القهوة العربيه... والشعر الشعبي

[كريم الشطي]

الشاعر/ سلطان بن عبدالله الجلعود يرحمه الله ولد بسميراء حوالي عام1320هـ وتوفي بها عام1374ه

الله على الفنجال مع هجعة النــــــــــاس= بدلال نارٍ مايبطل سنــاهـــــــــــــــا
مع حمسة يملا بهــا كل محمـــــــــــاس..= ..ويقلبــه قرم يعـرف استواهــــــــــــا
قم يافرج شبّه تر الكبد والـــــــــــــرأس .=.. العين اشوفه قازيه من خطاهـــــــــا
حط الجروم اللي من العام يبـــــــــــاس ..=.. .ليـاما يطوح ضوها مع فضاهــــــــا
واحمس على جمـــر ترى ماله اجـناس...=.. .وكفـّه ليا منه عرقها غشــاهــــــــــا
واودع بهاره هيل ورهه بالاجـــــراس ..=.... ياخالط الفنجال تر هو حلآهـــــــــــا
ودقه بنجر يسمعه كل نعـــــــــــــــاس...=... ولاتغلق الضبة على من بغاهــــــــــا
وصفـه وصبه تر هو الصفى بقيــــاس..=.... ماهو خطاة الخامل اللي طهاهـــــــا
اللي يحطه باوسط النار مرفــــــــــاس .=.... لما يطير قبوها مع غماهــــــــــــــــا

وهذه الابيات قلها احد رجال بني تميم في القهوه

وهو تركي بن فوزان بن ماضي المزروعي التميمي00

قم يابن نازي سو ماينعش البال = من الكيف سوه كنت راعي شطاره
كيف لنا ماهوب كيف للانذال = اللي عن الجودا يهاب الخساره
قم سولي ياريف الانجاب فنجال = ادغث له الطبخة وكيف بهاره
اشقر حمرة تبذل على شانه المال = وان جنب المسبوع دربه يساره
وان جو مناكيف على السير وعجال = عقب التعب يبغون منا وقاره
نقلط لهم ميسورنا مع رخا البال = يوم ولد اللاش غلش بداره
واليوم لي صرف الدهر جاب الاهوال =ما قال قلبي قوي العباره
خف القنا والثقل جاء مثل ما قال =خف الرديف وراعي وراعي الكور داره
واستنعج السرحان والبس ما سال =عن ذيب غدرا ما يهاب السماره
في دارنا نطفي كدا المر بزلال =يكود برد الماي يجلي حراره

وهذه قصيده للشاعر / عضيب بن شلاح الحربي ... يذكر فيها مجالس القهوة ويصنف الرجال حسب رؤيته ...يقول

ياما حلا عقب العشا شبة النــــــار =عقب الهجوع لا رقد كل كوبـــــــه
بقفرية ياعبيد يودع له اشعــــــــار =وسواة فنجال يشوق بصبوبـــــــه
حبه على المطلوب من بن وبهــار =يعجبك بالفنجال صبغه وروبـــــــه
كيف يجوز لشارب الكيف والكــــار =لو دوروا به غمزة مــــا لقوبـــــه
في مجلس فيه المشاكيل حضــــار =بغيبة ردي الحظ عنهم بنوبــــــــه
اللي يخزوون المسير بالانظـــــــار =تكاظموا واللي جليس شوشوبــــه
تلافتوا على بعضهم بالانظـــــــــار =وتغامزوا مابينهم وضحكوبــــــــه
الناس فيهم يافتى الجود هــــــــذار =مسترحل لبليس زين ركوبـــــــــــه
عراض غرة مسلم غافل غـــــــــار =يعرضه للناس لو ما حكوبـــــــــــه
دايم لغرات الاجاويد عقـــــــــــــــار =يظهرعيوب ولا درى عن عيوبــــه
وفيهم تبيني لايسرك ولاضـــــــــار =ماغير يحسب للربايع ضروبــــــــه
وفيهم حصيني قبوع قمــــــــــــار =يوصف على ماقيل به طير ذوبــــه
وفيهم بليهي على الكود صبـــــــار =يصبر ولو زادت عليه الصعوبـــــه
لا جا زمان فيه غلين الاسعـــــــــار =غدى لربعه بالمكاييل جلوبــــــــــه
وانا جا نهار الضيق بالموسم الحار =يرخص بعمره مايعد محسوبـــــــه

وهذا شاعر بني تميم الشاعر الكبير
الشيخ عبدالله بن علي بن صقيه الوهيبي التميمي يقول

