الحياة افراح واحزاااااان

[معيض بن عريفج]

ياصباح الخير يااحلى صباحٍ بالوجود = ياصباح الورد والفل وانسام العبير
يابراءات الطفوله بالاعين والخدود = ويافرح امٍ تبسم لها الطفل الصغير
وكل ذو نعمه من الله مع الناس محسود =وانت غير الناس والناس غيرك وانت غير
الله اعطى الناس حد وعطاك بلاحدود =وان عطاهم خير انته عطا لك شي اخير
لا تواخذني لياباحت اسرار السدود = ضايقٍ بالي وضيق علي من العصير
وصرت محتاجك حبيبي وتمنعني قيود = وصرت ادور بدائره مغلقه مثل الاسير
ان بغيت اوصل العلم لك جاني برود = وثم خفت وجيت راجع الى حر السعير
والحيا والحب وسط الحشا مثل البارود = وانفجر قلبي وانا بين اقول او استخير
والقلوب الله يسلمك بالخافي شهود =وانت وسط القلب شيدت بيتك بالضمير
وكل يوم وحبك بقلبي من حبك يزود = لين صرت بقلبه ودمه ووسط النظير
كان عقلي ماسكٍ قلبي وكلي صمود = وراح قلبي وتبعه عقلي وجيتك مغير
جيت مثل الأعزل اللي احاطوه الجنود = جيت مستسلم ورافع يديه للأخير
مامعي الا قلب واحد وراح بمايجود = ليت لي قلبين وان راح حطيت الاسبير
ترني احساس ومشاعر ولااحتمل الصدود = والغلا والولف يقضي على قلب البعير
وللعيون الناعسه تضرب الارض الأسود = والأسد يسلم الأمر لو هو له زئير
استلمني طالما اني على رضاك محدود = الغلا اللي حدني والغلا شرٍ شرير
تعشق الغزلان غيري وانا احب العنود = والغلا ـ يالعن ابو حي حي اصله ـ خطير
ايه تستاهل محبتك يالغرو والودود = وابشر اني معك جعله يصير اللي يصير
ارق بي وارقابك ارقابك ارقابك سنود = لوتبينا نطير يم السما سم ونطير
حطني بالظل والشمس واهجها يكود = ودفني بالبرد يوم الهوا جا له صفير
ياعريب الفرع والساس وجذور الجدود = لاتوديني بحبك الى سوء المصير
شوف لي حل بحياتي ترا همومي وفود = كان عندك هم واحد معي جمعٍ غفير
والحياة افراح واحزان واخرها اللحود = يالله انك تشفي الجرح والعظم الكسير
فلها لازان وقتك ترا العمر محدود = واحتزم لاجاك يومٍ عبوسٍ قمطرير