يابوي ليه تبكي كل ما شفتك وعينـك لـي - °~*¤®§(§ شبـــكة ويــلان العـربـيـه §)§®¤*~ˆ°

**نافع عيد الجديد** · 10/01/09, (05:27 PM)

يابوي ليه تبكي كل ما شفتك وعينك لي
أخاف أموت يا بويه وقبل الموت تبكيني

كفا يا بوي لا تبكي وأنا موجود معك وحي
أجل بعد الرحيل شلون في قبري توطيني

يا بوي لو تموت الناس ما تسوى دموعك ذي
وأنا يابوي ميت قبل أموت وأنت محييني

قسم بالله يابويه لأجل عيونك شربت الغي
شربت الهم والحرمان وبحر الويل يسقيني

تحملت السنين اللي طوتني في عذابي طي
وصار الجمر بكفوفي وتحت أقدام رجليني

يا بويه ما على عمري حسافة ولا بقى به شي
ولكن بطلبك يابوي تكفى لا تخليني

يابويه ما أبي غيرك يغسل جثتي بالمي
وتكفى قبل لا تكفني يابويه تفك لي عيني

بأمر الله يمكن ألمحك وأرحل بعيني ضي
وأودع وجهك الطاهر مع دنياي وسنيني

وخل الناس تحملني وترفع رأسي ورجلي
وتأخذني على قبري وتكسب أجرها فيني

واذا جيت القبر يا بوي نزلني شوي شوي
ووجهني لبيت الله وقبلة المصليني

واذا تقدر أبي صورتك أمانة حطها في ايدي
لعل الله يشفع لي اذا صورتك في ايديني

وحط الطين وادفني وعز اللي يعزي في
ثلاث أيام يا بوي يجونك المعزيني

ورابع يوم يابويه تذكر ضحكتي وعني
تذكر وش كنت أقول يوم انك تناديني

تذكر يوم كنت أنام في ظل النخل والفي
تجي يمي تصب الماء على وجهي تصحيني

تذكر جرت الموال وصوت ( ن ) في حباله كي
تذكر يوم أغني لك قصيدي وأنت توحيني

تذكر ضحكتك لا قلت لك يا بوي عشقي هي
تذكر كم قصيدة خافية ما بينك وبيني

تذكر كل شيء كان واذكر يوم(جابر) حي
ولكن أسألك بالله يا بويه لا تبكيني

منقول

**سليمان الجعفري** · 10/01/09, (10:04 PM)

قصيده حزينه جداً ولها قصه

انا قد سمعت بها من قبل

على العموم الله يعطيك العافيه

اخي نافع عيد على النقل

تقبل تحياتي واحترامي

**هبوب العنزي** · 11/01/09, (02:16 AM)

اختيار راقي اخوي نافع..

جابر هايف العتيبي صاحب تلك النبره الحزينه الغاضبه ...

لا اعلم لماذا قصائده تولد لدي جيوش الغضب والحزن..

جابر هايف العتيبي؟ سر الحزن الدفين...

**نافع عيد الجديد** · 11/01/09, (11:04 PM)

اقتباس:

المشاركة الأصلية كتبت بواسطة هبوب العنزي

اختيار راقي اخوي نافع..

جابر هايف العتيبي صاحب تلك النبره الحزينه الغاضبه ...

لا اعلم لماذا قصائده تولد لدي جيوش الغضب والحزن..

جابر هايف العتيبي؟ سر الحزن الدفين...