بــنــود الــصــداقــه

[منصور الجلعود]

بسم الله الرحمن الرحيم
السلام عليكم ورحمة الله وبركاته

اليكم هذا النص المتواضع على أمل أن ينال استحسانكم:

أدنيت عدوانك وباعدت مغليك=مدري جهل ولا غرور وحماقه
وش فيك يابن الناس وش جاك وش فيك=صداقت الأنذال ماهي لباقه
من صادقك للهون للهون يرديك=يرديك لو زانت معاه العلاقه
اللي عن الطاعات والخير يلهيك=ان طعتني اذبح لفرقاه ناقه
واللي يجرك للردى والتهاليك=ان طعتني جره ونشف رياقه
واللي يبي قلوب الخلايق تعاديك=ان طعتني عاده وقطّع وثاقه
واللي حكا بغيرك وهو حاكي ٍ فيك=ان طعتني تركه لمثلك وفاقه
واللي يتضيمى لجل يشرب من يديك=ان طعتني حرم عليه الذواقه
واللي يتميلح لك واذا غبت يهجيك=ان طعت شوري لاتمالح مذاقه
واللي يتضيحك لك واذا رحت يشنيك=ان طعت شوري ابتعد عن نطاقه
واللي يبي يوذيك بالدين ويجفيك=ان طعت شوري لاتِسّلفه طاقه
واللي يبي بدرب الكفالات يرميك=ان طعت شوري لاتطيح بزلاقه
واللي يبي يخشرك بالنوق ويشكيك=ان طعت شوري لاتخاشر نياقه
واللي نواك بسو ماهو مصافيك=اما جزاك بسو ولا بعاقه
الحر يبقا حر مافيه تشكيك=والتبع تبع ولا يغرك نفاقه
يافلان جاك النصح من قلب يغليك=نصيحت محب ٍ بقلبه شفاقه
خذها قبل تصعب عليك المساليك=من صادق ٍ يبغا عدوك فراقه
ولابد ما سود الليالي تمسيك=وتذكر كلامي عن بنود الصداقه
وآخر كلامي ياعسا الله يهديك=النصح لامن فات صعب ٍ لحاقه

,