شيابنـا بغمـزة ( سميـره ) موليـن !!

[عوض بن خميس]

نركض ورى الدنيا ركيـض النعامـه

وعند الشدايد ندفـن الـراس بالطيـن

لا قلت مسلـم .. قيـل يعنـي أسامـه

منهو أسامه لجل يوصف بـه الديـن

هـم مـادروا بأنّـا وصلنـا الرخامـه
أخبارنـا صـارت سخافـة عناويـن

( التوت .. يغتال الكرز في منامـه )
( صياف شن الحرب مع تركي الفين )

( باسكال تسرق لحن .. راغب علامه)
فاصـل غنائـي ... آه ياليـل ياعيـن

نعـود للموجـز ... نقـول بختامـه
هذا خبر عاجـل لفا مـن فلسطيـن

الدوخـي يعلـن للهلال انضمامـه ..
عفواً .... خبرنا صار مو من فلسطين!!

شكراً .. لكل واحد عطانـا اهتمامـه
نعود معكـم لأغنيـة .. ليـل ياعيـن

شفتوا اشكثر هالغرب يخطي كلامـه
شفتـوا اشكثر حنـا غدينـا سخيفيـن

شفتوا اشكثر قاسـي علينـا اتهامـه ..
يحسبنا كل ليلـه سهـارى مصليـن!!

مايدري إنا حـول (فاتـن حمامـه)
نوصف جمال عيونهـا .. والفساتيـن

ولاهي غريبه .. قبلنا أهـل العمامـه
شيابنـا بغمـزة ( سميـره ) موليـن

أريـام .. أم الغنـج .. والإبتسـامـه
صـارت قضيـه مشغلـه هالملاييـن

تدرون عاد ... المشكله مــو أسامه
ولا هـو اعجـاب العـرب بالمغنيـن

المشكلـه أكبـر وأكثـر .. ضخامـه
المشكلـه ... حنـا بليـا مضامـيـن

أرخص ما عند اليعربـي .. إحترامـه
قلي شلون أعطيـك الاثبـات هاللحيـن

عطه ( الطراق ) .. يقول حب وكرامه
ثنّ (الطراق ) .. يقول أهلين وسهليـن

وتقول لي ( بغـداد ) راحـت ندامـه
ياخيّ جاني علمهـا عـام ( تسعيـن )

ماهـي غريبـه لا فقدنـا الزعامـه ..
بس المصيبه نفخر بحرب .. حطيـن

بعنا الكرامـه .. واشترينا السلامـه
نبي نفوز بشي .. فزنـا بـولا شيـن

هم وهمونا أن السـلام ( الحمامـه )
صرنا حمايم .. بس صـاروا شياهيـن

يكـاد هالإنسـان يفـجـر أمـامَـه
من كثر ما يسأل .. متى نوفي الديـن؟!

تظهـر علامـه .. وأتّخفـى علامـه
ملايكـه تقفـي .. وتقبـل شياطـيـن

ومن قال لك توه ... زمـان القيامـه
قله : طريق الشام .. سـووه سيديـن
مماراق لي