جرحي عطيب

[شــامخ]

بسم الله الرحمن الرحيم


اخواني اعضاء منتدى الويلان


السلام عليكم ورحمة الله وبركاته


اغيب عنكم واعود وأجد الكثير من التغيرات التي تجذب الانتباه من جمالها وتميزها

ويعلم الله ان احلى ماعلى قلبي اني اجتمع معكم في هذا المكان ولكن الظروف الخارجه عن

ارادتي حالت بيني وبين هذا الشي,, ولكم في نفسي من الحب والتقدير مالايعلم فيه الا الله

رجعت اليكم ولا اعلم متى اغادركم

وانتهز هذه الفرصه لاضع هذا النص المتواضع بين ايديكم

كتبت هذه الابيات لابن عمي محمد في كندا وانقطعت اخباره فتره واتمنى ان تنال على بعض من استحسانكم

سلام ياللي جدد البعد طاريه = سلام ياللي مالفا منه مرسال
هاض الخفوق وصاحلي الشعر لبيه = وجريتلك من خافي الحزن موال
انشد عن ((محمد)) عسى الله يهديه = يومه مشى والحال عقبه مهو حال
يخيللي زوله ومشية خطاويه = يومه يودعني يبا الغرب رحال
عزاه ياقلبٍ عظيمه بلاويه = وعزاه يادمعٍ على الخد همال
جرحي عطيب ولا حصل من يداويه = ومعاد لي حيله وانا شلون ابحتال
لو هو نساني ماني والله ناسيه = ولاهو يشككني به القيل والقال
البعد طول واتعبتني حراويه = وانا اشهد ان البعد ياصاح قتال
والهم عقبك يانديمي مخاويه = في غيبتك خوة معاميل ودلال
مره يقهويني ومرات اقهويه = ورشفت انا من دلة الهم فنجال
وقمت اتذكر ماضي العمر واطويه = واذكر زمانٍ يوم كنا به اطفال
خابره من صغره بعيده هقاويه = حرن ولاينزل على كل منزال
حرن على روس النوايف مراسيه = ولايلتقى مثله على مر الاجيال
من عقبكم وين الفرح وين اثبيه؟ = زال الفرح ياصاح من ضيقة البال
ارفق بعودٍ دمع عينه يداريه = وارحم عجوزٍ علقت فيك الامال
وا تل قلبي تلةٍ من عراويه = لامن نشدني عنه العم والخال
واراعي انجوم السما دوم وارجيه = ياسهيل عطني علمه اليوم بالحال
هو نايمٍ والا عنا البعد مصحيه = متعافيٍ والا به الوقت ميال
قلي علامه قلي ياسهيل وش فيه؟ = مامن رساله ولابها دق جوال
هذا كلامي وحطه اليوم بايديه = عله يجينا منًه اليوم مرسال

وسلامتـــكم واعذروني على القصور



تحياتي ودمت بكل خير




اخـــوكم/ شــامخ