(شـــ*ــمـــ*ـس الــ*ــمــ*ــحــ*ــبـــ*ـه)

[سعد النفج]

تعال و اسهِرْني و انا مثلك اسهِرْك=واسمر انا وياك مع قمرة الليل
تنظر لي بعينك و عيني تناظرك=وارواك يا راع الرموش المضاليل
ليل ِ جمعنا لا يخونه تعذرك=خل العذر ماعاد للوقت تبديل
دام اجتمعنا ليل الاحباب ينذرك=ان الفجر حد السهر و المواصيل
لكن تعال و ضمني و اتعطرك=واعلمك حتى بأدق التفاصيل
و انك قبل فرضي على البال و اذكرك=و تقطع عليّ السبحنه و التهاليل
استغفر الله و استعيذه من الشرك=و استغفره عن كل زله بها ميل
ما قصدي اني في ذنوبي اجاهرك=لكن حقيقه تتعب العقل و تهيل
حكم القدر ما بين الاهداب حاصرك=هيبة غرامك قلدتني بهاذيل
خذني على كيفك و انا ارضى بخاطرك=لو سقتني يالغالي لهدت الحيل
جعلي فدا لأمسك و يومك و باكرك=يا مدبك بخفّاقي ادباكت الخيل
جيتك معي اسماء ودي اشاورك=و اللي تبيه اختار يا شمعة الجيل
عاشقك / مغرم بك / اسيرك/ و فاجرك=مجنونك/ و مخلصك / عذب المناهيل
حبك / سعد / سعَدك / كاسرك / جابرك=قلبك / حياتك / مستحيل المداخيل
عمرك / غناتك / شاعر الحب / شاعرك=غيمك / مطرك / ومنبعك / و المخاييل
و الاّ انت سمّيتك و انا صدق خابرك=(شمس المحبه) كل ما يدمس الليل
اغليك / و اشتاقك/ و احبك / و اقدرك=و لا جيت امثل قصة العشق تمثيل
يكفي لو انك جنبي انسى و ادورك=و بين احتمالات العذر شفني آخيل
لكن وداعه لا تعذب محاجرك=المس يميني لمس ثم شدها حيل
و ارجع لدربك و انتهيبك ليا آخرك=و رحلة غرامك يا عساها تساهيل
هذي قصيدة و انت عطني خواطرك=سمّعني احساسك و زود التفاصيل