جديد مطلق النومسي

[هبوب العنزي]

هذه قصيده الشاعر مطلق النومسي بمهرجان الشنان وهذه القصيده من جديد الشاعر ,,,





هب الهوى واتعب هوى مرسولـه
والشعر ما بـل الصـدر هملولـه
يبرق شمـال وبارقـه يزعجنـي
وليا انزعجـت اطاولـه واطولـه
لي وقت ما غنيـت يـا سامعنـي
علـة ولاهـي علـة مجهـولـه
شعّار هـذا والوقـت يـا كافينـا
ما هيـب عمـا تفعلـه مسؤولـه
قلـة أدب علـى تبجـح زايــد
على حركـات مـا هـي مقبولـه
منهم من يمـاري بغمـزة عينـه
وإن زاد قـام يمـاري بمجدولـه
ما باقي إلا يقول أنا مثـل اختـي
واقـول عفيـه جهـزوا مريولـه
ومنهم من يهابد ويرفـع صوتـه
وإن صاح وهبّيل العرب صاحولـه
ينقز على الكرسي وهي تنقز لـه
مهبول وافق لـه بشـر مهبولـه
ومنهم من يكابر علـى ديـن الله
والدين عنـده مشكلـة محلولـه
أقول شف مكـه وشـوف محمـد
يقول شف عيسى وشف معلولـه
وإن قلت ويش الغـول بيجاوبنـي
الغول أبوه الغـول وامـه غولـه
ومع ذلك استثنـي فئـة محـدوده
فئة لهـا صولـة إبـداع وجولـه
كرهت شعر النظـم مـع شعّـاره
وفضلت أعيش بساحـة معزولـه
لكن بعد ما وصولـو لـي دعـوة
مـن ديـرةٍ بالمرجلـة مأهولـه
حلفت لا أجيهـا شعـر واغنـي
بالصوت وإن وصل الصدى فزوله
دار الطنايـا حـي هـاك اللابـة
قبيلـةٍ علـى الكـرم مجبـولـه
شمر وشعـر مـا يفـوز بشمـر
خسارتـه مضمونـة ومدبـولـه
إي والله أمدحهم واخلـد شعـري
فيهـم وأكـرر بنيتـه واقـولـه
قوم لهم سمعة وصيـتٍ ضـارب
مـا هيـب والله كلمـةٍ معسولـه
هذا الصحيح وكـل حـيٍ يشهـد
كلمة نعم بيـن العـرب منقولـه
وشمر لو إني ما أعرف مسكنهـا
من صيتها لأقـول شمـر دولـه
أسمع ذكر سلمى مع أهـل الاردن
واسمع ذكر سلمى مع أهل اليولـه
وسلمى جبل مثل الجبال الأخـرى
مجمع حصى مار الحصى من حوله
حوله الاسلم ورفعوا مـن شانـه
لين اشتهر بين العـرب بفعولـه
أهـل اللحيسـه متعبيـن القـرح
المـوت هـذا عندهـم تعلـولـه
حماية البـل فـي نهـار الغـاره
لا ثـوّرت والحـرب دق طبولـه
يا عنك ما يفلح خصيـم الاسلـم
إن كان الاسلـم كلهـم لفـو لـه
طنياتهم صـارت علامـة جـوده
شمـر طنايـا كلـمـةٍ مقيـولـه
والنعـم يـا شمـر ولا تكفيـكـم
ما هـو جزاكـم كلمـةٍ مدهولـه
وأنا من اللي لا غزاهـا الغـازي
تجيه بالمـوت الحمـر مسطولـه
ربعي بني وايـل ركـون القمـة
والكـل منهـم قـمـةٍ مأمـولـه
وصلتكـم ضيـف بعبـاة معـزب
ومشوار ماهو يمكم وشهـو لـه
سـلام يالاسلـم سـلامٍ حـالـي
وألـذ مـن تعسيلـة القيلـولـه
باعيـد مـا قلتـه قـبـل وارده
مشوار مـا هـو يمكـم وشولـه




الشاعر مطلق النومسي