ليا دك بي هاجوس شبيت ضوي=.وحمست بن فوق جمر غضاوي
بـريــة ماحــافــهـــا كــل بــــــوي =.دلالها يبــــــري لــهــا نجر ماوي
والـى لـفونـي قـاطعـة كل دوي=..صفيت ماها ماطبخت الثنــاوي
حنــا الذي للـشـاذلـيه نــسـوي=..اليا لوبدوا امنومين الــضحــاوي
وان هب نسناس الهبوب الشتوي =.. غربية تشوي وجيه الشــواوي
كثرت فيها الهــيل يشهد عدوي=. الالف عندي والريال متــســاوي
والمرجــله كل بفـعلـه يــنـــوي=.. لاكـنـــها تكلف قــريب الـــهقــاوي
تبغي عريب مالوجـهـه يـــلــوي=.. قـرم عـلـى عــرضـه وسمته يلاوي
حلـحيل للسيـف المهند يروي =. من لابة تعرف نهــار الـعزاوي

لابد ان نذكرلكم هذه القصيدة المشهوره وهي افضل ما قيل في القهوة
الي ما يطري لنا طاري البن والهيل والزعفران الا وجبنا طاريها
للشاعر المشهور
( محمد بن عبدالله القاضي التميمي ) الله يرحمه
ويقول فيها:

مل قـلـب كل ما التـمّ الاشـفــاق = من عام الا ول به دواكيك وخفوق
يجاهد جنود في سواهـيج الا طــراق = ويكشف له اسرار كتمها بصندوق
الى عـنّ له تذكار الا حباب واشتاق= باله وطــاف بخا طره طاري الشوق
قــرّبت له من غــا ية( البن) مالاق= بـا لكـفّ صافيها عن العـذف منسوق
احمـس ثلاثٍ يا نديـمي على ساق = ريحه على جمر الغــضا يفضح السوق
حــذراك والـنـيّـه وبالك والاحراق= واصحى تصير بحمســة البنّ مـطـفـوق
الى اصفـرّ لونه ثم بـشّت بالاعراق= وصارت كما اليا قوت يطرب له الموق
وعطّـت بريحٍ فاضحٍ فاخرٍ فـــاق= لا عــنــبــرٍ ريحه بــا لا نــفــاس منشوق
دقّـــه بنـــجـــرٍ يسمعه كل مشتاق = راع الهوى يــطرب الى د قّ بــخفـوق
واحشـــه بـدلّــة مـو لـعٍ كــنّها ساق= بـــلّورةٍ منصــوبــةٍ تــقــل غــرنــوق
خـــلّـه تفوح وراعي الكيف يشتاق = الى طفح لــه جـــوهــرٍ صـحّ له ذوق
اصغر قموره كا لزمرّ د با لا شعاق= وكبـارهـا الطـافح كما صـافـي المـوق
وزلـه على وضحا بها خمسة ارنـاق= هـيل ومسـمار با لاسـباب مسـحـوق
مع زعفران والشـمطـري الى انساق= ريحه مع العـنبرعلى الطاق مطـبوق
الى اجـتـمع هـذا وهـذا بـتــيـفاق = فـصبّه كـفـيـت الـعـوق عـن كـل مخلوق
بـفـنجـال صيـن صافي عند الارماق = تـغـضـي وكـرسيّـه غـدانٍ لـمعـشـوق
الى انـطـلـق من ثـعـبـته تقـل شبراق = رنق تـصوّر با لـحمامة على الطوق
خـمـرٍ الى منّه تسـلسـل با لارياق = وعليـه مـن ما صـافي الـورد مـذلـوق
راعيه كنّه شارب خـمـر تـريـاق = كـاس الـطرب وسـرور من ذاق له ذوق

الى ان يقول في النهاية :

الى صفت لك ساعة وانت مشتاق = فا قطف زهــر ما لاق والعمر ملحوق
هذا وصـلوا عـدّ مـا نـاض بـرّ ا ق = أو ما شكـى الفـرقا شفـيـق لمشفـوق
على النبي ما زجّ زاجٍ با لا وراق = وآ له وصحبه عد ما سيق مسيوق

يقول الشاعر محمد بن أحمد بن محمد السديري:

صبه ومده يا كريم السبالي = يبعد همومي يوم اشمه بالانفاس
فنجال يغدي ما تصور ببالي =روابع تضرب به أخماس وأسداس

وهذا الشاعر الفارس تركي بن حميد العتيبي حيث يصف القهوة وصوت النجر بقوله:

