قصيده لسمو الامير \ عبدالرحمن بن عبدالله آل سعود ويمدح بها ربعه عنزه

[سعوط المجانين]

السلام عليكم ورحمة الله وبركاته

اسعد الله اوقاتكم بكل خير

قصيده للشاعر سمو الامير \ عبدالرحمن بن عبدالله بن عبدالرحمن آل سعود نشرت بمجلة المختلف

في العدد 182 في شهر سبتمبر 2006 م بعنوان جميل المثايل واليكم هذه القصيده التي فيها من

الحكمه الشيء الكثير والثناء لربعه عنزه

يقـول مـن يبـدع جميـل المثايـل = مثايل ٍ عذبـه .. نقيـه .. مصفـات
يقولهـا مـن عرفـه ان الاوايــل = مابقـو لتاليهـم امـور ٍ مصـفـات
يقولهـا ينصـح عـيـال الحمـايـل = للي لهـم زينـات الافعـال عـادات
ينصح بهـا اهـل المـدن والقبايـل = لعل فيها لراعـي العـرف عبـرات
العاقـل اللـي يعـرف ان التحايـل = مافيـه لـه فـود ٍ ولا فيـه نفعـات
العاقـل اللـي يعـرف ان الحبايـل = تصيـد حابلهـا وتسقيـه لـوعـات
والجاهـل اللـي كـل ماقـال قايـل = صدق كلامـه دون برهـان واثبـات
والجاهـل اللـي فالمسـا والقوايـل = يـدور بـوش ٍ لايقـيّـل ولابــات
والجاهل اللـي لـو عيونـه تخايـل = يطيح وسط النـار مثـل الفراشـات
والطيـب ياباغيـه شيـل الثقـايـل = لامن عجـز عنـه ردييـن هامـات
والعيـب والمنقـود راس الفشـايـل = عصيانـك الرحمـن رب السمـوات
والعيـب والمنقـود شـب الفتـايـل = بين الجماعـه والمعايـر بمـا فـات
والعيـب والمنقـود لاجـاك عايـل = وطّيت له راسـك وذليـت بسكـات
والكذب راس العيـب ياللـي تسايـل = حبله قصير ويقطعك وسط مضمـات
خلك على العايل صـدوق الصمايل = لكم من شجاع ٍ عاش واللي هرب مات
اصبر علـى وقتـك ولوكـان مايـل = الصبر مفتاح الفـرج فـي المهمـات
والعيب بذل المال مـن غيـر طايـل = على المعاصـي والخنـا والملـذات
والعيب نقـل الهـرج بيـن العوايـل = نقل الـدوادي الفارغـه والحكايـات
خلك خفيف النفـس والشـك زايـل = وش عاد لو تومر ولو قيل لك هـات
حسن الخلـق زينـه لكـل الفضايـل = كمل بها اخلاقـك وللنـاس شوفـات
لاصرت تبغـى وافييـن الخصايـل = فاصل رحمـك وأد حـق القرابـات
هذا كلام رشيد مـن نسـل (وايـل ) = ( اهل الكرم والجود واهل المروات )
لباسـة الماهـود واهـل الاصـايـل = عون الرفيق اللي وقع وسط شطـات
كم شيـخ قـوم ٍ ذاق مـر الملايـل = من ضربهم لاجو على الخيل عجلات
لطامـة العايـل ليـا جـاك مـايـل = شينين .. زينين ٍ .. مطافيق .. وثقات
لطامـة ٍ .. نطـاحـة .. ماتسـايـل = فرسان .. شجعان ٍ .. مدابيس غارات
وطعونهـم تلقـى بهـا الـدم سايـل = وصحونهم يلقى بها الضيف خيـرات

...