مراتع الشوق ...

[أبو غرام]

رائعه للشاعر : أحمد خليف الحربي




أتمنىّ أن تتسع صدوركم

وأن نحوز على رضاكم

للجميع مني

كل تقدير واحترام
.........


مراتع الشوق

يحتار فكري وانا دايم على النية=فالكلمة اللي تقال بعكس معناها
الواقع احلام والاحلام وردية=سحابة الصيف ما تسقيك من ماها
في درب الاصحاب كم تعبت رجليه=أدور اعلى قمم للعز وارقاها
ولقيت واحد وادور واحد زيه=بمواصفات الصديق اللي طلبناها
أما يجي صاحبي ميه على ميه=ولا المناقيص يوم العيد فرقاها
والكامل الله وخلق الكون ماريه=والذنب والعذر لآدمها حواها
والفكر رجال والافكار طرقيه=والشعر لبّ الشعور ونوح ورقاها
يارب جنبني عيون الحرامية=باستعرض الذاكرة من خوف لاانساها
من عقب ماقّفلت بارقام سريه=اليوم قررت افك القفل واقراها
تهدى جنوني ليا استعرضت ماضيه=ليالي الشوق جلستها وقمراها
مراتع الشوق يوم قلوبنا حيه=مايقدر الشك يتجرأ وياطاها
منابع الصدق فيها والشفافيه=لوتشرب امة محمد منه كفّاها
ينبت على الجال نعناع ومراميه=وتندي عروقه ليامرت وحياها
ياحي ذكر الحبيب ونعنبو حيه=عزالله انه يحّد النفس لاقصاها
لاقلت انا ابغاك في حاجة ضروريه=دوّر له اعذار ما تمشي ومشّاها
ولااحترت الشمس كلٍ دور الفّيه=وليلات نصف الشهر يازين مسراها
اليا اكتمل بدرها هبّت شماليه=واستعطفت عطرها والوان حناها
الطيف ضيف بمكان من الأهميه=ولا ينزل من القلوب الا سويداها
علمني الحب واشكال الفدائية=وكل المحبين صّنفها وسمّاها
وسقت الخطى في طريق العشق عبريه=وصارت قضية هواي اعقد قضاياها
ورحت اشتكي بس من يسمع شكاويّه=كل العرب ضايقة بهموم ليلاها
في كل نسمة هوى حالة جنائيه=ناسٍ تحسب الهوى ناقة تمطاها
وناس يسوطونها مثل الملوخيه=اطرافها تحترق ماجاد جّواها
وحنا رسمنا لها لوحات فنيه=وابيات لاضاق صدر الشوق غناها
حب الشرف نور فوجيه الحياويه=ناسٍ لها حدود ماتقدر تعداها
(وياعين موليتي ياعـــين موليه)=وليامتى وانت ياقلبي تحراها
حرام تخسر ثمان سنين هجريه=يمديك حررت بيت القدس لولاها !
راحت . . ولا جبت لاهذي ولاذيه=شوف الزمن كيف خادعني وسواها
والناس للناس والدورات عكسيه=حتى البهايم تحب تعيش دنياها
ماكل رجال وقفاته بطوليه=ولايشبه اصل الوجيه الامراياها
ولولا غلاء الأصل ماانباعت تجاريه=لاحدنا الوقت رحنا واشتريناها
أنقاض وامراضٍ اكثرها وراثيه=يارب تاخذ دكاترها ومرضاها
مافيه أطباء بدون أخطاء طبيه=والعافية كاسيتنا ونتمناها
وكل يبي روح له روحه بلاجيه=وينشد عن آخر فريضة كيف صلاها
ماغادر الله لاحسنة ولا سيه=أعمالك اللي عملت . . هناك تلقاها
أحدٍ غلبه النعاس بحضن حوريه=وأحدٍ جهنم تحضنته شظاياها
يارب رحمتك لاضاعت هقاويّه=وكل الوجيه اذعنت قدام مولاها
ماعندي الا دعاك ارفع به يديه=تختار نفسي وتهديها لتقواها
أنا موحدك توحيد الألوهيه=شهادة ٍ قلتها واعرف معناها

وسلامتكم