يا ما حلا يا عبيد في وقت الاسحار = جر الفراش وشب ضو المناره
معدلة تجذا على صالي النار = ونجر الى حرك تزايد عياره
النجر طق وجاذب كل مرار =مالفه الملفوف من دون جاره
في ربعة ماهيب تحجب عن الجار =لامن ولد اللاش ما شب ناره

وكذلك هناك القصيدة المشهورة للشاعر دغيم الظلماوي في القهوة، وفيها يقول:

يا كليب شب النار يا كليب شبه = عليك شبه والحطب لك يجابي
الوالمه يا كليب عجل بصبه = والرزق عند اللي ينشي السحابي
حنا علينا جيب ماها وحبه = وعليك تقليط الدلال العذابي
ادغث لها يا كليب من جزل خبه =وشبه الى منه هبا كل هابي
باغي إلى شبيتها ثم قبه =تجذب سراة من بعيد غيابي
بنسرية يا كليب صلف مهبه =متلطمين وسوقهم بالعقابي
صبه لقرم صرفته ما حسبّه =يوم البخيل مدنهر الوجه هابي
وعده عن اللي ما يداري المسبه =اللي يدور بالقصي الغيابي
لا جاضع المتروع خطو الجلبه = يا حلو تالي الليل خبط الركابي
اقحص لهم وابدي سلام المحبه =لا شح بالهين كبير العلابي

وكذلك يقول الشاعر سعد بن حمد بن ضويان في القهوة:

ياحسين لاكني على الجمر مجضوع = من فقد خلاني وفقدي ربوعي
قم سو فنجالٍ ترى الراس مصدوع = صفه وزله عن سريب الخموعي
فنجال فيه مخموس الكيف مجموع = بدلال يشدن الخباس الوقوعي
ونجر دلاله ماو بالصوت مفجوع = يا زين حسه والخلايق هجوعي
وانجاك بالمجلس سنافي وبالوع = عده على الطيب وكب البلوعي

وهذا الشاعر عبد الله العلي الحرير يقول في القهوة:

قم سو فنجال ونظف أدلاله = ريحه لراعي الكيف يجلي اعماسه
اشعل ولونه مثل دم الغزاله = لا ذاقه الراقد يحارب انعاسه
في مجلس تدله الى جاء مجاله = اللي عن اللجات يقصر حساسه
والا ترا بعض المجالس عذاله =لا معشر طيب ولا فيه اناسه

ويقول الشاعر غازي بن عون العتيبي في الغرض ذاته:

يا ريف قلبي للمسايير قم شب = وحط المنارة في طويل الظلالي
عقب تشق لها لجزل الحطب جب = وهات النجر واحضر جداد الدلالي
دنّه وخلّه للمسايير يجذب = لا قام صوته للنشامى يلالي
يوحونه الجيران لا قام يقنب =ويجيك الاقصى والقصير الموالي

ويقول سليمان المحمد الهزاع في قصيدة عن القهوة:

لا في على جمر الغضى سو فنجال = فنجال بن من رخيص وغالي
حيثك قديم مغربل البن غربال = حكيم عند مصاطرات الدلالي
خله على المطلوب يلفت لنا البال =يفتح لنا المعنى بمبدا المقالي
الى انطلق من ثعلب المبهرة مال = يشدي خضاب مخفرات حيالي

وهذا راكان بن حثلين يقول في قصيدة مشهورة:

ياما حلا الفنجال مع سيحة البال = في مجلس ما فيه نفس ثقيله
هذا ولد وهذا ولد خال =وهذا رفيق ما لقينا مثيله

وهذا الشاعر هايس بن مجلاد يقول وهو يصف الدلة وصوت النجر:

قم سو ما يصبغ على الصين يا ذياب = بدلال يشدن البطاط المحاديب
احمس الى من العرق فوقها ذاب =واستدن ما يجذب عليك الشراريب
نجر يصيح من الطرب تقل بحجاب = يصبر على طول الدهر للمواجيب

والشاعر / مدوخ بن ضمنة المطيري

في قصيدة رائعة يوصف بها القهوة و كيفية عملها ومن يستحق أن
تقدم له ..

البن كيفه عنـد مـن يشترونـه=الطيب اللي جابها مـن بلدهـا
يا حامسين البـن لا تحرقونـه=داروا على الحمسه يعدي صمدها
حتى يجيك محمـر تقـل لونـه=بزة جرادة طالعة مـن جسدهـا
عده على اللي لابتـه يدهلونـه=له ربعة من قام منهـا حمدهـا
وأثنه على اللي بينات أطعونـه=الخيل يركبها الوعر مع سندهـا
وصبه على اللي لابته يتبعونـه=مع دربه الخلفاء تضيـع ولدهـا
وعده عن اللي واقف وسط شونه=ليا باع شاته حافظلـك عددهـا
وسط الجماعة طايرات عيونـه=في كل يومن يحتسب في وعدها

يتبع..

