أجيـك أنا لـو كان فيهـا كـلايـف ... مشّــاي وألاّ فوق حرّ ٍ هجيني

[المسيكي]

سلام عليكم

مسيتم بالخير جميع ،،

قصيدة ،،،

نظمتها وامل ان تنال استحسانكم ،،،،،،

لي صاحب ٍ بحدود لغف الطرايف=بالذكر والا لشوفهم محتريني
علمي بهم في روضهم والطفايف =يومه قريب وكل يوم ٍ يبيِني
واليوم راح الوقت كله خطايف=مدري يبيني صاحبي أو نسيني
الوقت فرّق بيننا والصدايف=ماباقي ٍ ياكود ذكرى الحسيني
وراح الفكر مرسول يمه ردايف=مع الهبايب بالخبر هو يجيني
كتبت له واخترت بعض القطايف=مضمونها أبداه بسم المعيني
وأرسلت له ياصاحبي لا تهايف=تمشي شمال ونوب تاتي يميني
قلي تراي من العنا صرت شايف=والقلب جظ وتسمعه له حنيني
كان انت ليه يااريش العين عايف=نقفي وحنـا عنّكم منتحيني
وكانك بغيت وصالنا والروايف=حنا تنينا ردودكم صابريني
أجيك أنا لو كان فيها كلايف=مشّاي وألا فوق حرّ ٍ هجيني
أجيك أنا واشف حمر الشفايف=مادامنا بالحب وأنتي تبيني
أجيك أنا باجيك ماهي لفايف=بعـزّ الضحا ولاهمني الشامتيني

فهد بن عبدالعزيز السبيعي العنزي