رحلة التكوين ,,,

[احساس قلم]

[رحلة التكوين]..!

وحزنٍ ينغمس فيني عبث ويعيدني للطين
واتمرغ بصلصــال الوجود وانفث اقداري

ثمان شهور والتاسع أغيَر رحلة التكوين
وأترجم مضغتي للجاهلين بـ لكنة اشعاري

وجودي يعني الروح وغيابي يعني التخمين
إذا غبت (أتخلَق) غيمتين وتسكب امطاري

فراغات النوافذ يالهواء هي خلتك تنــين
وترميني فزع وأتلاحقك يا صرخة جداري

نبض فيني وطن/اصبع وطن يستكثر التهجين
اغسَل له صباحات العمر وامشط اسفاري

اغني له ولائي وانتمائي رغم عني لين
يقابلني بنكران الوجود وأحزم اعصاري

لإن الملح في عرفي شرف ما يقبل التقنين
إذا ذاب يتلاشى كوكبي ويطيش مسباري

قبل لا تحَلق الشمس بصباحي بسرق جناحين
وألمَك يا مسَاي وأرفض التطبيع بافكاري

سترت اللي سترت ولا اتحمَل من غباك الدين
ولا اقبل بتلويحك وفستان العـرب عاري

مشيمتنا يخالطها تمـرد يعبر الحدين
مشيمتهم يخالطها تجرد يقذف أسواري

لذا ربيت صوتي للسنين وقلت له بعدين
ورميت بإلتفاته للوراء وسالت اعذاري

وجيت اهرب بتفكيري كذا وأسربل الكفين
وأستنشق بقايا موعدي وأطيَر ازهاري

يا حزني لا تفززني عبث وتعيدني للطين
لان مابي كثر مابي وجودٍ يقبل اقداري






.. سعد معيوف

[غموض الشمال]

صح لسان شاعرها..وتسلمين اختي احساس على روعة الإنتقاء..

طبتي وطاااب منقولك

تقديري لكي

[محمد بن موسى]

احساس قلم

نص راقي واختيار مميز يدل على ارتقاء ذائقتك الشعريه

دمتي بود

[مشهور الرشدان]

وجودي يعني الروح وغيابي يعني التخمين
إذا غبت (أتخلَق) غيمتين وتسكب امطاري

صح لسان شاعرها وسلمت يمينك احساس على نقلها
شاعر رائع البيت هذا اعجبني شكرا لك على هذا النقل
دمتي بحفظ الرحمن

[سليمان مفضي العنزي]

قصيده مميزه

صح لسان شاعرها وشكرا لك اختي احساس على الذائقه الجميله

وعلى ذكر اسم الشاعر مع القصيده

[سعود المسعودي]

صح لسان شاعرها وشكرا لاختيارك الجميل