الحافز اللي دفعنـي أنثـر احساسـي
ام العيـون الكحيلـه يــوم لاقتـنـي
اللي غلاهـا كبيـر وصعـب ينقاسـي
سكنتها وسـط جوفـي يومهـا جتنـي
غيمه ومرت عـروق/ن ذبـل يباسـي
واروت عروقي زلال المـي وروتنـي
وحلفـت إنـي لمـد اليدهـا كـاسـي
واسقيها عذب المشاعر مثـل ماسقتنـي
هي نبض قلبي وحـبٍ دايـمٍ راسـي
الله اكبـر عليهـا كيـف هزتـنـي.؟
جتني بدلة غـرام/ن تجلـي اعماسـي
وساقـت فناجيلهـا يمـي وقهوتـنـي
واخذت كيف الغرام وهـب نسناسـي
واستبشرت خير روحي يـوم حيتنـي
وابهارها اللي وصلني عطـر الباسـي
وجيـت اتغنـى بريحـة عطرشدتنـي
واعزف شعوري على عودي ومرواسي
وشلون ماعزف وهي بالعذب سمتنـي
وقامت تمول وتدرك نغمـة اجراسـي
وعن كل مادار فـي راسـي اجابتنـي
في جلستي جنبها كـم زان مجلاسـي
وعن كل ضيمٍ شكـاه القلـب واستنـي
بلمسة يديهـا تلاشـا همـي القاسـي
وبنظرة العيـن هـدت روع واوتنـي
يعني مصيبه إذا انـي بعلـن افلاسـي
وهـذا رصيـد المشاعرمنّـه أغنتنـي
ماني عن الحـب لالاهـي ولاناسـي
حرام مانسى وهـي بالحـب غذتنـي
ومدامها وسط قلبـي ماشتكـي باسـي
الخـوف لامنهـا راحـت وهدتـنـي
يعني( بعلـم الأطبـا) تقطـع انفاسـي
ويقـال عنـي بـأن البعـد موتـنـي
جلسه وجابت لي الهوجاس في راسـي
وشلـون لومـدت ايديهـا وضمتـنـي
أكيـد انـي بـودع واعتـزل ناسـي
واقول .ضمه مـن الاعـلال داوتنـي
كذا شعـوري تناثـر وسـط كراسـي
وجـت القصيـده تفاخـر ماتعدتـنـي
من غير ماشعر نثـرت الدروالماسـي
لان بصراحه زهـور الـورد لاقتنـي
الشاعر / ماجد الجعفري
28/11/10, (01:32 PM)
الحافز
العرض المتطور
