوال= وياقلب لاضاقت علي وين اوديـك
وياهاجسي نظم بالابيات موال= خل الزمن يرحم بالايام تاليك
يارب ياعالم حفيات الأعمال= يارب تستر دمع عينٍ تراعيك
عينٍ بكت من علم موت ابن هذال= عزاه يامن عين الاجواد تبكيك
مرحوم ياشيخٍ جمع شمل الابطال=يامن جميع ابياتنا ماتوفيك
لاصرت شيخ شيوخ ذربين الافعال= وش عاد من جزل المعاني يكفيك
يازبن يامزبن ضعيفين الأحوال= ياعز عين المنتخي لا انتخى فيك
يامضرب أمثال الشرف لأهل الامثال= يامن خصيمك ضاع من فعل اياديك
يبكونك أهل الطيب ياطيّب الفال= ويبكيك من يسمع من الناس طاريك
وتبكيك دمعات العذارى والاطفال=وتبكيك دنيا فاقده شوف صافيك
يرعاك رب البيت في خير منزال=عساه يجعل جنة الخلد تأويك
ويرفع مقامك عن مقامات الأنذال= لأعلى مقامٍ فيه طيبك يوديك
والموت حق ولابقى شي ينقال= ولو للمنيه فدوةٍ غير نفديك
واللي عقب ماصار يطري على البال=كلمة شرف يمكن تسرك وترضيك
والله لو ان الموت يازبن رجال= لغير نودع هامته عند رجليك
الشاعر القدير نواف هلال
قصيدة رائعه ومعبرة وموثره بنفس الوقت
أجتمع فيها جزالة المعنى وقوة المفردات ورصانتها برثاء الشيخ زبن بن هذال رحمه الله واسكنه فسيح جناته
مبدع أيها الشامخ
تقبل تحياتي واحترامي
16/10/05, (02:05 AM)
العرض الشجري