من اشهر ضحايا العشق
اشعار الرثاء دايما تكون صادقه وذات تأثير للمستمع والقاري على حد سواء
وذلك لكونها
اشعار تخرج من القلب ..
وقد قيل لاحد الاعراب مابال المراثي اقوى اشعاركم؟؟
فقال لاننا نقولها وقلوبنا تحترق...
هذا جواب لمن يسأل عن اشعار هذا الوقت مابالها ليس لها تاثير ..
والجواب انها لم تخرج من قلب متأثر ومشاعره تلتهب
وانما قالها شخص لانه متفرغ فقط
لذلك تاتي هذه الابيات باهته ليس لها تاثيرعلى من سمعها,,,
انظروا الى اشعار كتبها من مات عشقا او احترقت مشاعره عشقا او حزنا على موت حبيب
او فراقه واليكم بعض الامثله:
(1)- عبدالكريم الدجيماء من عتيبه والذي عشق وتم منعه من الزواج منها وعندما تم تزويجها
من شخص أخر وفي ليلة زواجها وجدوه ميتا في فراشه قهرا وهو القايل:
يا جر قلبي جر لدن الغصوني
وغصون سدر(ن) جرها السيل جرا
..
على التي مشيه تخطى بهوني
العصر من بين الفريقين مرا
..
ياليتهم عن حاجتي سايلوني
يوم اني اقف عندهم واتحرا
..
ان متت في راس الطويل ادفنوني
عسى نجيع البدو فوقي يمرا
وكما ترون مع انها ابيات بسيطه بكلماتها الا انها لذيذه ولها تاثير قوي على المستمع
لانها خرجت من قلب يحترق
وهاهي بالرغم من مرور السنين عليها لانزال نتلذذ عند سماعها بكل وقت وكأننا اول مره نسمعها
(2)-فهد ولد الحضريه من العجمان قصته نفس قصة من قبله(الدجيماء) وحدث له نفس
الامر ووجدوه ميتا في ظل شجره عندما زوجوا حبيبته لشخص ثاني فقال قصيده مشهوره
بقيت بالرغم من مرور السنين جوهرة من جواهر تراثنا الشعري الاصيل وهي :
نطيت لي مرقبن والليل ممسيني
بديار غرب(ن) ياعل السيل ماجاها
..
اضحك مع اللي ضحك والهم طاويني
طويت شنون العرب لاقطروا ماها
..
هبت هبوبن شمال وبردها شيني
ولاتدفي النار لو حنا شعلناها
..
مايدفي الا حضن مريوشة العيني
اليا رقدنا ومزينا شفاياها
..
ياعل من لامني يربط على ديني
واتلى حلاله ذلولن راح يطلاها
هذه الابيات نسمعها منذ الصغر ولانزال نحبها ولم نشعر بملل من كثرة سماعها لان فيها
روح ومشاعر حقيقيه علما ان هناك ابيات على قافها لشاعر من قبيلة مره تتداخل معها دائما ,,,
(3)-ابراهيم الكنعاني والذي عشق بنت عمه (شريفه) وتزوجها وعاشوا بسعادة الحب
ولم يمضي سوى سبعة اشهر حيث اصيبت بمرض الجدري المميت والذي لم يكن له
علاج وعندما بدأ العد التنازلي لوفاتها صدح بقصيدته المشهوره والتي تملأها الاحزان
المختلط بدموع الاسى والوجد وهي
ياحمامن على الغابه ينوحي
ساجعن بالطرب لاواهنيه
..
قلت حيه ولا كنه بيوحي
مر عجلن ولا سلم عليه
..
روحي روحي بغت روحي تروحي
يوم قيل الغضي بان جدريه
..
كن في ضامري قدر(ن) يفوحي
او غروب(ن) توامى في ركيه
..
ياشريفه متى ودك نروحي
يم ديرة هلك يالعسوجيه
..
قالت اصبر يطيبن الجروحي
شهر واحد وهاتو لي مطيه
..
جعل زمل(ن) يبي خلي يروحي
ينكسر في شعيب الصالحيه
ابيات مليئه بالوجد الصادق الحزين فجاءت صادقه وعاشت على مرور الزمن بالرغم من
بساطتها في حين ان هناك ماهو اقوى منها شعرا لكنها اندثرت لانها لم تكن صادقه ولم
تشعر بصدق الوجد في طيات كلماتها...
(4)-محمد بن عمار المعروف بحايل باسم (ابوخيشه) وهو من اهل (ثادق) تولع
بحب فتاة فقرر اهل البنت قتله لذلك امر الامير في ذلك الوقت ان يتم ابعاده عن البلده
حفاظا على حياته فأجبره اهله بالرحيل الى (حايل) وفي حايل شاف بنت ماتتغطى بعد
عمرها 13 سنه والعجيب انها كانت صوره طبق الاصل من محبوبته اللي في ثادق فهاج
غرامه مرة اخرى واصبح يتابعها ولكي لاينتقده احد لبس خيشه على كتوفه كأنه مجنون
ولم يلبث ان مات وقبل وفاته قال (الالفيه) المشهوره والتي منها :
الف اولف من جوابٍِ نظيفي
ودموع عيني فوق خدي ذريفي
..
