يا هيه ! للمحيط الهادي ابن فطيس !

[صالح العرجان]

ياهيه اللتفت لي واسمع ادعاي لـك ياهيـه
ترا عـادك بتشبـع مـن البعـد وتواجـه

دعيتك بصـوت ٍ ياصلـك ليـه ماتوحيـه
وانا اسمع ضلوعك من صدى الصوت لجّاجه

عليـك الفـؤاد اخلاجـه مصمّـخ ٍ راعيـه
خـف الله فـي راعيـه ماتسمـع اخلاجـه

ترا العفو قـد جـاك اولـه واغتنـم تاليـه
وترا الحلم بحـر ٍ غيـر لا تامـن امواجـه

وترا الود ليل ٍ مظلـم ٍ جيـت لـك ساريـه
سراجه وصالـك والجفـى ينفـخ اسراجـه

وترا قصرنا اللي كم سنـه نجمـع ونبنيـه
هوى العذل طيّـح بابـه العـود وسياجـه

لي أيام مـدري ويـن دارك ولا ادري ليـه
وانا خابـر انـي بـاب شفـك ومزلاجـه

غيـاب ٍ بـلا سبّـه هجـاد ٍ بـلا تنبـيـه
وجفا أغلا العرب نار ٍ على الكبـد وهّاجـه

نضج قلبي من البعـد وش حاجتـك تكويـه
جفاك الجمر والصبر فـي بعـدك الصاجـه

طبـع حبـك بقلبـي والايـام مـا تمحيـه
هـذا هجـرك يحـاول يموجـه ولا ماجـه

يموت الأمـل لكـن ضنـون الغـلا تحييـه
وعروق الوفـا فالـروح والقلـب وجّاجـه

خبرتوا حـد ٍ يبكـي علـى واحـد ٍ يبكيـه
وخبرتوا حـد ٍ مسجـون مايبغـي أفراجـه

احبه ولا ابغضتـه علـى شـي ٍ إيسويـه
ولا زالـت أرقـاب الرجـا فيـه منعاجـه

عسى منزل ٍ ضمه حقـوق الوسـم تسقيـه
وتضحك له الدنيا وهـو يضحـك أحجاجـه

فقد خاطري شـي ٍ مـن الضيقـه امسلّيـه
وغدت روحي من النـاس والليـل هجّاجـه

اروح لمكـان ٍ خابـره ..خابـره ياتـيـه
اسوق القدم صوبـه وهـي مالهـا حاجـه

مكـان ٍ نزيـه وأول مواجهـي لـه فـيـه
وانـا خابـر ٍ مارجـل مثـلـه بـدواجـه

لعل وعسى مـا حدنـي للمجـي ..يدعيـه
واشوفـه وانـا مـاودي اسبـب احراجـه

يحب الجريح اخـر دروب اللقـاء ويجيـه
وتحـب القـدم جيّـة مكـان اول مواجـه