" أيها السادة فــ لنتعلم كيف نحلم "

[شمــــــــوخ]

:
:

فضلاً لا أمراً كل واحد يدخل يجيب معه وسادته ويطفي اللمبه وراه
:
:
يسعد مساكم \ صباحكم

موضوعي هالمره غيـــر ... عن الأحـــــلام ..
:
:

النوم & الأحلام

عنصرين رادفين بعض .. فـالنوم يجيب الأحلام ، والأحلام تزورنا في المنام

<-- لا يا شيخه !

البعض منا يحب ينام علشان يحلم ( لأن الحلم بالنسبه له تعبير عن بعض مكنونات نفسه) !
والبعض الأخر ما يحب أحلامه كثير ( لأنه غالباً ما تكون - شينه - وكثير منها تتحقق ) !
والبعض ماتفرق معه أحلامه لأن يصحى من النوم وهو ( ناسي ) وش حلم !

وأنا من ( البعض ) الثالث

قمة القهر لما تصحى من نومك وتجلس كل الصبح وأحياناً تاخذ جزء من الضحى ؛
وأنت تحاول تتذكر ( وش حلمت فيه اليوم ؟ )

وتبتل تهوجس وتسرح وتحاول تركز وتعصب إذا أحد كلمك فجأه .. لأنه قطع عليك حبل أسترجاع حلمك : (
يعني تحس أنك طول ما كنت نايم ما كان قدامك إلا لوحة سوداء مافيها ولا شي ..

بالله مو شي يقهر ؟

عموماً هالحاله تهون بدرجـــات عن الحالة الثانيه والي اعتبرها ( أصعب )

لما تصحى وأنت لسى في المشهد الـ قبل الأخير من الحلم

أوووووووووف ! وش هالأحباط ..

لا وإذا كان الحلم حلو وعليه طلب تجيك الصيحة لو ما كملته !
وتعزي حالك بقـولة ( يالله إن شاء الله الليلة أكمله وأحلم مره ثانيه )

أنا شخصياً راضيه أحلم وأصحى بنص الحلم ( يعني ما أكمله ) لكـن على الأقل أتذكره وأدري وش حلمت فيه !

ولا أني أنام وأحلم وأصحى ( وكنك يابو زيد ماغزيت ) يعني أصحى أدربي راسي ما كأني حلمت !
وعلى ما يقول المثل ( نص حلم في الراس خيرٌ من عشره في الباي باي )

* مواقف كثير التكرار *

تدخل الوالده عليكم والكشره من هنا __ إلى هنا

- ماشاء الله دريتوا !

أنتم وعيونكم طايره !

- وشو ؟

- فلانه جابت ولد !

تنط أختك

- يوه والله أني متحلمه فيها البارح انها جابت ولد !


^^^

تكون جالس بغرفتك ضايق صدرك مره لأنك حلمت أن احد عزيز عليك توفى .

تدخل أمك ( يا ذا الأم تقل حمام زاجل )

وتجلس تحوس جنبك ساعه وهي خانقتها العبره همن تقولك ياوليدي فلان يطلبك الحل : (

^^^

طبعاً حكاية أن الواحد يحلم بشئ ويتحقق هذي أتوقع كلنا نتفق على مصداقيتها

( رغم بعض المبالغات أحياناً في نقل الحلم وتصويره )
لكن برضوا ما نقدر ننكر أن ربي ممكن يبشر الواحد بحاجه أو ينبهه من حاجه بواسطة ( رؤيا )

ولعله من الواجب هنا الأستشهاد
بقول سيد البشر عليه أفضل الصلاة والسلام : " الرؤيا ثلاثه :فبشرى من الله وحديث النفس وتخويف من الشيطان "
أما البشرى فهي التي تخبرنا عن حدث مستقبلي

حديث النفس الي هو عبارة عن الرغبات المكبوته بداخل النفس البشريه
وتخويف الشيطان والعياذ بالله منه هي الكوابيس ابعدنا الله واياكم عنها

أذكر بأختبارات آخر سنه بالجامعه لي كان عندنا اختبار ماده شوي فيها قولة غثيثة

المهم أني رايحه وانا نفسي في طرف خشمي ومالي خلق حتى أحد يهرجني

وجتني وحده من البنات وقالت لي راجعي هالجزء تراه مهم !

