قصيدة الشاعر عايد الشمري في مدح عنزة .. ورد الشاعر حسين البليهي ..

[أبو فهاد]

بسم الله الرحمن الرحيم
السلام عليكم ورحمة الله وبركاته

احب ان اورد لكم هذه القصيد
للشاعر / عايد الشمري
وهي مدح لقبيلة عنزة

والقصيدة رائعة بالفعل

وهي مسندة لحسين البليهي العنزي



فإليكم القصيدة







يعني على قولة هل العرف ياحسيـن
******لاخيـر فـي رجـلٍ بليـا جمـاعـه
ولانـي ولـدت بـدار فكاكـة الديـن
******اهل الكرم والطيب واهـل الشجاعـه
ويلان لا وردو على المـوت عجليـن
******فيهـم علـى ورد المنايـا بتـاعـه
الطيبـيـن الطاهـريـن النقـيـيـن
******الخيـريـن الصادقـيـن السبـاعـه
موفين حق الجـار بالطيـب والليـن
******للجار فـي قـرب النشامـا مناعـه
معهم سليت ورحت بالمذهـب الزيـن
******راحت معاهم حفنـة سنيـن ساعـه
ثلثيـن عمـري راح يـا وي ثلثيـن
******مايـوم جتنـي العايلـه واللكـاعـه
صاروا لي الطف من غطا الجفن للعين
******وارق من حكـي الحديـث بشفاعـه
تحس في قـرب الرجـال المياميـن
******انك اخو من ((دم)) ولا ((رضاعـه))
حمّاية الوضحا مـن اللـي مغيريـن
******لاوين مـن طالـت عليهـم ذراعـه
واجب علي اذكـر فعـول الكريميـن
******اللي شروا كسب المراجـل بضاعـه
مدامنـي وافـي واحـب الوفيـيـن
******وقناعتـي فيهـم تفـوق القنـاعـه
لازم علـيّ اعـد فعـل الحشيميـن
******واترك حديـث الناكسـه والرعاعـه
اترك علوم عفون الاشـوار مهفيـن
******حـق الرجـال الطاهـره بالشناعـه
نقالة الحكـي الملفـق علـى ويـن
******بالهون ياهـل الواطيـه والبشاعـه
ياحسيـن ماتوخـذ قبيلـه بخبلّـيـن
******مادامهـم مـا يـوم جابـو قلاعـه
دحوش الرجـال مقابليـن النساويـن
******اهل الحكي والكذب واهـل الخناعـه
وياحسين قالوا في حديـث القديميـن
******تحشم كـلاب القـوم رغـم الدناعـه
وانـا لـك الله ماسمعـت المقفـيـن
******واللي مشا لـي بـاع دبلّـت باعـه
مايرخـص الغاليـن فعـل الردييـن
******راعه بقلبـي حـب الاجـواد راعـه
ياحسين جيت ونبض كـل الشراييـن
******حب عنزه باعلـى عوالـي رفاعـه
ولاتحسبنـي جيـت لانـي مسيكيـن
******ولا سـلايـل دافعـيـن الرتـاعـه
جيتك ولد مـن روس ربـعٍ عريبيـن
******شبـوب نـارٍ عـالـي بانـدلاعـه
انـا سـلايـل لابــة بالملايـيـن
******بالضبـط امـه كاملـه باتسـاعـه
شمر على عرش المراجـل سلاطيـن
******اسياد عرش الطيب من فـوق قاعـه
ان جت على الفزعات نعمك ونعميـن
******وان جت على المده تموت المجاعـه
ولا جت على وصل الرحـم للقريبيـن
******اقسـم قسـم مـا بالطنايـا قطاعـه
الحاصل ان القلـب مابيـن عرقيـن
******متساويـات بنبضـهـن واندفـاعـه
عرق النسب واسم الطنايا العزيزيـن
******وعرقٍ مع الويلان صعـب انقطاعـه
وامنت في قـول الرجـال الحكيميـن
******مربى الولد يغلب على الاصل طاعـه
ياحسين واللي نـزل الطـور والتيـن
******واللي هدى الانسـان فـن الزراعـه
ماقلتها ياحسين واقصـد بهـا شيـن
******غير الثنـا بالطيـب مامـن طماعـه
حبي لكم ياحسين اصـل المضاميـن
******ومداد حرفٍي مـع سنـاه وشعاعـه
حـرف كتبتـه ورد فـل ورياحـيـن
******وياليت كـل النـاس تقـدر سماعـه
وربـي لرددهـا بـكـل الميـاديـن
******ولو لي بعد قـدره نصيـت الاذاعـه
لاني وفـي عشّـاق طبـع الوفييـن
******وقناعتـي فيكـم تفـوق القنـاعـه
وختامها بالـورد والعطـر ياحسيـن
******مني لكـم ياهـل الوفـا يالجماعـه



