**فصل ثالث جـــــيـــم **

[حبيب الخالد]

بسم الله الرحمن الرحيم
اهلين يالغالين انا جبت لكم قصه قريتها واعجبتني وحطيتها كامله عشان ما تتعبووووون ههههههههههههه


اسمها ( ثالـــــــــث جـــــــــيـــم)


هذي قصة فصل ثالث جيم وترى مهما كانت مصرقعة فيها فكرة اجتماعية نبيلة

اجتماع المدرسين

المدير: شوفوا لكم حل بثالث جيم, فشلونا سمعتهم واصله اخر الدنيـا وجانا كم إنذار من وزارة التربية والتعليم كله بسبتهم.وبكرة بيجينا مـوجة مخصوص علشانهم.
الاستاذ فاروق الفستئاني (الفستقاني): (بلهجة سورية) شوووف استااااز تالت جييم مابيجي من ورا راسون إلا المشاكيــل ,انا بأتريـح (اقترح) توزعون على المداريـس التانية, كل مدرسه ارمي عليها شي اتنين تلاتي وريح راساك أخـــي.
رائد الفصل (حسـنى شـمعة) ( لا شعوريا): نفصلهم !!!!وأبطل دروس خصوصية يعني وإلا إيـه!!!..أصـدي أنا عندي فكرة هايلة حتحسن صورتهوم أودام الموقـه (موجة) وحخليه يئول إن كل الكلام اللي سمعه عنهم إشاعات
المدير: بس شوف ياحسني هذي اخر مرة لك انت وياهم والا فصلتهم كلهم واولهم انت. بشوف وش تسوي فيهم, وإلا هم وش بيسوون فيك

طابـور الصبـاح


مشهد طابور المدرسة الصباحي الطلاب صافين والمدرسين والمديرمع الموجة .
حسني شمعه ماسك ميكرفون الاذاعة المدرسية : والان الإزاعة المدرسيه لهزا اليوم مع ...تالت قيــــم.
المدير مستغرب للاستاذ فاروق: والله اللي فشلنا
فاروق فسـئاني باستغراب:" تالت جيــــم, العمــي" ويروح للاذاعة بسرعة
طلاب الطابورضحك واستغراب يلتفتون على بعض وهم يقولون ثالث جيم... ثالث جيم. !!بيجيبون العيد
حسني الشمعة يعطي الميكرفون لعلي الدب . ويقول لهم ياولاد زي مااتفقنا, وروهم انكو أد المسئولية
.

الإذاعـة المـدرسـية


على الدب يجرب الميكرفون: الو الو ..اخوه سعد المعصقل من وراه "حول حول"
علي الدب :" مدير المدرسة الفاضل, أبائي المدرسين, إخواني العيال: سعد ابوعصاقيل سليمان العربجي, وممدوح القرد وابو ريحه .. الاستاذ فاروق يضرب علي الدب على علباه طااااخ ,إحكي ولاه
على الدب: السلام عليكم ورحمة الله وبركاته , أسـعد الله صباحكم باليـمن والبركات, خير ما نستهل به اذاعتنا لهذا اليوم ايات عطرة من القران الكريم يتلوها على مسامعكم الطالب : حمود المطوع.
يجى حمود المطوع (لحية و ثوب قصير) ويقرا سورة قصيرة بصوت رخيم.
علي الدب: اما الان مع فقرة هل تعلم للطالب حميدان أبو ريحة
حميدان بصوت عالي: هل تدري.
هل تدري إن للذبابة ستة أعين.
هل تدري وإلا ماتدري إن الفار يصيب بمرض الطاعون.
هل تدري وإلا ماتدري أن اذا قطعت شوارب الصرصور يقعد يخبط في الجدران
هل تدري وإلا ماتدري أن لكل قطو برميل زبالة مخصص يسكن فيه وشكـرا.
علي الدب : هل تدري ان بيت حميدان جنب البلدية, أما الان مع حكمة اليوم والطالب سلوم المفهي
سلوم المفهي يقرب.. يمسك الميكرفون بيد واليد الثانية في مخباه تحوس يدور الورقة اللي فيها حكمة اليوم. يطلع الورقه ويقول: "حكمة اليوم " ويفتح الورقة ويقرا بصوت عالي " البضاعة المباعة لاترد ولاتسبدل" يسكت شوي ويناظر الورقة ويكمل " شماغ , طاقيتين, شراب العايلة , ثلاث فنايل علاق, , سروال سنة, زبيرية .." وهو جالس يقرا ألا وذاك الكف على علباه من الاستاذ فاروق وهو يقول" العمى شو حمااار...ولاه طلع الورأه (الورقه) ياللي فيها حكمة اليوم مو فاتورة ملابســاك" سلوم المفهي, طيب طيب يدخل فاتورة ملابسة بمخباه
علي الدب :"الاَن مع موضوع الصباح للطالب:" أخوي سعد أبوعصاقيل"
سعد يفتح ملف أخضر علاق ويقرا,
"اعزائي المشاهدين , موضوع حلقة اليوم العطلة الصيفية (مـدمن فضائيات)
"لقد رحنا في العطلة الصيفية أنا وأهلي إلي بلدي الثاني لبنان"
علي الدب: تراه تسـذوب, بالعـطلة رحنا لخـوالي بشـقراء.
سعد يلتفت إلى علي الدب بزعل ويكمل" ولكن علي الدب لم يكن معنا" ويطلع لسانه لعلي الدب
رحنا بالطيارة و كانت امي خايفه جدا جدا لانها اول مرة تركب طيارة , بس انا اصلا دايما اركبها, وفي الطيارة جت شغالة الطيارة وجابت لنا القهوه والشاي ثم جت وقالت اقلطوا على العشاء , وقلطنا في المقلط مع العفش, وكان الطيار واقف على روسنا ماسك اللبن وقال سموا على عشاكم,يالله إن تحييكم, وكان مفطحا شهيا. وخلصنا وغسلنا, وكان ومساعد الطيار ماسكن الفوطة والطيب وأعواد الاسنان.