من لام في حب الحبيب وليفي
دقاق رمش العين سيد الخوندات
..
خوندات للي ما بعد عاشرنه
قله تراهن بالهوى يذبحنه
..
قلبي وقلبك من عروقه خذنه
عزي لمن مثلي تعرض للافات
..
البا بليت بحب خلي على ماش
ولاحصل لي منه ما يبرد الجاش
..
غديت انا واياه طاسه ومنقاش
بالوصف كنه يالمعزي سلامات
..
سلامات اللي كلهم يذكرونه
يبي المعزة بس ذاق المهونه
..
يقول طيب مير غارت عيونه
سبب ولدكم واحد صابه ومات
..
التاء تبعت الزين والزين مقفي
امشي وحتفي شايله فوق كتفي
..
لاشفت مجدول وكتف وردفي
ماقوى التفت لو طوحولي بالاصوات
..
اصوات قالوا ياهبيل وسايح
طرد المقفي يالشقاوي فضايح
..
قلت ماريد اشواركم والنصايح
مثل المطر فوق الطياس المكفات
..
الثاء ثمانه حب رمان طايف
او قحويان ٍ في رياض ٍ عطايف
..
متنقلٍ بالزين سيد العفايف
عمهوجة ٍ فيها من الحور شارات
..
شارات فيها من ظبي الحمادي
هي لذة الدنيا وغاية مرادي
..
وان كان راح صويحبي من بلادي
عليه جاوبت الحمامة بالاصوات
وقد قال الكثير من الشعراء ( ألفيات ) كثيره لكنها لم تصل لمرتبة هذه فقد جمعت الحب
والالم والحكم والامثال وقبل هذا وذاك الصدق الذي لايوجد في الكثير من اشعار الناس,,
(5)- عويض النفيعي من عتيبه والذي عشق وحرم من الزواج منها فقال الاشعار الحاره
حزنا وألما عليها واشتهرت قصايده عند الناس واشهرها :
الا واهني اللي ليا من بلي صبر
صبورن على الفرقاء لياغاب مظنونه
..
وانا دمع عيني كل ماهل من شهر
هماليل واغضي عن هلي لايشوفونه
..
سقى الله ليال(ن) عشت فيها وانا بزر
وانا دالهن مدري عن العشق وشلونه
..
عسى من منعني منك يالابس الحمر
يجيه العمى والناس كله يخلونه
وهي ابيات كانت تغنى سامري في المناسبات واشتهرت على لسان الكبير والصغير,,,
(6)- فهد الحمد الغسلان(العود) والذي منع من عشقته لكنه كتم ناره ومشاعره لكني
لمستها حاره في اشعاره التي سمعتها من افمه رحمه الله ومنها :
واعذابي واعذابي واعذابي من عذاب
عذبن زين الخيال الله يعين المستعين
..
عذبني عذبني بالهوى تلع الرقاب
واودعني واودعني مثل عودن بالبطين
..
والثنايا والثنايا كنهن ضيق السحاب
والنهود قعود كنه بالوصايف طلع تين
..
يوم داره واستداره بالمعانق والثياب
كالقمر يوم يتعمر بس انا وش باليدين
..
سمي خلي يوم احلي بالجراب عن التراب
وان زعل خله يعله يبي غيري مايبين
(7)-سعود ابوصلاق الجميلي ( خلوي)0
والذي سطر رائعة الوجد والغزل عندما شعر بعدم الجديه من الانسانه التي احبها قلبه فقال الكثير من الاشعار الجميله
والمؤثره ولعل اشهرها على الاطلاق:
لاتكاثر جيتي يانظر عيني
الله اللي جابني لك ومشاني
..
احسب انك مثل مااغليك تغليني
مادريت انك عدو(ن) وقوماني
..
مااحسب ان لك يااريش العين قلبيني
قلب مبغضني وقلب يتمناني
..
تحسب ان الله قطوعن يخليني
يوم تكفى الحوض في وجه عطشاني
-وعبدالرحيم المطوع التميمي راعي (نقى المطوع)واللي مات بهالموقع وذلك انه
تزوج بنت اقل نسبا منه بالسر وذلك لشده جنونه بها ولكنها افشت السر مما دفعهم
لابعاده عنها فقال:
يقول التميمي الذي شب مترف
مدى العمر ما شيء في زمانه جاه
..
يا ركب يللي من صحّي تقللوا
من نجد للريف المريف مداه
..
رحلنا من جو عكلا وقوضوا
على كل هباع اليدين خطاه
..
طووا بنا الدهنا والإنسان ماله
إلا أن ما يكتب عليه لقاه
..
