*** حمــــامـــات الاربـــــــاش ***

[سالم صالح]

متواضعة ترتمي بين احضان ذائقتكم الرائعة لتجد في قلوبكم الطاهرة مقر

اتت اليه وارجوا ان تصل اليه ؟؟؟؟؟؟

وحيد من بعدك واحس اني انداش=من يوم تطري لي هذيك المطاريش
حتى بعيني زولكم وسطها عاش=يمر طيفك كل مافقت ويعيش
اشوف دمعي ينزل لخدي رشاش=منك يزود وحالته صابها الطيش
سبت رحيلك ارضنا وضعها ماش=صارت يباس عروقها لك معاطيش
الغصن مات وباقي اوراقه هشاش=تسمع صفير البعد ياوقتنا ليش
هذا خفوقي تربته قاعها ناش= ماغير قصرك ثابتٍ مابعد نيش
ماهزه رياح البطا خوف وارعاش=وماصدع ركونه رعودٍ مراعيش
فوق الفواد ومنزلك منزل الباش=فكري حرسك وشعلة احساسي الجيش
حب وغلا من لحم دمي لك فراش=يهدنك نبضي من معزتك بشويش
حتى مواطي حبك الذرب بالجاش=على رمال القلب صارت مناقيش
تكتب حروف اسمك على صفحة قماش=دمي حبر وضلوعي العوج لك ريش
ياللي غيابك هم وطيوره تحاش=على مدى قلبي جروح ومناتيش
عود يعود الباذر وصيفنا انحاش=وتتفتح زهور الفرح بك مفاريش
وتشوف مع دربك حمامات الارباش=هديلها لرجوكم له لواليش
والعشب الاخضر يبتسم حول الاحواش=وحتى عناقيد الوله لك دناديش
يعني حياة تعود في لحظة ارماش=تدري وصالك ياهنا حبنا ويش
وصلك ربيع ونسمة انفاسك انعاش=والا غيابك موحشٍ دابه يهيش

الارباش = نوع من انواع الحمام الجميل ذو الالوان الرائعة والمتناسقة
وسلامتكم-----