" كــلّ ٍ يــشمّـــر دون حـقـّه يمــيــنه "...

[المسيكي]

السلام عليكم ورحمة الله،،،،

.................................................. .............................................

يالله ياللي منزل الحق بكتاب=ونجّيت نوح من الغرق بالسفينه
اسألك تهلك كل طاغي ومرتاب=واهل القلوب الفاسدة والضغينه
وتعز عز ٍ فيه للعز مجذاب=وتخذل نوايا مرجف ٍ مع عوينه
وتبين نور الحق في كل محراب=ويحل شرعك ياآلهي بيقينه
عشنا وشفنا ووقتنا فيه الأعجاب=شفنا الرذايل والأمور المشينه
شي ٍ يهول ياملا فيه الأغراب=أمور منها الحر يندا جبينه
اعراض راحت ياملا ويش الأسباب=ومن عقب هذا ندّعي منكرينه
قول ٍ ووقول وقايل الهرج كذاب=وش عاد ينفع دامنا شاجبينه
ننكر وحنا يكضّنا الناب والناب=ومنه الرجا من مبطي ٍ قاطعينه
مثل الغنم صرنا على كل معزاب=الذيب ياتي وننتكس سارحينه
كل ٍ يصد ويدّعي لين ينجاب=حتى يتجرّع ويلها والغبينه
ياما يولّي بمرّها يطيح منصاب=ياتيه دوره وبالخزا صايبينه
الدين قلّ وراعي الظلم هذّاب=هو ليه ماهو يالملا رادعينه
يفسد ويفعل بالملا كيف ماطاب=محد ايّتكلم وإن قضب مطلقينه
راع الرزاله جاسر اليوم ماهاب=ملعون ساسه كيف محد ٍ يدينه
ومادام حد السيف مغمود بجراب=وشلون تنكل كل نفس ٍ لعينه
ودون العدا يوجد ملاعين وارهاب=والكل منهم يستوي مع خدينه
مافيه فرق ٍ بينهم ياهل الالباب=الشر شر ويجتمع مع قرينه
مايفيد هرج المثمثه ويّا الأشجاب=غير الطغى تزيد معنا اسنينه
ويلعنك ياوضع ٍ بك الخزي ينساب=ملموس يلقى بكل دار ومدينه
ويلعن حياة ٍ كل ذلّ واهزاب=مادام راع الجرم تجرم يدينه
نشوم عنها ونتّبع درب الأطياب=وكل ٍ يشمّر دون حقه يمينه
ماهي دعاوي وننتظر كل ندّاب=الموت واحد والملا ذايقينه
واعرف ترى محد ٍ بحالك بالأنشاب=لاصار ماتفتكّ نفسك مهينه
الحر حر ويرتكز فوق مرقاب=وضرغام محد ٍ يقترب من عرينه
هذا الصمال ولاني بحال عقّاب=ومن هازنا بالحال نقطع وتينه
عشنا بمعزة ودربها يفتح أبواب=والا المهونه وبابها قافلينه

وسلامتكم ،،،،،،،،،،،،،

فهد عبدالعزيز العنزي