قصيدة حكمه,,من اجمل ماقرأت..

[غموض الشمال]

يا الله يا اللي نبتهل لـك ونخشـاك
يا خالـق الدنيـا ورافـع سماهـا

يا واحدٍ ما هي بتحصـى عطايـاك
لخلق كل الخلـق محـدٍ حصاهـا

الجود من جودك وعطفك وحسناك
يا مستجيب الداعيـه فـي دعاهـا

أنت الكريم اللي نخافـك ونـدراك
لولاك نفسـي مـا تحقـق مناهـا

إنك تثبتني علـى غايـة ارضـاك
عبدك ولا غيـرك حياتـي ولاهـا

سجدت لك يا دايـرٍ كـل الأفـلاك
يا غاية الشكـوى ويـا منتهاهـا

لولاك يـا رب السمـاوات لـولاك
ما تقبل التوبه علـى مـن نواهـا

يا العبد مالك غير ربّـك ومـولاك
كل البشر تفنـى ويمحـى ذراهـا

اهْو الذي صوّرك سـوّاك وأنشـاك
إعجاز ما وصل البشـر مستواهـا

لا تشمت العالم وتنسـى خطايـاك
احكم هوى نفسك وحاسب خطاهـا

حاسب ضميرك قبل لا تدفع خطـاك
كم من قدم قلب المشقـى حفاهـا

عليك بالإحسـان والـرب يحمـاك
من قدم الحسنـات يلقـى جزاهـا

شيطان نفسك لا يغـرّك ويغـواك
قبلك غوى نـاسٍ وكـدّر صفاهـا

من زمرة الطاغوت حذراك حـذراك
لا تبتلي بجـروح يصعـب دواهـا

وإلى مشيت اعرف دروبك وممشاك
احرص على نفسك وخالف هواهـا

أمّارةٍ بالسوء مـا هـي بتنهـاك
اقبض عليها ليـن يجلـى صداهـا

اقطـع نواياهـا بدينـك وتقـواك
هلّـل وعنـد الله سريـعٍ شفاهـا

والعين لا تنظر بهـا مـن تعـدّاك
المحصنه لو تلتفـت لـك وراهـا

اصبر على همّك وغمّـك وبلـواك
عـف وتعفـف لا يغـرّك حلاهـا

واترك حرام القوت ما هو بيمـلاك
كل البطون الجايعـه مـا ملاهـا

رشفة حلال اتسد جوعك ومضماك
تسوى مشاريب الحـرام وغثاهـا

النار في جوفك وتصلـى حنايـاك
نار الجحيـم تزيـد للـي وطاهـا

واحفظ لسانـك لا يجـرك ويبـلاك
اخذ الثمينه لـو غلـى مشتراهـا

الهرج ميزانك ويكشـف خفايـاك
كلمـة تعيبـك لا تبيّـن نبـاهـا

صون الكلام وصون نفسك ومبداك
للنفس حشمـة لا تفصّـم عراهـا

اصمت مدامك عارفٍ سير مجـراك
لا تنقـل النّمـة وتبحـث خفاهـا

يزول قدرك عنـد أقـرب دنايـاك
لو هو ولد عمّـك حياتـك جفاهـا

واحلم تراه الحلـم يرفـع مزايـاك
هو سيّد الأخـلاق هـو مبتداهـا

وصّى به المبعوث ما هو بيخفـاك
شفعينـا يـوم المـلاقـاة طــه

خل الجهل لا تجعل الغيـظ ياطـاك
ترى الجهل سم القلـوب وعماهـا

وإلى ابتليت ارفع إلى الله شكـواك
لا بدّهـا الأيـام تكشـف غطاهـا

اصبر يزين الحظ ويزيـن مرمـاك
الله يفرجـهـا ويـدفـع بـلاهـا

لا تمنع المرحوم لا مـن تنصّـاك
الناس لأجل الناس وأحسن عطاهـا

ابـذل لـوجـه الله والله يـجـزاك
مثل الغروس اتطيب للـي سقاهـا

لا ضاع معروفك ولا ضاع حسناك
ن كانـهـا لله تلـقـى جـزاهـا

جارك ولو هو جار تسقيه من ماك
عليـه لا ترفـع يدينـك عصاهـا

أحسن جوار الجار لو كان يشنـاك
ترى العرب تحشم كلاب اقصراهـا

بكـره يشـد ويكتـب الله فرقـاك
عساه يذكر جيرتـك مـا نساهـا

الظلم شين ويجعل النـار مثـواك
راع الظليمه عيشتـه مـا هناهـا

فوقك إله العـرش عالـم نوايـاك
ينظر قلوب النـاس وش محتواهـا

يسمع بما تجهر وعارف خفايـاك
بأمره شروق الشمس ترسل ضياها

هو عالمٍ غيبـك وركّـب خلايـاك
هو خالقٍ فيك العـروق ورواهـا

والضيف له حقٍ إلى حـل بحمـاك
قلّط ضيـوف الله وأكـرم لحاهـا

لا تحقر الضيفان واتشـح بغـذاك
من ما عطـاك الله قلّـط عشاهـا

وعليك باللي حزة الضيـق يفـداك
لا شانـت الدنيـا ودارت رحاهـا

لا من زهمته لو على الموت لبّاك
عيني لجل عينك وروحـي فداهـا

ترى الخوي نبراس روحك وملْجاك
لا كلّحـت بقعـا وزادت غثـاهـا

حذراك من بعض المخاليق حـذراك
بعض العرب ما تفرقه من نساهـا

تايه وضايع بيـن ذولا .. وذولاك
فيـه الجهالـة واصـلٍ منتهاهـا