لقوا جازين في دوحة مستظله
حماه عن لفح السموم ذراه
..
خذوها فلا بالرمح زرقن ولا العصا
ولا قلطوا حبل العقال عصاه
..
غشاها لذيذ النوم والنوم كم غشا
من الناس حذرن وابتلوه عداه
..
فقلت نحواني ومثلي مثلهم
يشكي اليا من الزمان وطاه
..
دعوها بيلن كود من ذي فعايله
يجزى على فعله يشوف أمناه
..
يا شمل يا مامونة الهجن هو ذلي
إلى دار من يصعب على لقاه
..
ادقاق حجل أطراف يا ناق وإن طرا
على البال زاده من عناه شقاه
..
محا الله قصرن حال بيني وبينها
نجمن من المولى يهد أبناه
..
أبغي الياهد العلا من قصورها
تذهل عطيرات الجيوب حياه
..
يظهر عشيري سالمن من ربوعها
هذال مطلوب الفتى ومنه
..
ألا عيني الياريت صاحبي
جضعيعن لغيري واحترمت لقاه
..
يصير مملوكن لغيري ويهتوي
وساقيه ما ينحي عليّ بماه
..
دع ذا وسل وأيها الملا في محلتم
سرا يفتح الظلما شعاع سناه
..
لا تكن بأمر الله تطلق أركونه
عزايله وصف السحاب أرداه
..
حوراك تبني والذراعين زجن
من الريح زعاجن وطار سناه
..
وطا ما وطا واللي محا بعد ما نجا
غطا ما وطا واللي وطاه غطاه
..
محا ما محا واللي محا بعد ما نحا
محا ما محا واللي نحاه محاه
..
عصا ما نصا واللي عصا بعد ما نصا
نصا ما عطا واللي نصاه عطاه
..
وإن كان لي ظن وهاجوس خاطري
قد حال بين البازمين غشاه
..
من باعنا بالهجر بعناه بالنيا
ومن جذ حبلي ما وصلت رشاه
..
إلا قفا جزا الأقا ولا خير بالفتى
يتبع هوى من يطيع هواه
..
خليلي يشادي خاتم العاج وسطه
تقول انفرج لولا البريم زواه
..
خليلي خلا قلبي من الولف غيره
عفت إلا خلا والخدون حذاه
..
خليلي ولو جا البحر بيني وبينه
ذبيت روحي فوق غية ماه
..
خليلي لو يرعا الجراد رعيته
أهظله من حشمته ورصاه
..
خليلي لو يزرع زريعن سقيته
من الدمع وإن شح السحاب بماه
..
خليلي لو يبرز على الثرا ريقه
إذا سكر والتاجر يزيد شراه
..
خليلي ولو يطا على قبر ميت
بأمر الولي حاكاه حين وطاه
..
خليلي معسول الشفاتين فاتني
كما فات لقاي الدلي رشاه
..
كن عن صغير السن حذرن ولا تكن
دنو عن الياشفته بس سفاه
..
أن كان ما جاوز ثلاث مع أربع
وعشر فلا يشفي الفؤاد لقاه
..
تعاديه ما يدري تصافيه ما درى
ما سمع من غالبي الحديث أحكاه
..
عضيت روس أناملي في نواجدي
وقلت آه من حر المصيبة آه
..
لو أن في قول آه طب لعلتي
كثرت أنا في ضامري قول آه
- هناك ثلاثة اخوه من الجلاعيد من الدهامشه من عنزه ماتوا واحدا واحدا وكلهم بسبب
العشق وامهم لاحيلة لها وهي ترى ابنائها يموتون واحد واحدا امام عينيها00
الا ان هذه القصه لم تشتهر لعدم وجود قصيده في وقتها او انها ضائعه وقد ذكرتهم في قصيده
لي ومنها:
دخلت الهوى عجلن جهولن تقل مطفوق
شفوقن على ذوق الهوى مع غناديره
..
وانا خافقي يشبه محبة هواوي روق
سريعن هلاكه عند وضحى مغاتيره
..
وماتوا جلاعيد الهوى مع جميل الطوق
ثلاث اخوتن ماتوا سبب لاهب الغيره
..
خبرهم بتاريخ المحبه مهو مسبوق
ودمع امهم يشبه جواري مغاديره
..
ذبحهم غرام الجادل الفارع الغرنوق
عنودن تسل الروح كشخة تنانيره
..
غدى ثوبها الضافي من اردافها مفتوق
والارداف تطرق بالحنايا مساميره
..
يعيش الخفوق اللي لمح عينها مسروق
ولا احدن عرف عسف الضماير وتصخيره
..
وانا مع هل الريشاء غدى خافقي محروق
واخاف الغلا تكتب هلاكي بتقريره
..
مدامي لها عاشق ورمشه هو المعشوق
لها حق في طعن الحبايب وتكديره
02/04/11, (10:52 AM)
من أشهر ضحايا العشق
العرض العادي
