" حمــرا من الجيـش "....

[المسيكي]

[size=3]

السلام عليكم ورحمة الله وبركاته

مساكم الله بالخير جميع ...


هذه القصيدة من بدايات قصيدي ،، وهي مسنده لشاعر عنزة / عبدالله بن عبار العنزي...

وان صح القول اول قصيدة اسندها لشاعر ...

تقريباً كان ذلك قبل عام ونصف...

والذي دعاني لوضعها هنا طلب بعض الاصدقاء مع تحفظي عليها.......[/

size]

ياراكب ٍ من فوق حمرا من الجيش = حمرا حماره مثل ضو المناره
حمرا هميم مجهزة للمطاريش=ليا مدت اسرع من جديد الغماره
ماهي من اللي مرتعة بالقشاويش=ولاكدنت تسنا الدلي من بياره
مرباعها مابين حلوان والريش=حايل ولا دورج بثرها حواره
ماهمها لو دربها به تعاكيش=وعليها غلام ٍ ضاري ٍ بالجساره
قم يانديبي ود قاف ٍ على ايش = ثم اوصله للي سديده اشواره
يم ابو مشعل ستر ضافي العكاريش=الوايلي بالطيب بانت اخباره
ملفاك ابن عبار نسل الحناتيش=اللي ليا جاه الضيف يلقا وقاره
اللي يهبش البن بالنجر تهبيش= مع دلة ٍ يعجبك خنّت ابهاره
فنجاله يجلي غم روس مداويش=شرابه افضل من شراب الزقاره
وعقب المهيل حط حيل ٍ على عيش=حيث الكرم طبعه وسلمه وكاره
من ساس لابه بالملاقا مداغيش=كان اعتلوا بالكون قب المهاره
أولاد وايل يوم عصر التحاويش = اركوا على كبد المعادي مراره
يوم اللقا يردون ورد المعاطيش = فوق الرمك والجو كتم غباره
عدوهم صابه رعاب ٍ وتشويش =ربعه كعام الضد لاصار غاره
بالكون يروون الرماح المراييش=وكم فارس ٍ مجدوع بارض المعاره
ماله عن الثنتين لو طار بالريش=إما اختيار الموت والا فراره
هذي فعايلهم بعصر التناويش = بين القبايل لابتي بالصداره
قلت الصحيح ولا عليّه تباليش=واللي جحد مااشكل عليه انكاره
قلته ولاابي انبش العلم تنبيش = ويكفيك عن كثر الكلام اختصاره
الطيب لاهل الطيب مابه تغابيش = والمرجله ترها للاجواد شاره
والا الردي يامسندي كنه اكديش =العفن عفن ولاذكر به نماره
الله يكافينا شرور المغاشيش = لابد من بعد الصعود انحداره
اليوم صار الحر يخشى الخفافيش =والذيب الأمعط قام يخشى الجفاره
يالقرم ليش الجار يامسندي ليش = يزهد بجاره ما يمره زياره
وان كان ماتدفع هدايا وبخاشيش= لاصار لك لازم تشوف الحقاره
الكذب كثر وعشش الحسد تعشيش =ولا عاد عشب القاع ينبت خضاره
اشوف خطو الولد كنه احنيش= يلدغ وهو ملبد بوسط الخباره
تحسبه وليده ومن وجيه ٍ مباشيش= لو قلت له يمناك قدّم يساره
توازنت لاهل القلوب المخاريش =فازوا على صمع القلوب بجداره
تجهد وجهدك عندهم صار تفنيش = والكل منهم عندك العيب داره
كلامهم يجرح مثل لذعت الفيش =كلن على مجادلك يبي اشتهاره
مثل الكلاب اللي تدور العراميش =عقب الغلاث الكلب زاد استعاره
خبث وحسد وهبال الا ومعه طيش =ماعندهم غير النكد والقماره
اوصيك طنش دايخ العقل تطنيش = والذيب ماقزاه نبح الجعاره
ابعد عنهم لو كان تسكن خرابيش=جهدك لعفنين الطبايع خساره
ووالله ماقصدي من القول تحريش= مار البلا بالقلب زاد اضطجاره
ياليت قلبي دالهن كالدراويش=ينسى ماجاه ولا بقلبي حراره
لو حاجته مجدوعة مع مطاشيش= تركها لو هي عنده بداره
قلته ولا ودي بذكر الهواميش = عطيتك المضمون بزين العباره
وصلاة ربي عد وبل المراهيش= واعداد منبوت الفياض وبذاره
على النبي الهاشمي صفوة اقريش =شفيع الامه عن لواهيب ناره

