صورة العدد تصوير الزميل أحمد عائض الشراري
إعداد - بكر هذال
يا بنت كثر البكا ما فاد
تمسكي لا تطيحيني
خلوك ربعك ولا نشاد
وتحجر الدمع بالعيني
يوسف مانع العصيمي - الحوية
وأنا أذكر الله يا شبيه العصافير
يا ممسكن بالغصن والقلب مربوك
يحفظك ربي عقب لقطه وتصوير
من طيحةٍ بالقاع أو غزّة الشوك
سعد الحمّاد - روضة سدير
يابنت لاتبكين ..ولاتخافين
صورتك حظك تنشر فالجريده
جمعه وتصبح صورتك بالملايين
وجمعه وتهدى لك بيوت القصيده
فهد بن محمد الكثيري - المزاحمية
ياشايلٍ طفلك على فند الأشجار
الفند يابس والخطر في البراري
حافظ على طفلك ترى الوقت غدار
عليت من غدر الدهر والجواري
غازي قاعد العتيبي - الدوادمي
يا أبن شرار البنت أرفق عليها
عمره صغير ومالها والكسافات
يم الملاهي ودها وامش فيها
والطلح خله للبهم والتويسات
عبد الكريم النغيمشي الربيعيه
لوطاح غصن الشجر طاحت معه دمعه
دمعة براءه من عيونٍ طفوليه
تناظر الروض في رحلة مساء الجمعه
مابين هلها وبين أجواء خياليه
حسين محمد القفيلي - نجران
ياللي وضعتوني على غصن اشجره
وعني ابعدتو ترى خوفي كثير
ما اقدر أهز الغصن خوفي لاكسره
واطيح ويصير العظم مني كسير
علي بن معاضة - الرياض
يا طفله الحولين توك صغيره
خلي التسلق مايفيدك حطبها
مغامراتك دون شكن خطيره
كم روح تشكي عجزها من عطبها
علي آل زولان الفيفي - بيشة
ياواضعٍ بنتك على فرع الاغصان
خوفتها والخوف بادي عليها
طفله صغيره مالها غير الاحسان
يالله عساها قرّه لوالديها
حمد بن عبدالله الوايلي - حوطة سدير
يا أبوي علّم خالي و قل لعمّي
ابك افزعوا لي قبل تومي بي الريح
و الا تجمّل بي و رح علّم امّي
قل لامّي اني باقي شوي و أطيح
عبد العزيز العتيبي - الرياض
بنتٍ صغيرة على الاغصان
اتصيح محدن ينزلها
ياكيف صارت على الشجعان
في وسط الاغصان علقها
رائد بن مناحي بن مسعد - القرين
يا أحمد ولد عايض ترى البنت بطيح
أمانة عندك وحافظ عليها
رح ودها الألعاب والا المراجيح
وخل الشجر والشوك للي يبيها
مشاري الغنام - ثادق
الطفله اللي على الاشجار مذهوله
من أجل صدره للاسف كيف تفزعها
هذا النقاط نقول اليوم وشهوله
ذي عادة خطره ويا كيف نقبلها
ريان محمد الخنيفر - الرياض
الله بسطها لكل الناس
والكل يجلس على هونه
الطفل حطه كما القوقاس
والله يستر لا يصيدونه
عبدالكريم عبدالرحمن السلوم - القرائن
طفله صغيره علقت بين الاغصان
راحوا أهلها للخلا واتركوها
قامت تصيح ودمعها يا هلي بان
خوفوا من الله يا لربع نزلوها
خالد بن ناصر المخيمر - روضة سدير
15/04/11, (05:41 AM)
شعراء من المملكة علقو على صورة البنت التي نشرت صورتها بجريدة الرياض
العرض العادي