وعندما وصلنا لمـطار المـلك خـالد حقهم, ذهبت انا لتختيم الجوازات والرخصة والاستمارة وذهبت امي للتطبيق , وكنت اتحدث لغتهم بطفاقة لاني امي وابي مامعهم لغة. وقال لي العسكري : جواز مين هيدا ؟.. فقلت له" بييَ (ابوي باللبناني) , وقال: "وهيدا؟" قلت: مييَ (أمي) . وهيدا ؟ قلت" خييَ (أخوي " ) وقال " وهيدا؟" قلت : نييَ (أنا) " وكان جوازي
وقال لي ابوي ماشاالله عليك ياوليدي إنك بلبل سداح في اللغة اللبنانية الفصحى, التفت عليه وقلته, أي لا كــان , ثم التفت للبـنـانـي وقلت له تـرى أنا سـعودي مانيب زيكم, . وشكله كان مستغرب يحسبني لبناني.
وفي لبنان سكننا في مدينة بيروت مشيط وكانت مدينة جميله فيها مـزارع بكل مكان, ولم اشوف عندهم تـراب, علشان كـذا مافيهم الاشـهب, تمشينا في مناطقها السياحية واسـواقها, ذهبـنا الي اللبنانيـة,والحـريرية (المملكة والفيصلية). وركبنا كـورة الحـريرية وناظرنا جميع حـدود لبنان, ورأينا دولة إسـرائيل الملعونة, وكانت دولة صغيرة جـدا, ونـظرت للدول العربية والأسـلامية وجـدتها اكبر منها بألف مرة, ومدري كيف ناشبتن بحلوقنا..
ورأيت دولا كثـيرا, وشفت دولة وماعرفتها, يوم دققت مكتوب عليها, بورسعيـد, وشفت اللمملكة العربية السـعودية الشـقيـقة (وش عنده اللبناني). وكانت حـدودها كثيـرة عرفتها من الخـط المتقـطع. ولكن للأسـف لم تـكن لبنان تـحدنا , وأنا أقترح نضمهم معنا في دول الخليج ونـدف _اليـمن بـدالها.

ثم ذهبنا الي الاهرامات وكل واحد مننا ركب له على واحد, انا ركبت على الخنـصر , وأخـواني واحـد ركـب على البنصـر, وعلي الدب ركب على الوسـطى, يلتفت لعليان اجل ا رحنا لخوالي هـا.
" اما ابوي فركب على أبو الـهول لأنه يشبهه. وكانت رحلة سعيدة, ورجعنا بالسيارة ومررنا على تونس الخضراء, والسودان السوداء في الـطريق عبينا بنزين بعشرة لاننا فلسنا, وكملنا الـطريق الي أن وصلنا بالرفـاء والبنيـن.
وإلي اللقـاء في حـلقـة القـادمـة.
علي الدب " أما الان .." صوت جوال يدق من مخبا علي الدب ويطلع الجوال والميكرفون بيده وطبعا صوت المتصل واضح لان قريب من الميكرفون وكل الطابور يسمعونه
صوت حرمه: " ألو .."
علي الدب: " هـلا بهـالصـوت , ممكن نتعرف
الحرمة: " وجع يمصع ضلوعك .. أنا أمك حصيصة!!"
عليان بصوت مرتبك " يمــه"
طلاب ثالث جيم اللي وراه" اسم امه حصيصة ...اسم امه حصيصه ( بما فيهم اخوه سعيد ابوعصاقيل)
علي الدب: يمـه شغلى الرادو, بتشوفينا انا وابوعصاقيل على قناة المدرسة إف إم.
حصيصة: الرادو مايشتغل, إنت ناسي إن دشنا خربان,علي, وراك سارقن جوال ابوووك, أنا زاهمتن عليه وطلعت لي إنت"