وقد رد الشاعر عبدالله بن عبار العنزي بهذه لقصيدة

ا :

مبداي في منزل حقوق الجواهيش= سحب المزون اللي تهل بغزاره
ديم تصب سوات صب الخراطيش=وتسقي جراهيد الوطا والقفاره
مولاي خلاق الملا منبت الهيش =اللي جميع الكون يعلم اسراره
جالي بصر يعقوب عقب التعاميش =في قدرت المولى تجلت ابصاره
رب العباد مزيل هم المباليش = معتم دجا ليله وموضي نهاره
وبعد ذكرالله ننقش الخط تنقيش =سار القلم والجاش هاضت افكاره
حي الجواب اللي لفوبه مطاريش =وحي الذي وجه علينا مساره
مهديه قرم ٍ ماسلك مسلك الغيش =فهد سليل الليث نمر النماره
الوايلي ما طبش القيل تطبيش =عنده على بدع المثايل شطاره
من لابة ٍ يوم الشوارب مكاليش = اللي يناطحهم جداه النياره
يوم الموازر صوتها له لواليش= دلاق هم عوق الخصيم ودماره
واسنادهم جمع البطيني هواويش =سقم الحريب وبالحرايب سعاره
اللابه اللي يكرمون الهواتيش= يوم ٍ به المسعر قليل ٍ دباره
عاداتهم مايذبحون الكرافيش = كود السمين اللي عريض فقاره
مايحضرون الكيل في قلة الخيش = يوم الردي كيسه يجوّد اصراره
يافهد افيدك كان نشدتني ليش=تقول ليش الجار يزهد بجاره
الناس كلن حط روشن وكرنيش =كما ترى جانا زمان الحضاره
والجيل هذا جيل نيدو ونفيش= بعض الشباب اسلومهم مستعاره
الشمغ عافوها ولبسوا طرابيش = كيف الفتى كاب الفرنج اختياره
ليا شافوا الشياب قالوا شواكيش = خيبه وكوبه وانحطاط ودشاره
كثر العقوق وبوش العقل تبويش = عصر ٍ به العاقل يضيع افتكاره
ان كان تذكر بالعرب من بهم طيش = اهل المفاسد والحسد والقماره
اللي يمطط ملسنه تقل بربيش =يجمع حكي مابين مكر وعياره
سود القلوب مقبقبين الفرافيش= بين القرايب يقدحون الشراره
لو جمّعوا من زايد الهيف حتّيش=ماهمني راع الحسد والنغاره
ماحب كثر الطهبله والقراويش = والجاهل المجهول مابغى شجاره
من لاعب السنور صابه مخاميش = يصبر على مضرب مخالب اضفاره
خطو الرجل مايفتهم كود تجحيش =تاه الطريق ورام درب القشاره
هذاك مثل اللي مناداه تقريش = تكرم عنه يشبه اتان الحماره
ماينظف المدنوس يالقرم ترويش =ماظني الصابون يجلي سماره
وصلوا عدد مارفرف الطير بالريش = على النبي عد الرمل والحجاره

وسلامتكم

[الواطي]

اللله ...الله

[تركي صالح]

اخوي / المسيكي

صح لسانك على الابيات الرائعه

وصح لسان الشاعر الكبير/ عبدالله بن عبار

وتقبلوا فائق التقدير والاحترام

[فاضي عبدالعزيز]

المسيكي




صح السانك ملالالالالالالالالالالالالالاين

والله خير بدايه

صح السان الآديب ا لشاعر الكبير
عبد الله بن دهيمش العبار


لاهنت

[المسيكي]

الاخوان الكرام جميعا


[align=center]الواطي



تركي صالح



فاضي عبدالعزيز[/align]

تشرفت بمروركم جميعا ،،،

كل الشكر والتقدير لكم