قـــال الــذي عـــدّا بعيـــطا طــويلــه

[عبيد الله مهل الشملاني]

قال الذي عدا بعيطا طويله=وبيح كنينه والقوافي سردها
مما طرا للبال جبت المثيله=أكتب بيوت الشعر كلن حمدها
ناخذ من الجمّه ونترك حثيله=بيوت ٍ على ماقيل محد ٍ نقدها
وخلاف ذا شديت حمرا أصيله=عوصا هميم مجهّزة ومعتمدها
ابوها التيهي وهي من فصيله=بين الركاب مجرّبه في مددها
لاروّحت تشدا بروق المخيله=وحذف الحصا بالقاع كنه بردها
مثل الظليم ليا جفل من خميله=مذيّره حس الطلق من زندها
وركّابها اللي كاسب ٍ للجميله=عند عكاش الدرب كنه جلدها
تلفي على اللي حايش ٍ للفضيله=اللي دروب المرجله يستندها
الشيخ أبوطلال راع النفيله=طاريه واصل يم نجد وبلدها
ومن يجهله لاشك صيته دليله=المرجله والطيب مبطي عمدها
شيخ ٍ ولد شيخ ٍ فعوله جليله=ماكر حرار وتعجبك في هددها
عاداتهم لاشك صيد الجزيله=والا الهزيله ستوي لمن قصدها
تذكر افعول اجدودهم بالدبيله=وباللازمه افعولهم من جحدها
يوم الملاقا بالسيوف الصقيله= اجموعهم سقم الجموع ولهدها
ليا اعتلوا قبّ الجواد الكحيله=يثنون دون اللي تنقض جعدها
يوم ان كلن يعتزي في قبيله=وكلن ذلوله بعقب رجله لكدها
أهل المراجل والنوايا النبيله=أهل الكرم والعز للي وردها
جيل ذهب واليوم يتلاه جيله=وتبقى الخيام مثبّتة في وتدها
ويالله تبقي افراحهم لا تزيله=ياعالم غيب الليالي وبعدْها
وختامها سلام مثني نحيله=يم الرجال الموفيه في عهدها[]الاخ فهد عبدالعزيز السبيعي العنزي

صح السانك قصيده جزله تستق الاشاده من شاعر متمكن والشيخ ذياب بن عرعر بن شاعف الظبيان يستاهل المدح .

تقبل تحياتي ]اخوك عبيد الشملاني