علي الدب: "مهوب أنا, أنا أصلا صار لي اسبوع ماشفت جوال ابوي"
حصيصة: اجل اللي تكلم منه وشو ؟؟!!" هـذا مهوب أنا, أنا أخـوي سعـد,
حصيصة: اشـوى احسبه إنت.
علي الدب يلتفت على سعد المعصقل : " إنت معلم إمي أن الجـوال مـعي يالحروش"
سعد يحاول يكلم امه في الجوال:" يمه يمه, حنا الحين في الاذاعة وإنتي على الهوا ..عندك مداخلة والا طبخة؟"



علي الدب , والان مع الشيـفة (الطباخة) أمي.
حصـيصـة: ماشيفة الا إنتم وابوكم , وتسـكر الخـط"
الاستاذ فاروق يمسك رأس علي الدب وسعد المعصقل ويصكهم ببعض . طرااخ وياخذ الجوال.كمـل ولاه فورت لي دمـي.
علي الدب:" اما االان مع نشيدة الصباح وسليمان العربجي بعنوان "عصـفوري الصغير"
علي :سليمان وش عندك لابس بدلـة حمرا.
سليمان: لأني أول مرة بمسك ميكرفون قدام الجماهير.
سليمان ياخذ المكرفون ويقول " أحـلي تحية لشباب ثالث جيم , و أحلـى تحيـة للموجه والمدير وأحلى تحية للوكيل بغيابـه, وياشباب اللي يبغى إغنية يكتبها على منديل ويعطيها المدرسين يوصلونها لي..
سليمان العربجي:"أويــــــــلي, أويلـي , أويـلي أويـللللي "
يحط الميكرفون تحت ابـطة , ويقول" يلا كلنا سـوى.. ياثالث جيم"
طلاب المدرسـة كلهم يرددون وراه ويغنون وتنقلب المدرسة مرقص وهيصة.



المدير بعصبية:" ماني قايلكم.. فشلتونا كله منك يا حصني (يقصد حسني) خلاص ضف وجهك انت وطلابك, مالقيت تحطهم في الاذاعة الا يوم جا الموجة, والله مايندرا وش بيصيرفينا ويوم راحوا للفصل
ويدخل عليهم شاب سعودي في مقتبل العمر تظهر عليه علامات النشاط والحيوية (جنتلمان) "أنا المشرف الطلابي الجديد" جايكم من ادراة التعليم لحل مشاكل بعض الطلاب اللي عندكم"
المدير: "بس وهذي هي ,اقصد.. مدير المنطقه التعليمية ماأصدر معك قرار ..يعني نقل ..فصل ..سجن..تعزير"
المشرف بإبتسامة: "لا ..وليه كل هذا, المسألة ومافيها ان الطلاب عندكم عندهم امكانيات وطاقة مهدره ماعرفنا كيف نستغلها في صالحهم, انا متابع موضوع ثالث جيم عندكم من بداية السنة واعرف ان عندهم طاقات جباره بس يبغي لها تتوجة التوجيه الصحيح, بس يحتاجون بعض الاهتمام والوقت, ماعندهم مواهب أو هوايات معينة؟
الاستاذ فاروق: " أيه بلا, عندن مواهب في اللعانة والاجرام"
المشرف: "لا, انا ابغى الاشياء المميزه فيهم ماحاولتوا تستغلونها في صالحهم وصالح المدرسة ومجتمعهم ووطنهم"
حسني شمعة: دول أبالسة
لمشرف: "كل أنسان فينا لازم يكون مبدع في شي مهما كان,بس يبغي مين يكتشف هالعملاق اللي في داخله ويصقله, حتى لو ماكان ماهو مميز اكيد بيكون عنده هوايه لشي بتفيده وتفيد مجتمعه وتشغل وقته اذا عرفنا نستغلها"
المدير يرد وشكله تأثر بكلام المشرف:" كلامك منطقي


الهروب الكبير



المشرف مع الاستاذ حسني يراقبون طلاب ثالث جيم وهم يهربون من المدرسة , علي الدب, ياخذ الشناط والكتب , ويحذفهامن الدريشة ويوصلها لبرى المدرسة من قوة الحذفة. سعد ابوعصاقيل يركض وينط على السور المرتفع ويجمع الكتب, ويقرب السيارة لهم. سلوم المفهي, هرب وجلس يرسم على الجدران صوركاريكاتيرية للمدير والمدرسين وعياراتهم.
حسني للموجة: زي مانت شايف سعاتك...حئولك إيه وإلا ايـه دول مجرمين محترفين.
المشرف: ماشاءالله ابـداع, قمة في المهارات.


شباب المستـقبل


وبـعـد كـم سنة وبعـد أن اصبح المشرف السـعودي مسـئولا عنهم. . صار سعد ابوعصاقيل اللي ينط السـور بـطل المملكة في الوثب العالي. الدب اللي يحذف الكتب من الدرايش بطـل اسيا في رمي الجلة, وسلوم اللي يرسم على الجدران اخذ جائزة المركز الأول في الفن التشكيلي على مستوى الخليج.