[[ خَفَايَا رُوْحْ تَعْبَانْهْ ]]

[أبو غرام]

يقول الشاعر ابو خالد
خلف الغريب :

يا قلب لا تضيق من دربك ومشواره=تكفى ترى البرق لاح الهمه الهمه
مس الاعنه لخيل الصبر ومهاره=وميدان صدرك فسيح وذمتك ذمه
درب المعزه حرام تردك اخطاره=اصبر على الشوك حتى تصعد القمه
والوقت لو كرر الغاره ورى الغاره=هذي طبوعه حلاه يذوب في سمه
مادمت مؤمن بربك فارض بقداره=والغيب ما اعطاه ربي صفوة الامه
ياحسين قلبي من اسبابك ضرب طاره=ومن اول يخطي الهاجوس ويخمه
ادير الافكار والايام غداره=هذي مطمه تروح وتقبل مطمه
المبتدا في زمان البس والفاره=مكسور لو قيل لك مرفوع بالضمه
وقت تعلت به اشراره على اخياره=ياطا العزيز ويعز النذل ما همه
يضحك ويبكي رزين العقل بادواره=والنور غطوه عنا عميه وصمه

فكان ردي :

يكفيك من منطلق شوفتك للحاره=كيف الشوارع ترز العفن والرمه
كيف العيون اتكابر عالي اسواره=لو ماعطاها لزاهي المجلس تلمه
الوقت ياخوك غامض غير اسراره=دنياه دنيا غدى فِمسلكه رمه
والطيب لو ينتشر ويفوح نواره=ريح العفن تقطعه بالساع متشمه
الصبر والعزم والهوجاس واغواره=مظلةٍ تمنع الطيحات بالغمه
والحظ والعرف والتخطيط وانواره=مع ماسبق تنتهض بالشخص وتزمه
هذي حقايق زمانٍ غير اطواره=في منهجه نرصد التغيير بالدمه
اكبر مصيبه يشك الجار في جاره=وش ترتجي من زمن غابر بلا ذمه

[أبو غرام]

وهذه ايضاً كانت من بيننا
وتشرفت ولازلت اتشرف بالتجاوب معه

ليش اضّيقها وهي اصلا ضياق=وليش اقصّرها وهي عدة سنين
العمر لو طال يختم بالفراق=وكلنا عن هالحياة مفارقين
من قبل تاكل من الدنيا طراق=عيش عمرك منت عايش مرتين
لا تحسب للسمين وللدقاق=الدقاق يزول ويزول السمين
وانظر بقلبك شف احوال العراق=تقتنع لاشفت دار الرافدين
والهموم اللي على قلبك رواق=فلها بالصبر والذكر المبين
ماحدن مع هالزمن سوى اتفاق=يوم عسر ويوم يسر ويوم بين
غامر بدنياك لو فيها اصطفاق=دلو ماء ودلو نص ودلو طين
مايزيد الرزق كثر الاحتراق=ولاينقص فيه حبك للثمين
ولايجي بالهم والا بالطقاق=ولابحرقة قلب والا سهر عين
القناعه كنز طول الدهر باق=والطمع ضيع كنوز الطامعين
واللوازم ودها رجل حقاق=دون ستر الوجه لايمكن يلين
بس حاول مايجي منك نفاق=وش حلاة الادمي من دون دين ؟

الصدى

في مسير العمر وقفه وانسياق=ودرب مظلم آخره واضح مبين
ياعشيري لاتقول الوقت ضاق=الجمل كتفه على الدايم متين
مايضيق ولايعيق ولا يعاق=عارفن قدره مع السر الدفين
لا اكتسيت الدين وايقنت المذاق=تكتشف دنياك مافيها غبين
والبلد لاشفتها تاكل طراق=اصح واعلم تالي الفسقه انين
اسع واسبح البحر وسطه عماق=وإنتشل در الجواهر والثمين
واحذر الهفوه سمينه والدقاق=لو يفوت الدق مافات السمين
العمر شاشة بياضن في براق=والخطا نقطة سوادن بالجبين
واللوازم مابها ميل وحقاق=واجبن توفيه مادامك رزين
الفتى حرن يطيق اللي يطاق=وان تمادى الوضع عدل باليمين
والحياة ابواب له فكرن وساق=وجاشن اجسر بالمصاعب مايلين
ان زهى بك حظ فجيت الزراق= وان تردى ماهو مقسومن يزين
الرضا تفاحة الصبر ورواق=عن هبوب السخط يوم الوقت شين
والحظيظ اللي مسيره بالفواق=ولامشى ماهو مدان ولامدين

[أبو غرام]

