من قصائد الشاعر الكبير/ عبد الرحمن ابن معيتق

[سليمان الجعفري]

قال الشاعـرالكبير/ عبدالرحمن بن معيتق من الشملان رحمة الله عليه

هذه القصيده يرد بها على أحد الشعراء ويمدح الملك عبدالعزيز ومشايخ عنزة وهي غير كاملة :

شيخ العرب ما حده الجدي لسهيل = عبدالعزيز اللـي مضالـه فعايـل
ظهر على نجدٍ وسـوى مساهيـل = وجدد رسومه وأعتدل كـل مايـل
نادى منادي الجود لأهل المواكيل = وتلفتـت صـم القبايـل تخايـل
وردوا على شطٍ غزير المناهيـل = يسري ويجري يبهر العقل هايـل
الهادي المهدي على دين جبريـل = الحاكم المأمون وافـي الخصايـل
شمس النهار ووصفه البدر بالليل = بحيلـه وحيلاتـه ورانـا يحايـل
حرٍ طلع طلعه وراء الشام والنيـل = يغوص موجات البحر ما يسايـل
ستر العذارى لابسات الخلاخيـل = هيف الخواصر ناقضات الجدايـل
ريف اليتاما والضعوف المراميـل = لا ركبن جرد السنيـن السحايـل
ما عقبه مقرن له العـدل والميـل = اهل الحجا وأهل الذرى والفضايل
أهل السياسة والرياسة حلاحيـل = يخيلون قـالات وراهـا مخايـل
نجد حموها مـا عليهـا مداخيـل = بسيوف تقدااللي عن الدرب عايل
بديارهم مثـل الجبـال المضاليـل = ريف ورغيف وللضعافـي مقايـل
تلقا ضعوف الناس مثل المخاليـل = تسرح على وادي به العشب طايل
وادي نعيـم وللضعافـي مداهيـل = ما طاه ليّن صبح الأمطار سايـل
بـه اليتامـا حافريـن دحاميـل = مثل الحمام اللي عن الدرب جايـل
وعن وصفهم فهمي قصير بتكليل = وهم خير من وصفي لهم بالمثايل
عن وصفهم تقصر مثايل هل القيل = سل غيرنا يكفيك كان أنت سايـل
صبة ذهب ما فيه غـش وتبديـل = صافي صفامنسوب من صلب وايل
وإلى ذهب جيل مضى يتبعه جيـل = عند العرب تلقـا خيـار الدلايـل
وأنشد عن اليديان خزامت الفيـل = عاداتهم كسب الثنـاء والجمايـل
ذباحة للضيف من كنـس الحيـل = لا جرهدن شهب السنين المحايـل
القهوجي تلقـاه عنـد المعاميـل = ماليـةٍ مـا حـط فوقـه وكايـل
لهم على حمر الطواقـي مواهيـل = زمـول اتدنـا للحمـول الثقايـل
الجار ما ينهـج يـدور المكاييـل = يعطون من غرس الطيايب نحايل
ولا العواجيه إلـى جـدع الشيـل = وحل الطـراد وفرعـن الحلايـل
لهم على جمع المعـادي تحاويـل = وجدودهم حامين بيضـاء نثايـل
ولا أنحر الهذال من دور منديـل = عند العرب هم الشيـوخ الأوايـل
شيوخ توكل ما تـدور المواكيـل = وتذكر عطاياهم سمـان وجلايـل
ولا محددت الجمـل بالمصاويـل = دهامشة ياللـي عليهـم جهايـل
يتلون أبن مجلاد شرق وتشاميـل = وايحلفون اللـي بقلبـه دغايـل
يرعن به الزرفات غصب بتذليـل = أبن بكر مشعان ما هـي همايـل
ولا مصـوت بالعشـا للهواشيـل = أبن مهيد إلـى اقحطـن المكايـل
ولا أنحر الشعلان أقصر ولا اتطيل = أنهج تغرب كـان تبـي الزمايـل
حكام بالنقـره وشيخـان لرويـل = حامين شقـح كمشـت بالشمايـل
عليا رويلي يحسبه ذاهـل ويـل = تذهل عن المعنا القلوب الهبايـل
وإلى حسبت حساب بالرقم تجميل = تكفي الأشاره عن جميع المسايـل
كل القبايل ما بهم قول مـا قيـل = نعـم بشمـر كاسبيـن النفايـل
حريبهم لا قيـل شـدوا مقابيـل = عده على جمر الغضـا والملايـل
ما يهتنـي قلبـه تولـه ولاويـل = يرحل قبـول الليـل ولا القوايـل
اهل الصخى ومحرقين المعاميـل = حامين بالساقـات يـوم الدبايـل
واللي يغربـل يعتبـي للغرابيـل = ولا داومـت لأحـدٍ بليـا غلايـل
وهذا جوابي صدق ما فيه تبديـل = عليه مـن كـل القبايـل حمايـل

