السلام عليكم ورحمة الله وبركاته
هذه قصيده موجهه لشاعر عنزه الشاعر / عبدالله بن عبار
وحبيت اني امر اسلم عليه واسلمها له شخصياً
لولا قولهم انه غير منزله ومنزله الجديد ماندله
اترككم مع القصيده فهي معبره عن نفسها
،
،
،
،
يا لله يامنشي ثقيلات وخفاف = ياعالم ما بالبحور وراها
يا مقسم ارزاق المخاليق بانصاف = ويامعيد للقاع الهميده حياها
من عقب ماهي جرهد صارت ارياف = برحمتك يارحمن ذعذع هواها
ليا رادها الرواد يبحل بالاوصاف = مثل الهنوف اللي زهاها حلاها
متشابك نوارها كاسي الاطراف = من كل صنف ونوع رزقك غشاها
يا فارج لأيوب من هول ماشاف = شاف البلاء والروح زايد عياها
صبر على جور الليالي والاجحاف = صبر ورحمتك العزيزه رجاها
ماغيرك اللي بالمخاليق رواف = فرجت له والروح جاها شفاها
وذا النون وسط الحوت بالجوجها طاف = كبر وصلى وقدرتك مانساها
يافاهم مقصود يّس مع كاف = في محكم التنزيل كلن قراها
ياللي جعلت الليل لنجومها لحاف = والصبح نورن يكشف اللي غطاها
طالبك يالمعبود يوم القدم حاف = يوم به المرضع تخلي ضناها
طالبك عفوك يوم الارياق نشاف = والنفس عن نار الجحيم تحماها
وخلاف ذالك فكرنا ينظم القاف = ماهو غزل باللي شعرها كساها
الفكر زايم والقلم صار غراف = يغرف من بحور عميق مداها
باسباب قول اللي من الرب ماخاف = حسبي على الله كيف قلبه رضاها
انكر نسب ناس سلاطين وعفاف = انكر نسبهم والدلايل شناها
اخوان مريم نجمهم بالسماء يشاف = وافعالهم جيلن لجيلن حكاها
الجد وايل مابها شك وخلاف = عمارات بالتحديد كلن رواها
بالكذب والبهتان للخلق حذاف = ونفسه على درب الرديه زواها
مثل الحنش يلدغ وللحق بلاف = اخوان مريم كيف قرر فناها
يا راكب اللي بالسماء توجف وجاف = لولا المكابح لثريا حداها
سودا شبح مامشيها تزحف زحاف = مثل الشهاب اللي يدور بفضاها
صنع اليهودي دبل امبيرها اضعاف = من سرعها يصعب بعينك تراها
خذلك كتاب ناظمينه على آف = مثايل ابن حزوم فكره بناها
ملفاك بيت اللي للاجواد ميلاف = عبدالله العبار هو منتهاها
رجل كريم وبالمواجيب عراف = ونفسه على طاعة وليه هداها
يفرح بهتاش الخلا حين ماظاف = وبمقابله روحك تضيع شقاها
شاعر بني وايل وبنسابها ناف = ذروة سنام المجد مثله رقاها
سلم عليه وسلمه مني القاف = وقله ترى ابن دهام بيح خفاها
وش علم خلق الله غدا طبعها جاف = تكفى يابو مشعل وش اللي بلاها
الحر اشوفه بالزمن للعلا عاف = ونفسه عن دروب المعالي نحاها
والجار عن جاره تقل دق بكتاف = ورجله تثاقل للفضيله خطاها
هذا كلام سعود والقلب شفاف = وعن الخطاء والظلم صدره نقاها
وصلاة ربي عد من بالنظر شاف = وعداد من خط الحروف ومحاها
على شفيع الخلق محمود الاوصاف = صلوا عدد رمل البلاد وحصاها
23/10/05, (01:02 AM)
عبدالله العبار هو منتهاها
العرض المتطور