وقد رد الشاعر حسين البليهي العنزي على القصيدة:


أصالة عن نفسي ونيابةً عن عنزه ردا على الأخ عايدالشمري




الحمد للي جمّع الناس بالدين
*********عقب التشرذم والفقر والمجاعة
توحدوا بالصف جمع المصلين
*********شعارهم يارب سمعاً وطاعة
صارت قضيتهم قضية فلسطين
*********عقب المغازي بينهم والقطاعة
وتوزعوا شبابهم بالميادين
*********وتعلموا خط القلم والطباعة

وعقب السراحة بالغنم والبعارين
*********توجهوا للمكتبة والصناعة
ياصاحبي ياقاطف الخوخ والتين
*********قصيدتك ديوان يطرب سماعه
ديوان لاوالله ثلاثة دواوين
*********وين الجرايد عنّها والإذاعة
لا يا بعد شعر الخكر والنساوين
*********شعر الركاكة والدلع والمياعة
ياشين مبطي قلت لك جنّب حسين
*********متولّجه من جوف كل الجماعة
تسندله بيوتٍ تعادل ملايين
*********فيها الجزالة والحكم والبراعة
وحسين ماهو ذاخرٍ بالشعر شين
*********لكن معاك تْجف غيمة يراعه
جيتك نيابة عن جبل والسلاطين
*********وسلقا الرجولة والسطر والشجاعة
وضنا بشر وعبيد والربع الادنين
*********وكل عنزيٍّ مقتنع بي قناعة
ربعٍ لك الله للطويلة سريعين
*********وعن الردية كن فيهم هكاعة
ليارضوا عد المخاليق راضين
*********وليازعلوا يستنكر الرجل قاعه
يقلّطون الضيف وسط الشرايين
*********ويحظفلونه( 1)لين يطلق شراعه
مع النشامى والحبايب حبيبين
*********وملكعين ان كانها باللكاعة
نخوني الويلان ردّادة الدين
*********قالوا لي اروج رد في ظرف ساعة
قلت ابشروا بالغاط مثني ابيتين
*********والله لجيب البدر واخطف شعاعه
الشعر هذا لعبةٍ لي من سنين
*********يمكن شربته من سنين الرضاعة
يالشمري قلّط وَسَط محجر العين
*********لانك ليا حليت زاد اتساعه
ابك انت من ربعٍ حشامٍ عريبين
*********رديهم لوط الطلي من طباعه
يوم انها طلقة و رمح ونياشين
*********الشمري مليان راسه بتاعه
نعمن بهم من كربلا لآخر الصين
*********يفدونهم ربع الردى والرعاعة
زهيّد فوق الجو مثل الشياهين
*********وبالارض تحسبهم نمور وسباعة
ياالشمري لاتستمع للشياطين
*********سماعهم للوقت هدْر وإضاعة
العفن حتى لوهو مْن القريبين
*********ماظنتي ترجي وراه الطماعة
اصبر عليه وداره وعامله زين
*********لاتقابله ياعزوتي بالشناعة
وان مانفع ياالقرم بالطيب واللين
*********الحل عندي تعتجل في وداعه
ماالله موازي تختلط بالرديين
*********والارض فيها ياالبناخي وساعه

احسنت ماتوخذ قبيلة بشخصين
*********بغض النظر شجعان والاضباعة
والآدمي ماودك يطلّع الشَين
*********وتكرم لجل لحية ديار وجماعة

والناس فيهم مروحين وكريمين
*********وكفك مهن متساوياتٍ صباعه
والناس من آدم وابونا من الطين
*********وترى البخيت اللي ينال الشفاعة
شفاعة المختار سيد النبيين
*********ومَنْ حوضه يشرب شربةٍ من ذراعه
صلى عليه اللي جمعنا على الدين
*********عقب التشرذم والفقر والمجاعة
عداد شمروعنزه والقحاطين
*********وعداد ماراج الكذب والإشاعة
وعداد ماصفوا جموع المصلين
*********شعارهم يارب سمعاً وطاعة






1/أي يهتمون به


م

ن


ق


و


ل