قصيده للشاعر / سعد بن جدلان..

[سعد النفج]

الا يالله عفوك لا معي بيجر ولا جوال=ولا عندي وظيفه والتجاره فاشلن فيها
ولاعندي شهاداتن ولا حرفه تسد الحال=ولا حظن كبيرن لأخطت الجره يقديها
مخابي الثوب تومي ما دخلها من زمان ريال=بها فاتورة الكهرب ولا يمديي أقضيها
على ذيك العراوي تتعب الحادي مع الجمال=ثلاث شهور فالورشه وشهرين مغطيها
ابيها لوتجمل يوم واجلبها على الدلال=يجيها واحدن حظه مثل حظي ويشريها
نصيت العسكريه يوم قالو للنظام إرجال=و قدمت الملف و صورتن متشخصن فيها
خذ الأوراق مني واحدن ما عند ابوه دلال=سلوم الناس وأهل المعرفه والطيب مخطيها
قراها في دقيقه والتفت عجلن علي وقال=شهادتك العظيمه ياولد وين انت مخفيها
هزيت الراس ما عندي تقول اني من البنقال=وقمت أحب خشمه واطلبه بالله تمشيها
حذفها من يده شين الطبيعه والنبا والفال=وقال أزين تعود صوب نوقاتك تعشيها
تناوشته من الكرسي وعفت الحل والترحال=وضربته بالبياله عقب ما بيحت شاهيها
خذوني للسجن لانيب لاظالم ولا محتال=مجرد واحدن جا يكحل عيونه فيعميها
ويومني خرجت أقفيت لارض الله وسيع الجال=على برن هواه يداوي العله ويبريها
ادور قصعة الجربوع والضب الفتى يحتال=والأرنب ياشفاة الروح محلاها وطاريها
بلا كهرب ولابيجر ولا غازن و لا نقال=قوانين الحضاره لاتبي شوفي و لا ابيها