طبعاً تعرفون الواحد اذا صار داج بالماده وما درس بذمه و مواصل بعد الأخلاق تصير تجاريه

ناظرتها بطرف عين وقلت ان شاء الله يا دكتوره .. تحمست المسكينه وقالت والله أني صادقه

اسمعي كلامي انا دايم احلامي تصير صدق !

يوم قالت كذا ومير وينط ابليس بوجهي : بعــــد الحين هالنصيحه جايه من حلم ! اقول الخلا بس لايكثر !

وانا على بالي اجتهاداً منتس في دراسة المنهج اكتشفتي ان ذا اهم شي

<-- خبركم الي ثقافتهم عناوين رئيسيه !

المـهم دخلنا الأختبار وطلعنا .. ويحلفون أنه ما جانا سؤال واحد من برا الجزء الي قالت لي عنه


وكثيرة الأحلام الي غيرت مجرى التاريخ وأضافت للكون الشئ العظيم .. ( مهوب أحلام رفيقتي الداجه )

يمكن يكون السبب الرئيسي في حماسي له الموضوع ( الغريب) شوي هو مقال

قريته للأستاذ الصحفي فهد الأحمدي ( كاتب في جريدة المدينه )

وكان يتكلم فيه عن بعض الأحلام الي غيرت العالم ..

أكثر ( قصة حلم ) أذهلتني وخلتني أقول أهبب هو حلم فريدريك أوغست"


من أنت يا فريدريك أوغست ؟

هذا طول الله بأعماركم عالم كيمائي مهم جداً يعني بالعربي تقدرون تقولون عالم زاحف لأنه مكتشف حلقة البنزين ..

طيب وش انتي يا حلقة البنزين من لحية غانمة ؟

هذي من أهم النقلات النوعيه الي حدثت في عالم الكيمياء العضويه .. أحدثت ثوره في عالم الكيمياء

أوكي وش قصتك يا فريدريك أوغست انت وحلقة البنزين ؟

يقول لكم هالرجال كنت احد هالعصريات محتاس ومنلعن جدفه من معضلة ( حلقة البنزين قبل يكتشفها )

وجالس بجنب الدفايه
المهم ما حس بحاله إلا وهو غافي غفوة قصيرة ؛ وشوفوا من شدة ما مخه منلحس بحكاية الحلقه

حلم بــ ( ذرات البنزين تتراقص أمامه

وتأخذ أشكالاً دائرية وتتراجع الذرات الأصغر لتأخذ مكان المؤخرة .. ثم فجأه تحولت الذرات

إلى أفاعي وأطبقت إحداها بفمها على ذيلها )

صحى الرجال بسرعه مذهولاً لإدراكه أنه أكتشف " الحلقة المغلقه " للبنزين والي مثل ماقلت قبل شوي

أحدثت ثورة في عالم الكيمياء العضوية

طبعاً كل طالب بثالث ثانوي يقول بقلبه ليتك ماصحيت من نومك ذاك اليوم

الله يخلف ناس عيالهم يقومون من نومهم مكتشفين اكتشاف قالب الدنيا .. وناس تصحى تدربي روسها

وعلى وزن هالقصه كثير قصص كانت سبب في اكتشاف أو انجاز سواء على الصعيد العلمي أو الأدبي

أو العسكري ! ومافي مجال لذكرها كلها هنا بس برضوا من الحاجات الي اعتبرتها فكاهيه للغايه

حكاية قبائل الزولو الأفريقيه ..

