سعوط المجانين
لقيت ابو زيد تال الوقت يلبس قناع = بالديره اللي ثمان شهور هاجرها
ليه يتخفّى وانا خابره رجل ٍ شجاع = من بعد ماكان يصدح في منابرها
سلامة الجعفري
اظن ابوزيد نفسه ترغب الانقطاع = والعز ينهى على نفسه ويامرها
ماهو بمعقول قولك لاتجي باندفاع = دقق على جرة ٍ عينك تناظرها
سعوط المجانين
غلطته ماتنغفر على جميع البقاع = في مقبل الوقت ليته مايكررها
ماني غشيم ٍ وافرق بالثني والرباع = يوم ٍ بعض البشر تحفر مقابرها
سلامة الجعفري
كانك مصمل على الدعوى وصعب اقتناع = علم بها واحد ٍ مبطي يدورها
الديرة اللي عثت فيها ذياب ٍ جياع = يبكي على مجدها اللي فات حاضرها
سعوط المجانين
بعض البشر مظهر ٍ راسه ومخفي الكراع = لكن ٍّ نفسه كذا مالله بجابرها
نحمى المواقيف لامن صار فيها نزاع = انواجه القوم ونكسّر مناخرها
سلامة الجعفري
بعض البشر لو يجيه هجوم مابه دفاع = ماغير شاطر بكلمات ٍ يكررها
والنعم لكن بتال الوقت فيك انجضاع = من بعد عاشرت قوم ٍ مانعاشرها
سعوط المجانين
من بعد ذيك الخلافه زاد رتم الصراع = يالله عسى اهل المهاجر في مهاجرها
ان غبت فعرف انا الشاعر طويل الذراع = وقفاتنا كل خلق الله تذكرها
سلامة الجعفري
جتكم خلافه جديده جعل منها انتفاع = واللي هجر داركم ماهو بزايرها
لكن هون عن الدعوى وعلمك يذاع = واقول ماجد بطل وايل وشاعرها
24/02/09, (04:52 PM)
العرض الشجري