هذه القصيده تشرفت بإلقائها بالحفل الذي أقامه
الشيخ / هزاع بن عايش أبالروس العنزي
بإم رقيبه لعام 1433هـ عسى أن تحوز على إستحسانكم
{{ الوايليات }}
يقول من قافه على المطلوب صاغه وعسفـه=مادام الاجوى للشّعر ذعذع لها نفنوفها
شاعر ليا حوّل بروض الشعر مالاق قطفه=يتعب على بيوت القصيد وينتقي لحروفها
والكلمه الجزله لها يختار والهزل حذفه=حتى على شَفّه تجي والناس حسب شفوفهـا
في حفل شيخ ٍ منزله عالي وقدْره وشرفـه=شيخ ٍ تقدّم للمهمه ماحسب مصروفها
بالموقف اللي عن بني وايل تحيّزم ووقفه=عزوة بني وايل معه تعلن وراه وقوفها
هزاع بن عايش رفيع الذات محمود الصفـه=يِقْبِل ليا الناس ادبرت و اعطت عراض كتوفها
من روس قوم من السطر فيهم عجَاله وزهَفه=يخشى فعايلها الخصيم ليا شهرت بسيوفها
قوم ٍ تحدّدّ للجمل بالمعركه وتكتـِّفـه=دهامشه ستر الهنوف ليا زْعَجَت غُطروفها
عسى الله يعينه على حمْل ٍ على المتن نسفـه=حمل ٍ ثقيل ٍ ما قواه من الرجال ضعوفها
لجل الفخر يصرف مبالغ طايلات ومكْلِفه=واهل المكارم تِستحِِق يشاد في معروفها
سوّى مضيفٍ من وقف باقصاه ماشاف طرفـه=فيه الرجال اللي نباها ياهلا لضيوفها
الله يزيده ماحسب مال ٍ على العليا صرفـه=من جاه قال ضيافة الروسان غير بنوفها
وابو فهد مانمدحه والقصد قُرْبى ونهَفه=كل القبايل وقفته تشهد بها وتشوفها
شارك بوضح ٍ لونهن مقلول والفوز هدفه=لون البرد من مزنة ٍ قامت تهل قنوفها
منقيّة الروسان ضنّ اللي تحدى تِخْلفه=كم ناس من بعد مغزاها فكرتْ بنكوفها
تسلب عقول اهل النظر والذوق واهل المعرفـه=الله يكافيها عثوْر أيامها وصدوفها
ليامشت تبخترت ممشى الهنوف المترفه=تنظر لمعشوق ٍ غلاه أحدث دمار بجوفها
لاشافها راع الولع جا فيْه خفّه ورجفه=ومن الغمايض والقهر يالوف حاله لوفها
لياعرضَتْ قدّام لَجْنه شكلوها مِشرِفــه=تقلط على ذود ٍ تحدتها ثقه وتطوفها
إن جيت أناظر لـ رقبه وإلاّ لـ راس ولـ شعفـه=وإلاّ لـ طول أرقابها وأسبالها وأُنُوفها
وإلاّ لا ذان ٍ مثل روس الشلْف حَدّه مُرهفه=وإلاّ لـ وساع نحورها ونسنوسها وردوفها
وإلاّ لـ سنام ٍ منفهق لخلاف مافيه عجفه=وإلاّ نظرْت لـ عضدها والساق وإلاّ خفوفها
الوايليات إسمها كل ٍ سمع به وعْرُفه=وضح ٍ تهز القلب لاجت لك تهز دفوفها
باوصافها ضاع الفكر والموهبه ماتسعفــه=ندّر عفر ماكل من وصّف يجيد وصوفها
سبحان خالقها كذا بابداعه وبتصرفه=لعل عيون ٍ ناظرتها بِحِِسْد تفقد شوفها
في مهرجان أهل البل اللي كل من مر وصفـه=بأوصاف طيب ٍ كايفه يطرب لها مشغوفها
الموقع اللي كل سكان الجزيره تعَرِفه=اللي تواجد به عطايا الله بكل صنوفها
والجايزه بسم الملك عبدالعزيز مشرِّفــه=حامي بلاده في زمن شهب الذياب تحوفها
متوشح ٍ بالسيف الاملح وبيمينه مصحفــه=حتى قبايلها توحّد شملها وصفوفها
برعاية الشهم الكريم اللي رِحِمْ من خلّفه=مشعل هل الاذواد تدعو له برفع كفوفها
أخو المليك اللي تربينا وعشنا بكنفه=بحماه تامن مملكتنا ويتبدّدّ خوفها
كم من يتيم ٍ راف باحواله ودمعه كفكفه=وأغنى الفقارا وإنتهى جوع ٍ ضرب سرجوفها
هذا وباقي لي خبر لكم أباقوله وأكشفــه=من لاعرف من هو حمد خذها على مكشوفها
شاعر وضوّي جعفري واحْمَلْ بطاقة تعرفه=وربعي هل الجدعاء وامثلها وانا مكلوفها
منهاجنا واضح على الملّه ولابه لفلفه=ماكنّه إلا وضُوْح شمس ٍ ماغشاها كسوفها
وأنهي كلامي واختم بكلمه صريحه مُنصفــه=كل القبايل والنعم واهل الردى ذالوفها
"""" وسلامتكم """"
16/01/12, (12:11 AM)
{{ الوايليات }}
العرض العادي
