خامس احبابي

[احساس قلم]

القلب في سوق الهوى لجلك يغيض ويمتلي

......................... ماهوب راع مساومه أمـّا أشتره وألاّ بعـه




يوم الشعور مداوله .. وش قلت لك وش قلت لي

......................... راجع حديث العاطفـه وأقتص دربــه وأتبعـه




وألاّ بلاش أنسى مافات ومات وأسمع ما يلي

........................... لا تترك الملتاع واقف لك على راس أصبعـه




لا تكسر شداد الجمل .. لين آكـل لسان الطلي

............................ وإليا نهض حظي وحظك شقّ صدري وأجبعه




من قــال لك ( ما الحـبّ الآّ للحبيب الأوّلــي )

........................... يا خامس أحبابي معـــك نسيت حبّ الأربعـه !




أضحك معي .. وأضحك معك لكنّ لا تضحك علي

........................... طبعي علشــانك تعبت أعوبلــه وأطوبعــه




شتــّـتني وأنـا عليــك .. أميح ميحـــات الدلي

......................... ودخـّلتني فـ الزوبعه وأنـا ما أعـرف الزوبعـه




وغنيّت لك قافين والمعنـى على وجه ٍ جلي

......................... أختـر حداها وأحفظـه وأفتح ضلوعك وأطبعه




أقولها .. وأن ما تلقيـّــتك .. تلقيّت الخلـــي

......................... يا منبــع الحب الحقيقي علـّـني من منبعـه