لو اكن الصوت يفضحن العيون=دام سدي فاح بيّن ماخفاه
الحزن والهم وأطياف الشجون=ديمةٍ هلت على جمري غضاه
مانفعني كثر تشييد الحصون=القدر وبله من أعلاه وسماه
ياجنون العشق ياعشق الجنون=ياعذاب القلب ياشعرة غلاه
ياهيام الروح يالروح الفتون=ياضباب الانس يالبرد ودفاه
يالعنود الفارع الخجلى المصون=يا أميرة حرف واحساس ومهاه
ياطشاشة عف في وقت المجون=يالطيفة حس وعظام ونباه
يابياض الثلج عن سود الظنون=يارحيق الشهد يازهرة حياه
في حضورك اكتمل مال وبنون=وفي غيابك دارت الدنيا ورحاه
مايهون الوضع عيا لا يهون=لوعة الفرقى شديده في لظاه
كنت اشوفك ضي فكر وزيزفون=كنت اعدك سدرة الحب وبقاه
كنت اظن الموت له قلبٍ حنون=ناسي انه عبد خادم للإله
يا إله الكون لك حمدٍ منون=والمصايب درب شايك للنجاه
طالبك يارب تفرغ للمتون=صبر وافر يروي الجاش وظماه
وطالبك مابين كاف وبين نون=تجمع الارواح بالجنه معاه
مانفعني كثر تشييد الحصون=القدر وبله من اعلاه وسماه
راضينٍ باللي جرالي لو يكون=جرح بعده غايرٍ وسط اللهاه
الصبر وإن كان فن من الفنون= الرضا تفاحته روضة جناه

[أبو غرام]

للكل اصحاب يفخر بهم وهم زملاء واصحاب له
منذ القدم
وانا كذلك .. ولهذه اتت هذه القصيده

شاش الفكر والقاف من شوشتي شاش=فـاض وتزبـد وانحـدر مـن مسيلـه
اروى قوافـل وافقـت وبـل ورشـاش=تـارد بحـور الشعـر تنهـل جزيلـه
تكتب عن الهقـوات كيـف الغثـا راش=وتسـرد حقايـق كاشفـه للهميـلـه
هبيتـي ياصحبـة ردى دربهـا مـاش=بانـت بوايـن جهلهـا مـن رزيـلـه
جذره عميق وزادها النبـت بخشـاش=ماتنتهـض مـادام روحــه قتيـلـه
ترضى تعيش العمر اسمه مع الـلاش=مـن ضيعتـه عيـت تسـوي جميلـه
كل الفعايـل عندهـا نقـص واقـراش=في سلمهـا بالطيـب محـدن يجيلـه
ودك تركـه بالخفـا داخـل خـيـاش=ترمي بها عرض البحـر مـع طويلـه
دام الشجر مايـل وسيقانـه هشـاش=مابـه ثمـر وان قلـت مابـه ظليلـه
جث الجذور اوفق من مقابـل اكـداش=والغرس حرثـه يجلـب اللـي تخيلـه
وشاش الفكر والقاف من شوشتي شاش=هـاض وتزبـد وانتثـر مـن مسيلـه
من صحبتن شاشت وشوّش لها الجاش=عنـد اللقـا تسـوى ربـوع وقبيلـه
حيـاكِ ياخـوة غـلا نهجهـا عـاش=علـى النقـا والطيـب دايـم حصيلـه
تاقف مواقـف ثابتـه مابهـا غشـاش=عكس الجمـوع اللـي تبـور بعميلـه
ثلـه ولكـن عـن طوابيـر واجيـاش=صملاتهـا تبـري الجـروح العليـلـه
اولهم اللي جاشه ابيض مـن الشـاش=عنـد اللقـا بالحـق يوفـي قبيـلـه
والثاني اللـي مدتـه ماهـي طشـاش=يكفيـك لوهـي ظاهـره مـن قليلـه
والثالث اللـي ماهـو نجـسٍ ونبـاش=يفـرض عليـك الـود قـدره تشيلـه
الكـل منهـم ماخـذن طيبـه وحـاش=مـع الكـرم والجـود يمنـى صهيلـه
والكل منهـم لا لفـى ميـل وغبـاش=ينـزل بكتـفـه للحـمـول الثقيـلـه
خالد وماجـد خصمهـم دوم منـداش=وسالـم معاهـم بالفـعـل مانزيـلـه
متكامليـن(ن) دون تفنيـد ونـقـاش=حازوا على الطـولات مـن دون ميلـه
هذي حقيقـة ماوصـل قلبـي ونـاش=من صحبـةٍ شافـت بصـدري نثيلـه
ظللتهم مـار الـردي فـض وانحـاش=عنـد اختبـاره صـار قلبـه دليـلـه
ذل وتخبـى مارفـع راسـه وهــاش=محـدن بقـى ياكـود نسـل الاصيلـه
فيهم كتبـت الشعـر تقديـر وانعـاش=للرفقـة اللـي مانـمـت به هزيـلـه
ومنهم فرقت الطيب عن شلـة ادبـاش=عاشـت حياتـه ظاريـه لذليـلـه
وختامها صلوا عـدد خفقـة الجـاش=على النبـي هـادي البشـر للفضيلـه

