السلام عليكم ورحمة الله وبركاته
مشاركه بسيطه بعد طول انقطاع
ارجو ان تنال على رضى ذائقتكم
تدلل لعن ابو جد القصايد والشعر يفداك =تدلل يا بعد روح القصيد وروح من قاله
تدلل وانت ما تدري عن الي واردك يظماك =شربتك نبع لين انه سرى في دمي زلاله
تدلل لك حبيب ٍ لا طلبته ما قدر يعصاك =تدلل يا ربيع العمر يا ديمه وهمّاله
انا لولا شعوري بك حبيبي ما طلبت رضاك =ولا جت لك بنات الفكر منقيه ومختاله
بيوت ٍ لك منقيها عن النقاد والشكاك =هواجس شاعر ٍ مثل الذهب فيدين عماله
بعد ما جيتني تنثر عطورك يا غصين الراك =الا حي المكان الي جمعنا يا سعد فاله
عبير يفوح بانفاسك وعودك غار لي من فاك =بدا يعزف على اوتار الكلام وذب مواله
تشرّب وجهك بنور الصباح وفاض بمحياك =تحت ليل ٍ معنيه السواد وهمّ باذلاله
توقد جمرتينك كل ما عضيت لي بشفاك =وكنك تشعم الجمره بصدر ٍ فاحت دلاله
سجد رمشك على ورد الخدود وقلت له لباك =والا مّنك رفعته فوق غطى الورد بظلاله
بدايات البياض وآخر كفوف الترف يمناك =نهايات الحرير الي يعلّق فيك آماله
حبيبي وش تقول بعاشق ٍ صب ٍ عجز ينساك =كتب اسمك على كل الجهات وصار ترحاله
يشوفك كل ما لدت عيونه من هنا وهناك =مطر صوتك حيا صدر ٍ زمانه سبة محاله
عشقتك لين ما قلبي تركتني ولاذ يم حماك = عبيري فرحتي صبحي وريف العمر وظلاله
ولا يمكن على طول البعاد وغيبتي بجفاك=يمر الوقت ما اتغيّر ولو غيّر لي احواله