الصمت مايذبح لو همومك جبال**شفني على الدنيا واصارع سكوتي

[سعد النفج]

لذائقتكم ..

الصمت مايذبح لو همومك جبال=شفني على الدنيا واصارع سكوتي
ما اكبر من جروحن تجي بعد الآمال=وما اقشر من اصحاب يتمنون موتي
رغم المصاعب و التعاسه والاهوال=مازعزعت كثر المواقف ثبوتي
ضلعي رسا مامال مامال مامال=وإذا سمعت الصوت ركز بصوتي
تلقى الثقه في صدر الايام تمثال=وتنبي عن أحداث الليالي بيوتي
ابيوت شعر ٍ بالفخر (مَيْلَت عقال) =ما اترك مداخلها لعين الشموتي
ما هو غرور الا لي اليوم مكيال=آرد على بير الجزاله و افوتي
و ياجمة البير ان وصلتك لي حبال=إما جزعتي والا غصبن عفوتي
ماهي عباطة شعر والاّ سعد قال=إلا بحر مليان و الحوت حوتي
جمعت طنخت شعر و شويت هبال=شاعر و لي بستان و اظهرت توتي
وياللي تحديني على ضيقت البال=وش له عنادك كل ماقلت فوتي
فوتي عسى ما لطلعت الدمع مدخال=يامعلقتني بين ضحكي و موتي
لك بالحشا من خِلقت الحب منزال=حتى لقيتك سر شربي و قوتي
لكن دخيلك قرري لحظة وصال=إما نتلاقى و الا هذا سكوتي
مهما ابتعدتي و انتهت كل الآمال=و مهما تجاهلتي ليا جاك صوتي
يكفي سؤالك عني بكل الاحوال=و يكفيني انك ما نسيتي بيوتي