{{ هاجس التعبير حاضر والمشاعر تستجرّه }}

[حمد الضوّي]

أحبتي أضع بين أيديكم هذه القصيده والتي تشرفت بإلقائها
بالحفل الذي أقامه الأخ/عبدالعزيز بن عايد الجعفري العنزي .
بمناسبة زواج إبنه/ عبدالله بن عبدالعزيز الجعفري العنزي .

(( مقدمه ..... تهنئه ))

بالليله اللي كلها ونْسَه وفرحه وابتهاج=يطيب لي يوم ألتقي في كل شغموم أبلجي
سجلت تعبيرٍ عن الفرحه بعد راق المزاج=ولا لومها يوم المشاعر تستهيض وتنتجي
بحفلة رجال افخر بهم وأحطهم للرأس تاج=وحفل الرجال أمثالهم أحرص على حضوره وأجي
لـــ(عبد لله )الـــ(عبد العزيز)أقول مبروك الزواج=يا لله لعلك طيلة سنينك اتسرّ وتبهجي
وتنهل مشاريبك من الصافي ولا تشرب هماج=ولا يجيلك في حياتك ما يكيد ويزعجي
في ضل ابوك اللي عسى يبقى لكم مثل السياج=كالطود بعد الله ليا شان الزمن له تلتجي

((( القصيده )))

من هجوس الشاعر اللي لادعاها ماتغرّه=وإن طلبها تستجيب وتحضر المطلوب كله
شاعر ٍ جرّب من أحداث الزمن خيره وشرّه=واستفاد من الحياه دروس وأفكاره تدله
وهاجس التعبير حاضر والمشاعر تستجرّه=والروابع وافر ٍ مخزونها ماهي مقله
لا طلق سبوق الخيال وفرّ له بالجو فرّه=بحث عما يطرب أسماع الرجال ليا صغ(ن) له
ولا ابترم مثل المكوك اللي خبيره دق زرّه=انهمر وبل المشاعر كالمزون المستهله
وإن سبح وسط البحر جاب المحار وجاب درّه=والجواهر حال ما يبداء على الفور حضر(ن) له
الكتابه مستمره والهواجس مستمرّه=وكل ما ناسب لها تمليه والهازل تزله
جيت والجيّه على وضح النقا ماجيت غرّه=أتغانم فرصتي وأكسب لوقتي وأستغله
جيت ناجب لي ذلولٍ من خيار الجيش حرّه=ضامر ٍ متعوده للرقم الأول تستحله
جبتها لأصحابي الغالين ما جت للمكرّه=والجزيل من القصيد يزين لا من جا بحله
جابني دعوة عزيز أعيد له شكري وأكرّه=من قدر وجلال جيت مشارك ٍ ومباركٍ له
بليلة ٍ فيها نعيش أفراح وبهاج ومسرّه=والسعاده زادها شوف الوجيه المسفهله
من تعنى عبر جوْ الدار وإلاّ باج برّه=أو لفانا من قريب صدورنا تبقى محله
مرحبا مليون مره مرحبا مليار مرّه=بسم ربع ٍ يأخذون من الفخر والطيب جله
في محل ٍ فيه يدله ويتونّس من يمرّه=مجلس رجال الشكاله من جلس به مايمله
من لفا مسيار وإلا ضيف شاهد مايسرّه=والتعب ينساه ويكيّف ويلقى راحة ٍ له
ياجد التقدير والتشريف وإكرامه وبرّه=وماتبيه النفس جاه وكل مطلوبٍ حصل له
ويستدير العود الأزرق فوق جمره بعد كرّه=والبياله تستدير وقبلها فنجال دله
عند أبو فواز رمز المر جله لله درّه=لمن يجي يمه يفل الزل وحجاجه يفله
المراجل فيه مخلوقه بشخصه مستقرّه=والكرم عنده طبيعه والذرابه به جبله
متزن ماسار بدروب التنقد والتشرّه=مثل لون الشاش الأبيض ناصعه صفحة سجله
ما ذكر به من علامات الردى مثقال ذرّه=ولاهو بحاجة شهاده طيب فعله شاهد ٍ له
ياعسى فداه ناس ٍ تجمع المال وتصرّه=قاصرات أيمانهم ماتبذل المعروف لله
والله إنه يحفظه من كل مكروه ٍ يضرّه=أمدحه لنه سنافي والمدايح يستو(ن)له
أوصلتكم دعوته وحضوركم لاشك سرّه=والشرف له والفخر مادام شرفتوا محله

"""" وسلامتكم """"