[ الاهـداء مع التحـية للـشاعـر الاعـلامي مـحـمـد العـريعـر ]

[منصور الرويلي]

بيّض الله وجهك يارفيع المقام = بيّض الله وجهك كل وقتٍ وحين

.

.

ياشاعر الجيلين .. يامنبع الخير = (يامحمد عريعر) سليل الشهامه
أهديك نبضي في أجزال التعابير = من هاجسٍ يشبه مزون الغمامه
لا هان راسك يازبون المناعير = يا الوافي اللي ماتغيرّ نظامه
أنت الزعيم اللي يقود الطوابير = عليك من طيب الخصايل علامه
ماجيت أدوّر للخطايا معاذير ؟ = جيت بشموخ اليعُربي وأحتدامه
مالي مشاريهٍ على نافخ الكير = أشوم عن هرج القفا والملامه
الصاحب اللي غاب من دون تبرير = الله يسهل له دروب السلامه
أقول له (قدباي) ويقول (كمهير) = مليت من كثر العتب والندامه
بنات فكري مقفيات ومصادير = من الرياض الين سودة أتهامه
وأبختصر لك ياحفيد المشاهير = اليا فقد بعض الرجال أحترامه
دام الوفا مبداك كلمة وتفكير = تحفظ شموخ اللي رفيعٍ مقامه
الطيب نهجك والنوايا مغاتير = عليك من طيب الخصايل علامه
يفدونك اللي يحسبون المخاسير = يفدونك الواشين وأهل الرخامه
أبشر بعزك بالظروف المعاسير = يقولها اللي صادقٍ في كلامه
أنا القصيد اللي يهز الجماهير = سيف المعاني في يميني أحسامه
لو المعاني بالورق نزفها غير = ماتجبر الخاطر بزيف أبتسامه
مثل الكريم اليا لفوه المسايير = ماصد عن ضيفه زعيم الجهامه
له نظرةٍ تقرأ رموز الاساطير = حتى وصل بالمجد ذروة سنامه
من هيبة الفارس على سطوة الزير = في همتك ترقى على كل هامه
مواقفك تسبق هبوب التباشير = وصدق المشاعر لين يوم القيامه
شاعر حروفك غير وأطلالتك غير = أسمى المبادي عنفوان وصرامه
البوم ماينزل بوكر الصقاقير = والحر مايشبه لفرخ النعامه
يامسندي هذا زمان الهوامير = ماهو زمان المرجلة والكرامه
المصلحة تكسر قيود ومحاذير = ولاكل طيفٍ يستحق أهتمامه
صم التجارب يابعيد المشاوير = بعيون ربعك كاسبين الزعامه
هاك الغريب اللي حياته تعازير = يهل دمعه لا تذكرّ عمامه !
في موقفٍ مايوصفه كل تعبير = أقفى يناظر مابقى من أحطامه
يرسم لك الصوره على جمة البير = من طاح فيها ماتشيله عضامه
وأطلب لك المعبود وآل المقادير = يديم عزك .. ياسليل الشهامه

.

رجلن اليا ضاقت عليه أتكاله = ورجلن حياته كل أبوها فشايل
رجلن ينومس طيب فعله خواله = ورجلن يفشِل سوء فعله قبايل

.
.
.
.