عقب البطا سلام تسليمة اسلام=سلام ٍ انقا من بياض السحابي
ابطيت لكن عذري السمح قدام=واشكر جميع اللي نشد عن غيابي
وانا بخير و عادة ظروف الايام= تحجز ذهاب و ملتزم بالإيابي
ملزوم بالرجعه و تحرير الاقلام=دام القصيد الجزل يحسب حسابي
وانا و شعري عشقنا ما هو العام=رابي معي وانا معه كنت رابي
اليانخيته فز مفزوع ثم قام=كنه اخوي و منحبس من صوابي
وانا لياشفته مشتت و منضام=افزع.. ومن يجرأ على الشعر هابي
و مادام عزي في خوالي و الاعمام=والله ما اخيب هقوة اللي هقابي
و ياطير ياللي كل ماجيت حوام=زعجت لك بالصوت ثم جيت بابي
وصل سلامي من مداهيل الاكرام=للي يحل معقدات الصعابي
سلم على المطنوخ و الدرب قدام=والذيب ما يخشى عوات الذيابي
و قل له علوم المرجله درع و حزام=و انا تعبت اشوف قصف الرقابي
وقل تحرق الرمضا متاعيس الاقدام=والعين يحرقها جفول السرابي
والحر ما يخضع لمملوك ما دام=نفسه عزيزه لو يذوق العذابي
ويا صاحبي حسبي على بعض الاحكام=اسلاّ شوي هناك والقى صوابي
ارقام ترفعني و تطرحني ارقام=مدري حساب الوقت و الا حسابي
يا بري حالي كل ما مرت اعوام=وانا بعمق الوقت حزني غدابي
أدور المرسى و ثم اتجه شام=على نجوم الليل فكري سرابي
وقمت اتذكر ما مضا لي من ايام=قبل البس عقالي و افصّل ثيابي
عفوية الطفل و متاهات الاحلام=تملا حياتي قبل ملي المخابي
مكسور خاطر عايش الوقت باوهام=واحزاني تبكي عيون السحابي
محدود تفكيري وانا اشوفه حطام=ما كنت اميز ميلتي و انتصابي
آمال كانت لكن آمالي آلام=فجأه لقيت الغير ياخذ نصابي
و اسكت مدام الضيم في داخلي نام=والصمت ستر جروحي و كل ما بي
والعذر لاهل المعرفه و اهل الاكرام=على قصور القاف و ايضاً غيابي
09/10/08, (11:48 PM)
عيون السحاب**
العرض العادي
