صوت وصدى [خالد الفيصل - نجديه]

[عبدالرحمن اليمني]

يتبع

الكل منا يعرف الأمير خالد الفيصل (دايم السيف)

وكثيرا منا يعرف الشاعرة (نجدية)

ولانها اختارت لها هذا الاسم دون الافصاح

فالكثير قالوا ان نجدية زوجة الامير خالد الفيصل والبعض ذهب الا انها مجرد شاعرة تجاري قصايده للشعر لا غير

ولكن من خلال مفردات قصايدهم ومن مبدأ أن حديث القلوب لا يستقر إلا بالقلوب

نكاد نجزم ان نجدية هي (ام بندر) التي قال فيها ابو بندر

لك يا عنود الصيد حرفي ومعناي . . . عــمري قصـيدة حـب قدمتــها لك
معك أشرقت شمس المحبة بدنياي . . . صورة قصـيدي لمـحة من خيـالك

المهم في الموضوع ليس من هي (نجدية)

انما الاهم هو الشعر

نترككم مع هذه الروائع الاربع بين (دايم السيف) و (نجدية)

(1)
قصيدة (لا يطول غيابك)
(دايم السيف)

لايطـــوِّل غـــيابك ثـمٍ آخـــذ عــليـه...........
...........لو تخلَّــيت عنّـَي عنك قلبــي تخلّـَـى
العــذر و التعــــلِّل والحكـي مانبـيـه...........
...........من تحــرَّك فــؤاده بالهـــوى ماتغلَّـى
طبعي الصبر لكن وش عليه أرتجيه...........
...........من طويل الصَّبر يعقوب وأيوب ملاَّ
دامني حي عطني وش بقى نحتريـه...........
...........ما أبي دموعك الَّلي عقب موتي تهلاَّ
مابقى بالعُـــمُر مقدار مــاراح فــيـه...........
...........كلِّ مـازلِّ يومٍ .. يوم بالعُــمر ولَّـى
مايعرف الجــمر مثل الَّــذي يكتويـه...........
...........أحــد يدفا بنــاره وأحد فيه يتصـلَّـى
يامن القلــب حطَّــيته براحـــة يديـه...........
...........مارِضـى له مكانٍ غير كفَّك محــلاَّ
كم تعــذَّر وعيَّا عن هــوى مهتويـه...........
...........لين طـاح بيمينك بالغــرام وتجـلَّـى

الرد (لو تخليت)
(نجدية)

لو تخـلَّيتِ وش لي بالحــيـاه أرتجيـه...........
...........لو تخلَّــيت ماعــنَّك خــفوقـي تخـلَّـى
والله إنَّـــك ملكــته ثـم تربَّعـــت فيـــه...........
...........ومال غيرك حبيبي وسـطِ قلبي محـلَّ
ياهَنــاه وعذابه كــيف تِقسـى عـــليـه...........
...........كيف طاوعكِ شِعرك بالمِشاعر تِسلَّى
لاتِجــنَّى تـراك الَّلـي حبـــيبـه يبـــيـه...........
...........ولاتزيـــده تراه مــن الغرابيـــل مـلاَّ
إنتِ فرْحه وجرْحه. وإنتِ مايمــتنيـه...........
...........وإنتِ مضــنون عـينه لو عليكم تِغلَّى

(2)
القصيدة
(دايم السيف)

لو يبــور المــلا ما احـسب حبيبي يبور...........
...........وأحــسب اني أمــوت ولا يمــوت الوفا
وأحــسب انه على هــاك المـودة غيور...........
...........ما احـسب ان الشــعاع اللــي بقلبه طفا
كيـــف يا نور عــينى وانت للعين نور...........
...........يخـتفي نور وصــلك في ظــلام الجــفا
اثر قــلبك على فــرقا الولايف جـسور...........
...........واثر طـرفك اليا سـهرت عــيوني غفا
وين هــاك الونين اللــي يشق الصدور...........
...........وين هاك الدمــوع اللــي تشــق الصفا
كل حــي ٍ الــــيا دارت ليالـــه يـــدور...........
...........كل قلـــب اليا عــــفت جــــروحه عفا
ويل قلـــب توالت فوق جــرحه كسور...........
...........كن جرح الهـــوى يا صـــاحبي ماكفا
التمس لك عذر لو كان ما أنت معذور...........
...........وان جـــحدت المــوده بان لك ما خفا

الرد
(نجدية)

لو يبـــور المـــلا ما ظـن حـبي يبور...........
...........لو تغــدر الليــالي ما يمـــوت الـــوفا
والله انـي على صــفو المـــودة غيور...........
...........والشــعاع بخــــفوقي يتـــقد ماطــفى
نـور عــيني حــبيبي دوم للعـين نور...........
...........شــوق قلــبي لحبه في وصــال وجفا
واهنــي الخــليل اللي عزوم وجسور...........
...........ســاهرات عـــيوني يــوم طرفه غفا
ســلوتي بالونـين اللي يشق الصدور...........
...........وبغــزير الدمــوع اللي تشـق الصفا
طــال ليــل المــعنى والليــالي تدور...........
...........وعـفت عــروق قلبه والشـقي ماعفا
زادني بعد خلي فوق جرحي كسور...........
...........يازمـــاني ترفــق ماجــرى لي كـفا
وانت يالايمــي والله مانـت معــذور...........
...........يومك اتهمــت حبي بان لـك ماخـفا