إلى ضحكتي تضحك الانس والجان=وإلى زعلتي يزعـل الكون كـلـه
يادرةٍ عـزة عـلى كـل الاثمـان=بالوصف عن كل الدرر مستقـلـه
يافرحـةٍ تبسمـت بين الاحـزان=يافـرجةٍ بين الشدايد امـطـلـه
ياكـف شهـمٍ مدها يم غـرقـان=باخر رمق من تحت الامواج تلـه
ياجرعةٍ عـذبه على حلق عطشان=امن الضما عجزت اعظامه تشلـه
ياضوح برقٍ لاح بعـيـون بدوان=تباشـروا عقب السنين المغـلـه
يانشوة الصحـه على جسم وجعان=اربـع سنينٍ ثاويٍ فـي محـلـه
يالذة الغفـوه على عين نعـسـان=مـره تغم العيـن ومـره تفلـه
يادمعـة التوبه على خـد ندمـان=تحدرت يومٍ سمع خـف مـن الله
يافيضةٍ عشبه غدى اشكال والوان=بالسدر عن شمس الظهر مستظله
يانسمـةٍ تسللت بين الاغـصـان=ياوردةٍ مـن شـمـهـا مايملـه
صرتي ورب البيت للزين عـنوان=كنك شعاع الشمس والناس ظلـه
لو قسموا زينك على كل الاقـران=كـفى وفاض ومابقي شَيَنْ لـَلـْه
ماهمني غيرك من العالم انسـان=من بينهم وسط الحشا مستحـلـه
يارب سهـل دربها وين ما كـان=وخل الحياة بوجهها مسفـهـلـه
يارب وفـقـها على كل ميـدان=يارب لاتجعـل حياتـه مـمـلـه
أعيذها بالله من كـل شيـطـان=واعيذها من كل نفـسٍ مـظٌـلـه
أستغفر الله واحمده عالي الشآن=إن شاء .. يغـفـر كل ذنبٍ وزلـه
احمد بن عبدالرحمن العريفي
(نديم المجره)
29/09/10, (06:46 PM)
الانس و الجان.......
العرض الشجري