عاشر احبابه شجاع وفارق احبابه شجــــاع؟!!

[صالح العرجان]

من بغى الفرقا لقى له عذر وأسباب ودليل
......خل عنك العذر والأسباب دام الحب ضاع

كان ودك بالفراق ابشر عسآ عمرك طويل
..... لاتردد وانت لك كلمه ولك امر مطاع

لي عليك انك تبت بكلمه تشفي الغلـــيل
...... ولك علي اني لاوقف وقفة الرجل الشجاع

لاتجاملني مخافة قال ماادري خوف قــيل
........ عمر هرج الناس لايسمن ولايغني جياع

كان قصدك سر حبك اوعـدك لاصبح بخيل
... واحمل اسرارك معي للموت قدر المستطاع

بس قلها..قل مااحــبك وابشر بصبر جميل
. ... لاتحسبني اني من طبعهم لوي الذراع

صاحبك ماهــو كذا ياصاحب القد النحـيل
..... صاحبك طبعه غريب وغربته غربة اطباع

في الهوى مايقــبل الحل الوسط والا القليـل
.. مثل ماهو لاشرى يشري وليا من باع بـاع

ثابته لو هي تميل الارض حدره مايمـــيل
. ..يدري ان الفقر ماهو عيب والدنيا متـــاع

ماعشــق لذه حيــاته كثر عشقه للمستحيل
ولاكره حتى مماته كثر كره الانصياع

كم تعلم من شديد البدو وش معنى الرحيل
...... وكم تعلم من غروب الشمس وش معنى الودااع
كم تعلم من سحاب الصيف وش معنى الحصيل
وكم تعلم من ليال البرد وش معنى الضياع

ايه انا هذا طريقي موحش وصعب وطويل
....وانت لامن تعبت العالم فجوجه وســـاع

اعتبرني في بدايه سكتك عابر سبيل
........ ورح وانا قلبي معك من وين وجهت الشراع

يكفي اني لاذكرت في سالفه عشاق قيل
.....عاشر احبابه شجاع وفارق احبابه شجــــاع