وش نقــول ؟؟

[المسيكي]

االسلام عليكم ورحمة الله ،،،
وكل عام وانتم بخير ،، نسال الله العلي القدير ان يبلغنا رمضان ويعيننا على صيامه وقيامه في بلاد المسلمين جميعاً



أكيد انكم كلكم شفتم حادثة نفق النهضة اللي بالرياض والسلق الأربعة اللي اعتدوا على البنات ،،
لاشك انها جديده هالسالفه على كجتمعنا ،، ولاتستغرب هالحادثه لو حدثت قديما او جديد ،، لانه لولا الخوف من العقاب كما قال ابن عبار ساروا بالشارع ملطان ،،

لكن استغرب ماسمعته انه حدث هذا امام الناس وانا لااصدق هذا واتمنى انه مهو صحيح ،، مهو معقوله انه قدام خلق الله ،، وين النخوه والشهامه والغيره
مات بقلوب الناس ؟؟ معقول يرون ماحدث ويتفرجون......
صاروا مثل البل اللي تشوش بالرجال الغريب ...

لن اطيل عليكم واترككم مع هذه القصيده اعبر بها عما حدث ....

السلام وثم من بعد السلام =نلفظ المنطوق من نبع الصميم
وش نقول وكيف نبدا بالكلام =حاير ٍ ياناس في فعل ٍعظيم
وش حصل بالناس قولوا وش علام؟ =تهتك الاعراض من واحد لئيم
كلنا نشوف لكن كالنعام=وقبلها ماصار في وقت ٍ قديم
وش تغير ليه قل الاهتمام = والتهاون بالبنيّ وبالحريم
وش حدا السربوت ملعون الرسام = السقيطه صاحب الفعل الوخيم
كيف ملعون الجدف سوا الحرام = ولا يسوي مثلها عقل ٍ سليم
لاحيا لا دين لا حتى احترام = سافل ٍ لاشك من غيره عديم
ولا نلومه لو بدينا بالملام =وش نسوي بواحد ٍ مثل الرجيم
لومنا ياناس واضح بالمقام =. لمن تفرج بينهم مثل البهيم
ياحسافه كيف صارت للحطام = وضعنا مقلوب كنا في جحيم
اسمعوني وافهموا مني الكلام =كلمتين ولابهـــا شيّ ٍ جريم
الجمل لاصار في خيط وخزام = الهدير يصير رغي ٍ في رزيم
والفصل مذكور في حد الحسام = لاتكثّر بين سين وبين جيم
المرض إن قام يبدا في سقام =ابتر التلفان والعضو السقيم
والاخيره كان تبغا للسلام = لايصير الذود في حد الخصيم
لازم ٍ يكون ذودك بالتمام =شوف عينك وانت حوله مستديم
وان تركته قل عليه السلام = تستهين وثم تذهب في ضريم
ودام مايوجعك قلبك ثم تنام =اخس وخسرت يالعقل العقيم
تم قولي فيه حكمه واحتكام = ولا يحله كود رجال ٍ فهيم

فهد المسيكي

واعذرونا عن القصور،، دوبي كتبتها...........