[كريم الشطي]

والشاعر / عبلان بن سعد العجمي له قصيدة يبين فيها من يستحق القهوة ..

أوي والله كيفـه يـا مطالـيـق=ما هى بكيفة لا عبين السبـاره
كيفة أدلال بالوصايف غرانيـق=بيض تقلط صوب ضو المنـاره
ومحماسة يحرق بها البن تحريق=وتحمس وتفهق عاد فيها صفاره
فنجالها يأتي طـري ليـا ذيـق=من الخوي يبري من الراس داره
لا صب بالفنجال ما به سواريق=مونة نظيف زايـد فـي بهـاره
ويصب للفرسان خيالة الضيـق=نطاحة الفرسان في كـل غـاره
ويصب للي فرق المال تفريـق=ما هو يحسب ربحها والخسـاره
ويصب للي يحتمون المشافيـق=لا جاء نهاره فيه يشبك غبـاره
ويا الله أنا طالبك حظ وتوفيـق=والحظ ما هو للفتـي باختيـاره

و كذلك الشيخ سلمان البلوي له وقفة مع القهوة بأبيات رائعة تقول ..

يا مسوي الفنجال عجل بسوقـه=خص الشيوخ وبد ناس على ناس
خص الشجاع اللي تحلى طروقه=فكاك ربعه يوم الاريـاق يبـاس

والشاعر صنيتان المطيري يوصي ابنه نمر بهذه الأبيات ..

امل الوجار وخلو الباب مفتوح=خوف المسير يستحي ماينـادي
يانمر مافي صكة الباب مصلوح=ولاهي لهلكم يامظنـة فـؤادي

و كذلك الشاعر محمد القحطاني يوصي ابنه ....

يابو محمد شب واقضب مكاني=في غيبتي قهو الرجال المشاكيل
وفل الحجاج لكل من جاك عاني=وابدا التحيه قبل سوق الفناجيل

و يقول الشاعــــر مشعــــان بن هذال العنزي :

قـم سـو فنجـال تـرا الــراس مـنـداش=لعيون من قرنه علـى المتـن مرجـود
ياابن المهارش كب حمسات الادقاش=تاتيـك حمسـات الينابـج بهـا ســووود
ودقــه بنـجـر يسمـعـه كـتـل طــراش=ايضا إلى حرك على الهـون بـه زود
وحـطـه بـدلـة مـولـع كنـهـا الـشــاش=وبهرها مقدار خمسـة عشـر عـووود
الهـيـل حـطـه لا تـدانـا ولــو جـــاش=ومن الزيـاد اقنـع علـى شـذرة العـود
جيـبـه رســم للنشـامـا عــن الـــلاش=الـــلاش لا فـاقــد ولا هـــو بـمـفـقـود
الطيـب سنـده والـردي ذاك مـن لاش=واللـي يريـد الطيـب مـاهـو بـمـردود
لـــذاذة الـدنـيــا مـعـامـيـل وفــــراش=وصينـيـة يقـبـل بـهـا العـبـد مـسـعـود
وصفر الى جا العصر عند كل هباش=تطـاوحـن قـلــب المنـاحـيـر بـالـعـود

و هذه الأبيات لمحمد بن ونيان من بني علي من حرب , فقد كان رجلا كريما لكن أموره المادية كانت تخذله أحيانا ولا تأتي على مايريد ..
في ليلة ما تناول ربابته وارتجل قصيدة معبرة منها :

لاضاق صدري جبت نجـر ودلـة=وسويت مايطفـي لهيـب بجاشـي
وان جا المسير عمس عندي دوى له=فنجال ماسـواه خطـو الخداشـي
بكر على بكـر ليـا جيـت ازلـه=يشبه خضاب مردوعـات النقاشـي
يوم ان ولد الـلاش ياقـف بظلـه=كنه على درب المراجـل يهاشـي
حين هشيـم وحيـن نوقـد بجلـة=ومـر نبهرهـا ومــر بـلاشـي
ونوب بيسر ونجمـع الكيـف كلـه=ونوب على الشاميـة أم الغشاشـي

وفي اختام اتمنى ان ماقدمته قد حاز على اعجابكم واشكر كل من له جهد في هذا الموضوع