[أبو غرام]

نص شرفني أخي رعد الشمري بنشره
فله الشكر والعرفان مني .. فهو خادم للشعر والشعراء المبدعين
واختارني منهم .. فله مني كل الشكر والتقدير ماحييت
واختياره وشهادته وسام على صدري اعتز به وافاخر

عزي لقلبٍ ربّعت به صواديف=وألحانها من نزف جرحه تجره
تسمر على ليل العنا والتكاليف=وتطرب على شكوى القضى والمضره
وان كانها تضفي على القلب وتضيف=اضفت بلاوي كايده ماتسره
حمله ثقيل وباقي الحمل ماشيف=ولو ينتخي بالعزم فالعزم غره
خارت مطايا هقوته والتحاسيف=انشت سحابة دمعته من مقره
يسبق خياله برق ورعود ويقيف=يمنع شموخه هل وبله ودره
تسمع صهيل الضيم في خايع الريف=وتلمح على خديه كره وفره
كنه جمع حظه وزين التصاريف=وفي ظلمة الحرمان فكه وذره
ماعاد باقي له مع الوقت تعريف=على ضفاف الهم محدن يمره
قل الفرج ياكود طرق التواصيف=يطفي بها نارٍ بصدره تحره
باسه شديد ولا لقى له مجاديف=تاه بعذابه والبحر ضاع بره
من شاهده بالعين صدّق بلا زيف= ان النوايب تكسر اللي تمره
العام تذكر ضحكته باول الصيف=واليوم كن الضحك مايوم مره
يالله انا طالبك حقق له الكيف=عسى السعد ياتيه بالعمر مره
قلبٍ عرفته همسته حيف ياحيف=وإليا نطق دعيت لله دره
يرجي من الرحمن صبرٍ وتخفيف=ويبعد خفوقه عن تدابير شره

[أبو غرام]

انتي الغلا يا مهجة القلب والبال=وانتي رجا ضلوعٍ لشخصٍ يودك
ياغاليه لو يكثر القيل والقال=واكتب رسايل في هواك ومصدك
مابان لك خافي شقا الفكر والحال=ونفسٍ تنوح بدوم ليتن بحدك
مار الوكاد العمر لازل ماطال=ويكفيني اسعد بالرسايل وردك

[أبو غرام]

كان هذا رد من الشاعر .. محمد بن موسى

على نص حول النوم وتجافيه

ياللـي لقـيـت العـلـم بالله وده
.......................................وده علـى جائـز يفسـر معانيـه
وعطه الجواب وصافيـات المـوده
...................................وقله عسى الله يسعده فـي لياليـه
يالله عساك بطـول عمـره تمـده
.................................وتعطية من طيب الرغد لين ترضيه
لاشـك ياللـي فارقتـك المـخـده
....................................ومره تخم النـوم عينـك وتخطيـه
ذكرتنـي ياصـاح باللـي نــوده
......................................اللي يسر ويبهـج القلـب طاريـه
اللي ظروفـه عـن لقانـا تحـده
..................................واتلى العهد به يشكي الظيم والتيـه
هيضتني وانـا علـى بحـر جـده
.....................................وبيحت سرن للملا كنـت مخفيـه
اطلب عسى ربـك علينـا يـرده
...................................وترتاح عيني يوم نقـراء قوافيـه

وكان هذا هو الرد

الله يرد صويحبك من مصده=تسعد به عيونك على شوف قافيه
وطير الحشا من زود فرحك تهده=وتردد ابياته علشان تعطيه
فرحة لقا تاتي عقب طول مده=من دون علمك تنذهل في تمثنيه
تقرا كتابه ثمّ تعرف مرده=عن غيبته واللي غدا له بماضيه
يشرح لك اسبابه ويحلف بجده=ومن لهفتك تنسى عن الحلف تنهيه
مشتاق وقوله مامضى ارجوك عده=وانت بغرامك تايه وحالتك .. ايه
ماتنوصف ياللي على بحر جده=لذة شعورٍ بين قاضي وقاضيه
هذا رجا اللي عاف نوم المخده=يسهر طوال الليل والنوم جافيه
إنك تعيش العمر زاهي بحده=وتنسى زمان الهجر واللي جرى فيه

والشاعر محمد بن موسى من القلة القلائل الذين يفخر بهم الشعر وينتهض
اتشرف بالتحاور شعريا وفكريا معه