ملك هالقبيله كان دايم يحلم أن فيه ثعبان حديدي راح يخترق ويشق أرضهم وان اي احد يحاول يمنعه

راح يكون مصيره الموت ؛
فبحكم أن الملك كان حكيم جداً وصى شعبه أن لو طلع هالثعبان لا احد يحارشه او يقوله لا

والا انطقوا خلوه يبلعكم <-- حتسي ابوتس ذا مهوب حاكم الزولو

وفعلاً يوم مات الملك جو المستعمرين البيض يبون يمدون " سكة قطار " ورفضوا اهل القبيله

وكان هالشي سبب في حدوث حرب داميه تسببت في إبادة أفراد القبيلة لأن المستعمرين معهم

أسلحه والزولو ماعندهم الا الدجه : (

طبعاً بتقولون وين وجه الفكاهه بالقصه بقولكم مدري بس حسيتها فكاهيه

<< وهـ يامصلتس


الأرواح تتلاقى أثناء المنام !

عبارة جيمت عندها عيوني في كتاب " الروح " لإبن قيم الجوزيه

ذكر كلام مفاده أن أرواح النايمين تخرج منهم حال المنام فتتلاقى وتتحادث قبل أن تعود لأجسادها عند اليقظه !

هل هذا يفسر لنا حلمنا بأشخاص يكونون هم برضوا حالمين فينا ؟!

إذا كذا فـ لو سمحتوا الي يزورني في الحلم يكتب على جبهتي انه جاء علشان كود اذا صحيت اذكر


الاستنتاج الي طلعت فيه من حواقي بهالموضوع وقرايتي عنه أن العصور والأمم القديمه

كانوا يولون الأحلام اهتمام كبير جداً .. حيث انها ممكن تكون سبب في اتخاذ قرارات مصيريه للدوله او القبيله !
تخيلوا ان في اليابان من زمان ( من أيام الاباطره ) كان عندهم غرفه خاصه للأحلام وفيها سرير خاص يسمونه ( كامودوكو) طاعوش كانهم ما يخلوني انام لي فيه لو ليله كود اطلع بحلم مفيد : )

أما فرعون فحلم حلمين مهمين ..

والأثنين كانوا سبب في تغير تاريخ مصر ! وعلى أنه ما خلى مفسر أحلام مازرعه جنبه وماترك كاهن الا وهو راكزه بقصره إلا ان ما احد قدر يجيب له تفسير حلمه الأول بنار عظيمه تخرج من ارض الشام وتمتد إلى مصر فتحرق خيراتها ..

كلهم فسروا له هالحلم أن رجل من آل يعقوب راح يكون سبب في هلاك فرعون وهالشي خلاه تقل وحوش الزامبي يمشي ويقتل وماترك احد من بني اسرائيل الا وهو ذابحه ..

لكن مافيهم من قدر يقوله إن هالنار ماهي إلا الطفل الي رباه في قصره .. موسى عليه السلام : )


بينما حالياً

بالله ماتسمعون هالعالم والناس الي يتصلون على الشيوخ والمفسرين وش يقولون عن أحلامهم ؟!

كلهاا يا شيخ انا حلمت اني تزوجت او انخطبت او تطلقت

الله يخلف بس !



سؤالي هنـا...

إلى أي مدى تعتبر أحلامك بالنسبة لك ضرورية وتلعب دور في اتخاذ قراراتك ؟

وهـل فعلاً انت من الفئة ( المتحققه ) أحلامهم ؟ وإلا أحلامك كلها ( كيف الحال ) ؟

هل حصل واتخذت قرار مهم بناءً على حلم حلمته ؟

هل حصل وجاك خبر كنت سلفاً متحلم فيه ؟!


ونهاية ً ما لقيت شي أختم فيه غير مقولة الزاحف فريدريك أوغست


" أيها السادة فلنتعلم كيف نحلم "

تقديري للجميع

بقلم / شمـــــــوخ