عيدية نوووف !! قصيده خااااصه جدا

[مصلح النشمي]

.



الشاعر مقبل العنزي او ابوثامر كما يحلو له الكتابه يشاركنا في هذه القصيده

وتراه اخوي طالع علي ((المشكله هو اكبر مني هههههه

طبعا هو استاذي وانا تعلمت على يده الكثير

جاني يقول العشق حاله براها = نظره وصاب القلب منها هبلها
خلا النصيحه يوم عينه عماها = يبي يخف هموم روحه دبلها
الجمره اللي رغت عنها وطاها = وامسى يعاني حرها ما احتملها
لا تشتكيلي نظرتك مبتداها = خايف يكون بمبتداها اجلها
ذكرتني ياخوي نوف وشقاها = هيضتني وهالحين فكري وصلها
عيني قبل مثلك وما جاك جاها = العام الاول يوم ربي حولها
قامت صباح العيد على عماها = تمشي ورى المجهول رجلي عجلها
يسوقها الخالق ويدري بداها = مقسوم اشوف اللي زماني جهلها
لمحتها تجلس واخوها وراها = تلبس قديم ثياب جسمه خزلها
وهناك شايب في فراشه قداها = اضنه ابوها وعارف وش عللها
تبكي وبكاها بصمت زود حلاها = ملعون ابوها كيف يرضى زعلها
وفي ملثم أسود تغطي شفاها = وادري ورى الملثم تغطي عسلها
ماحطت المكياج ربي عطاها = وعيونها الرحمن منها كحلها
اشبه بشمس الصبح اول سناها = مطلع جبينه غرته مافتلها
حتى الصغيّر صاح يطلب رضاها = (يلتغ) اذا قال الحروف بعجلها
مدري شلون ابدى كلامي معاها = حتى اسلوبي ضاع في معتزلها
عيدك مبارك قلت والحقت آهــا = ليه العيون الحور زايد هملها
حقوقك يابنت البادية من خذاها = تكلمي ياهنووووه يكفى خجلها
وصـدت وانعاس العين أو هو حياها = مدري ثقيل الرمش جفنه هدلها
تكلمت ومن انت حتى تباها = وش دخلك لا تسألن في جدلها
قلت ابن وايل صاحبك في صداها = انا عنزي يابنت روحه بذلها
وردت خلف ميتي مواريد ماها = ونعم هل الطولات وايل نسلها
معاك الشمريه نوف هذا ضناها = والشايب اللي هناك يطلع رجلها
تقول ابويه ظالم في قضاها = وانا يتيمة ام وين احتملها
وادعتها والعين هليت ماها = ونفسي ثقيل الياس ضيع أملها
هذي عيدية نوف في منتهاها = ياليتني ما شفت نوف وعملها