الوايلي بندر نهاية مطافي

[المطرفي]

السلام عليكم ورحمة الله وبركاته


اتشرف بأن تكون هذه القصيده مسنده للشاعر / بندر المطرفي

يالله يا منشي المزون المزابير = يافارق(ن) مابين برد(ن) ودافي
يالواحد المعبود يارازق الطير = يا عالم بسر الامور الخوافي
يامرسل(ن) مرسول بين لنا الخير = واللي يبي يشقا لدربه يعافي
بسمك نظمت القاف نظم النواوير = يوم(ن) خلي البال داله وغافي
ماله شقا ياكود عد الدنانير = وحنا نجر الصوت وسط الفيافي
على الذي قرنه لساقه تقل سير = واليا انتثر متنه عسير(ن) يشافي
والعين تشدا عيون حدب المناقير = والخد مثل الورد والوجه صافي
متقوس حجاجه سوات الشناكير = عود القصب عوده وللخصر جافي
صفوا ثمان جنود باربع طوابير = في مبسم كالجمر للجند ضافي
طيفه لفا يضحك وزف التباشير = يقول يالعاشق حذاري تخافي
يحرم على روحي بدالك من الغير = اعلنتها بالصوت والحلف كافي
قم يانديبي فوق صافي المواسير = من شركته توه جديد(ن) يشافي
جمس يبوج الدار مثل الاعاصير = يرسي لون الخط فيه انعطافي
اسود مصخر لاسود القار تصخير = وليا انطلق عسر المواتر تطافي
ملفاك ابن فرحان ريف المسايير = الوايلي بندر نهاية مطافي
قله بوسط القلب عشرة مواطير = متكاتفه مايوم قالت عوافي
وشدن على العشره ثلاثة جنازير = باسبابهن عقلي بدابه خفافي
تمت وختم القاف بأحلى التعابير = منساه لو تسفي علي السوافي

والمعذره على الانقطاع الحاصل لظروف دراسيه