اقدم لكم اخر قصيده كتبها الشاعر الكبير الامير محمد الاحمد السديري (رحمه الله)..
ياقاتلي من غير ذنبن جنيته @@ الله يبيحك لو توطيت بدماي
والله لمشي لك على مابغيته @@ ياللي من اجل رضاك ترخص مناياي
لو انت تطلبني فؤادي عطيته @@ بلا ثمن يامورد الخد برضاي
شرفك عند ذنبن ينوشه حميته @@ وذنبك بقتلي والرضا منك مداي
القلب من بين الضماير خذيته@@ واصبح مقره خالين من حناياي
قلبي نهبته عنوتن ماشريته @@ وصفقت باليمنا على كف يسراي
ان جيت ارده بالحشا ماقويته@@ يبي حماك وفر من داخل حماي
واللي عذلني عن غرامك عصيته@@ على طريقك تسرع الرجل بخطاي
ومعروفك اللي نالني مانسيته@@ وانت الوحيد وغاية النفس ومناي
وانت الذي خافي ضميري كويته@@ وانت الذي تعلم بسري ومنهاي
وانت الذي زرعن بقلبي سقيته@@ ونور بشكات الزهر عقب الاذواي
وكتبن على قلبي كتبته قريته@@ اسمك وترجمته على القلب باسماي
وعدك ولو انه بليلن نصيته @@ نورك بخندس مظلم الليل قمراي
اليا ذكرته شاح قلبي وجيته @@ لو هو يسيل الدم من سبت ماطاي
ارضاك في غالي حياتي فديته @@ ارخصت غالي الروح برضاي وهواي
اتبع رضاك وكل حي جفيته @@ وامشي بشفك لو تعب كل حكاي
الياطر الي عنقك اللي لويته@@ اغيب بحلام السعاده بدنياي
على رحيق شفاك قلبي غذيته @@ وقطفت وردن من شفاياك بشفاي
وردن على خدك برمشك حميته @@ باهداب عكشن ظللن عقب الاغضاي
لولاك مرقاب العنا مارقيته @@ وجاوبت مفجوع الحمايم بنجواي
رجم على راس الطويله بنيته @@ اجيه واعلى طيتن منه مركاي
اهيض اللي بالضماير كميته @@ وطلال لو ناديت مايسمع نداي
لو ان ابوبندر قريبن نخيته @@ ان كان يفزع لي على كود بلواي
هو الذي من بدربعه رجيته @@ وعز الله انه عارفن غيب شكواي
20/07/11, (10:35 PM)
من القصائد الاخيره لـ الامير محمد الاحمد السديري
العرض العادي
