ورد الاحلام

[منصور الرويلي]

عبث أهد الطين وأبنيه صلبوخ = وأزرع أمل وأحصد متاهات الاوهام
تعيش يارأسي .. معزز ومطنوخ = رغم الجروح ورغم تدليس الاقزام
لا يكسرك وقتك ولا تمسح الجوخ = وانت الوريث لقمة المجد وحسام
لك الصداره دامو أجدودك شيوخ = والشيخ ماتنكر مكانته الايام
تسكن قصر ظله تعدى على الكوخ = والكوخ ماهو مسكن الحر ضرغام
كان التواضع والبساطه من شموخ = وضعت لي بصمة على وجه الاعلام
شاعر ولا أعسّف القوافي على فروخ = فروخ الدجاج اللي عليها الصقر حام
شعورها من صدق الاحساس مسلوخ = ومشاعري عاشت نديمه للالهام
ياصاحبي ساحتك بالون منفوخ = وجمهورها غنى على رقص الاقلام
الشعر غيم وجذع الافكار شمروخ = والبوح نبض أحساس والهاجس هيام
الشعر يبقى واكثر الشعر منسوخ = ياشجرةٍ في ظلها ورد الاحلام
أبعدت عنها لا تنازل ولا رضوخ = وقربّت منها لا تراجع ولا أقدام ؟
عبث أهد الطين وأبنيه صلبوخ = وأزرع أمل وأحصد متاهات الاوهام

.
.