تعــــرى الحــــــال

[سطام مشهور الايداء]

يغيب الطيش وتغيب القرى واودع الأحلام = يغيب الشعر ف غيابه نسيت وعود خلاني
يقولون السفر وين السفر من حلة الأوهام = وانا أغيب اتشظا والجمر رمد على اجفاني
ذكرت اللي يساورها اليقين بحرقة الانسام= هي اصدق من لمس هالحزن لا غيب بوجداني
يمر هذا الشقا في غيابها والعام يتلا العام = وانا لا جيت ابنسى شفتها في نظرة اخواني
اخيل افراحهم اشباح تركض لي بدون اقدام = تلبسني وانا مالي سوى طعنات حرماني
خلا من طيبها بيتٍ نما من شوفة الارحام=خلا هذا الفضا من حسها من صوت جيراني
خذت هالناس من راحت ولا باقي سوى الايام = اشب فيها الدعاء يالله ثبتني على ايماني
تطهر روح لامرت وتركع لله العلام= الين ادفا على جال الحنين وتذبل احزاني
بكى طفل وتنهد شايبٍ لاهو بكى ما نلام = وبكيتك بس انا وشلون بعدك ينطق لساني
سنين الراحلين حسابها ماينحسب بارقام = متى سال الخفوق بشوقهم وشلون ابى القاني
ابكتب سيرتك واخاف يمه كذبة الاقلام= وانا لامن بغيت اسج عنك يخون نسياني
تعرى الحال طحت من العنا محتاج روحي تنام = على صدرك وصدرك فيه كل ناسي وخلاني
يغيب الشعر وتغيب القرى واودع الاحلام = اذا كان المقام اكبر من احزاني وقيفاني