إهداء .. للمدخنين ..

[عبدالله المعيوف الدهمشي]

كثير من الشعراء تغنوا بالدخان
يقول ابن شعلان
الله على مزة سبيل العراقي ... اصفر يجيك بلودة التتن مفروك

ويقول بندر بن سرور
سلط على الدخان لو هو مضري ... له حزة(ن) عند احتكام المصيبه

اما انا هنا لم اتغنى به وانما كتبت فيه قصيدة هجاء ومناسبتها :
أني كنت من المدخنين ويوم من الايام مرضت من الدخان ونويت اقطعه .. وانا جالس وتعبان ما دريت الا خويي يقول وشفيك طفشان ويمد لي الزقاره يعني بالحكي خذ دخن وروق على اساس ان الدخان يطرد الهموم فاااا حطيت الحره بالدخان وكتبت هذي القصيده ..
وهي رد على كل من اعتقد ان الدخان فيه ترويح وترفيه عن النفس وانه ينسي الهموم .. وهو بالعكس يزيد الهموم والمشاكل .

دعواتكم لكل مدخن بالهداية ..

ليت الزقارة تبعد الهم .. ياليت=وليا بغاني همي .. التتن دونه
ياناصحي تبغى لي الفود واخطيت=ذود العرب .. ما هو كذا يوردونه
ما بالتتن فود(ن) لو انك تهقويت=والناس لو به فود ما ينكرونه
يسبقك للفود الرجال الشفاليت=والا الردى .. ياعنك .. ما يقربونه
راعي الزقاره يا بدر كنه الهيت=يمشي بدرب(ن) يعلم انه مهونه
وليا مرضت من التتن ما تشافيت=يا كيف ملعون المرض يجلبونه!
ينهش بصدرك نهشة الدود للميت=ويركي على قلبك بلاوي طعونه
لا رافع(ن) هامه ولا جالب(ن) صيت=مذهب بياض الوجه .. معدم اسنونه
إليا اشربه مهموم .. زاد اللهب زيت=وليا اشربه مبسوط .. كدر عيونه
ولا ماحي(ن) هم(ن) ولا محيي(ن) ميت=يموت به حي(ن) ويحيا بدونه
ذكرت انا بعض القريبين واغضيت=عن مجلسه يوم القرايب يجونه
التتن فتت كبده الغض تفتيت=واليوم ميِّت والعرب يذكرونه
أبكي على فرقاه لا ما تباكيت=دمع(ن) تحدر من عيوني مزونه
التتن مالي به .. لو اني توازيت=مزباني اللي بالوزا يزبنونه
لو كان بي هم(ن) ليا جيت واقفيت=لي رب(ن) ارحم من مخاليق كونه
يفرج كروبي من حما كعبة البيت=يوم أبرهه ناوي يهدم اركونه
أللي ليا ضاقت عليَّه وصليت=أدعيه واطلبه الفرج والمعونه
وليا دعيته شتت الهم تشتيت=علَّام قصد الناس لو يسترونه