صفــــــــوة النخـــــــــــبه...........

[حمد الوايلي]

لاتهقوى هاجسي جبت الجـداد
من معاني صافيه جبت الجديـد
مايرد اللي طرى غير المـراد
ومايعبر فكرتي غيـر القصيـد
صفوة النخبه ولاهـو بالـرداد
في خيال الفكر يبحربـك بعيـد
أستمع واللي يفوتـك مايعـاد
ركـز بعقلـك ودور مايفـيـد
أمعه يتبـع مساريـب الجـراد
وأنتهى في غبة الجهل العنيـد
مايشوف ألا بياضن مع سـواد
مايجيب العلم والراي السديـد
في حياته ماعرف بني العمـاد
مايتطور دايـم بوضعـه يعيـد
والعقل أذا غلب فيـه الرقـاد
علته علـه ولايجيـب المفيـد
والعقول أنواع فيها من عتـاد
مايكفي حرب باليـوم الشديـد
مـن يفعلهـا بعلمـه زاد زاد
وبه يغير كـل حاجـه ماتفيـد
كل ماتبذل عمل يبقى اجتهـاد
ينحسب لك وأنت تطمع بالمزيد
ومن يحسدك ينفخ بوجهك رماد
مايضرك بأذن خـلاق العبيـد
اجتهـد لله والدنيـا جـهـاد
دام ودك تصبح أنسانن سعيـد
مثل زرع الزرع يبغاله سمـاد
أخلص النيه وينتج لك حصيـد
والحساب أيكون في يوم التناد
يوم حق الحق في يوم الوعيـد