بمناسبة زيارة الشيخ جابر الخليفة

[ابو البدر]

بمناسبة زيارة الشيخ جابر آل خليفة للمنطقة الشمالية والألتقاء بشيوخ واعيان وابناء قبيلة عنزة ,

أضع بين ايديكم احد القصائد التي كتبت في هذه المناسبة للشاعر / عيد البطحي البجيدي العنزي ,

في دار مروين السيوف الرهيفه=الحاكمين العادلين العزيزين
في دار حامين الديار الشريفه=الي لهم بالعز بيض العناوين
بديارهم حييت يا ابن الخليفه=يا ابن الكرام المكرمين الكريمين
الكل منا معتبرك انت ضيفه=ووده يشيلك فوق راسه وبالعين
متقاسمين ٍ حبكم بالنصيفه=وكل ٍيقول أهلين وأهلين وأهلين
ماهو بترحيب الحليف بحليفه=ترحيب في غالي لفى عند غالين
يا مرحبا بك عد ما اطلق رفيفه=على سمان الصيد فرخ الشياهين
واعداد ما خطوه فوق الصحيفه=حرف يعبر عن شعور المودين
ودي لك افرش كل قاع ٍنظيفه=ورد ٍ الين القاع تصبح بساتين
وودي لك اكتب كل بيت ورديفه=حتىيصير الشعر فيكم دواوين
وودي لك اهدي كل تاج ووصيفه=حتى يصير التاج يا شيخ تاجين
وودي لك اذبح كل جزل ووليفه=وودي تنورنا عن اليوم عامين
بضيافة اهل الطيب بيته وريفه=ويلان والويلان دايم قويين
بصفوفهم ما صف خطوى الهديفه=حكام وشيوخ وشعوب وسلاطين
يا أهل الفخر يا أهل البيوت المنيفه=يا أهل الشجاعه يا كعام المعادين
أنتم لشيخ الدار درعه وسيفه=وانتم سند يا شيخ باالعسر واللين
وانتم ذرى المحتاج ستر العفيفه=سيوف حق وعادلين الموازين
حكام من حكام ماهي ضعيفه=عدوكم يجرع من المر والبين
ومن كان مثلي كان ماهو بكيفه=لام يعبر عن شعوره ببيتن
وإن كان ما يدرك وصوف الخليفه=يقول عرعر صارت اليوم بحرين