وله ايضا وهي غير كاملة :

يا الله يا منزل من المزن مرهاش = سيله حقوق وبارق المزن لمـاع
لي لابة يا عـل يفداهـم الـلاش = من عقب وايل كلهم حمل ورضاع
من لابة السلقا هل السمت ياواش = اهل القلايع يوم حـزات الأطمـاع
سلقا يا ما كسبهم جـل الأدبـاش = وأميرهم من حط للهجـن مرقـاع
يتلونه السلقا كما الشط لا طـاش = خمس جموع وجامع الجمع جمـاع
من فوق قب فوقهن كـل هـوّاش = وشلف يقص بحدهن قاس الضلاع
صويبهم ياخذ إلى الحول منـداش = تلقا عظامه من وراء الجلد نسّـاع
الضيف مجلاسه على شدادوفراش = لا ضيفه ياخذ إلى الحول ما جـاع
تلقا شواربهم مـن العـج كّـلاش = مثل الحرار اللي على الصيد بتاع
ما قلتها باللي زها الخصر وقماش = سودالعيون مخضبة روس الأصباع

وله ايضا:

بحلت فـي ملـك ملكتـه كبيـري = ما أبدله لو قيل في ملـك فـاروق
لو زودوا صنعا لـوادي عسيـري = ما بيع ملك سقت به شمخ النـوق
اللي جفاني ملحها كيـف اصيـري = ماء ملاح شين فـي كـل مـاذوق
وغديت مثل اللي غدالـه بعيـري = بأرض خلا باليل ما يشوف بالموق
ليله سرى في حروتـه يستديـري = متحيّرٍ يمشي على غيـر طـاروق
ويا راكب من فوق حمرا ظهيـري = مثل النداوي طار من راس شاهوق
تشـدا ظليـم جافـل مستذيـري = متوزيه ما بيـن زورٍ وسمحـوق
ولا قطـاة طيروهـا الصـديـري = رفت بجنحانه بأثر جول وأفـروق
الياما غدت بالجو مثل الزعيـري = شربت هوا بهـواة بترقـي فـوق
ولا جناح اللـي لطلعـه يشيـري = شيهانة تشره على الجول بلحـوق
تشدا تهنفل خفـرة لـه عشيـري = تقصر قدم ترجي جواب من الشوق
ما فوقها غيـر السـلام الكثيـري = على الجماعة قدر الأمكان والحوق
خص وعموم اللي كبير وصغيـري = حتى على لباست الخصر والطـوق
قل يا ناشدٍ عنـا فحنـا بخيـري = والحمد لله ينبت العشـب بفلـوق
رب السماء جبار عظـم كسيـري = يمشي سليم عقب ما العظم مدقوق
اللي خلق زين اللبن من دريـري = ما بين دم وفرث وعظام وعـروق
وحنا بحيل اللي عليـم وخبيـري = اللي له التدبار فـي كـل مخلـوق
ونبي نطيع اللي علينـا يشيـري = نبي بـدل دارٍ بـدار بـلا عـوق
نبي النخل وبكيـف دار الشعيـري = ونطلب من المولى تياسير ووفوق
ونبي نسوي غرسة فـوق بيـري = في مجنب الصفرا بشأن تقل سوق
الماء قراح مثل صافـي الغديـري = يا ما احلا الفنجال بالشم والـذوق
فنجال يشـدا حيمـران الذريـري = بكر على صافي ولا هو بمطـروق
والقهوجي نزهٍ ضريـفٍ شطيـري = يطرب على زرف الفناجيل بالسوق
يا صرت بالدنيا فطين وبصيـري = خمس النخل يسون قطيعٍ من النوق
حب النخل لاجي لجأ في ضميـري = كرسيه ركب بين قلبـي ومعلـوق
فج الخوافي مخشرات القصيـري = إلى اقبلن ما يلحق الضيف ملحوق
نبي لا التم الصيف هو والحضيري = وحلو تقليـط المذانيـب تريـوق
ويكفيك من دنياك شـي يسيـري = ما دمت حي فأنت يالعبد مـرزوق
والعبد مكتـوب غنـي أو فقيـري = يأتيه رزقه قود ولا يجـي سـوق

امل ان تحوز على رضاكم ان شاء الله

وسلامتكم

[نافع عيد الجديد]

الاخ العزيز سليمان الجعفري

صح السانك والسان الشاعر عبدالرحمن معيتق رحمه الله

لاهنت على الاختيار الجميل والمميز

لك الاحترام والتقدير

[سليمان الجعفري]

الاخ العزيز نافع عيد الجديد

شكراً جزيل على مرورك العطر الله يعطيك الف عافيه

وعبد الرحمن ابن معيتق شاعر كبير ورمز من رموز عنزة

ويستحق منا اكثر من ذلك

لك اجمل التحيات وجل الاحترام